Read cisena YEREMIA 8 Bible Online

YEREMIA 8 - cisena bible

YEREMIA 8

¹MBUYA adalonga mbati, “Pandzidzi wenewo magogodo a mafumu na mathubu a ku Yuda, magogodo a anyansembe na maprofeti, pontho na magogodo a anthu anango onsene a mu Yerusalemu ale, anabuluswamo m'masiye.

²M'mbuto mwa kugumanyiswa na kufikhirwa, magogodo awo anakhala gwenjere-gwenjere pakwecha ninga ulowa. Dzuwa inaamenya pontho mwezi na nyenyezi pinaamwinikira, pinthu pile pikhafuna na kutumikira anthu enewa, pontho kudavunza iwo nzeru mbakapipembedza pile.

³Tenepo anthu anafuna dzasala na moyo a dzinza yakuipayi, ale ambakhala kumbuto zidaabalalisa ine zile, mbadafuna pyakwanga kufa pyawo kusiyana na kuthimiza kukhala na moyo. Ndalonga ndine MBUYA Wamphamvu zonsene.”

⁴MBUYA andipanga kulonga kuna anthu ache kuti, “Munthu angagwa, ayi iye nkhabe lamuka tayu? Munthu angabauka, ayi hambabwererave tayu?

⁵Apo thangwi yache njanji anthu enewa abauka? Njanji Yerusalemu ndzidzi onsene ambabauka? Iwo ambakakamira papinthu pyakunama; iwo akukhonda kubwerera kuna ine.

⁶Ine ndidaikha makutu pikhalonga iwo, kwache iwo nkhabe longa pyakuonadi tayu. Nkhabe na mbodzi ene anafuna tayu pya kuleka pyakudawa pyache, nkhabe mbodzi ambalonga kuti, ‘Chachita ine ninji?’ Munthu onsene ambathimiza kuchita pinafuna iye ninga kavalo kulikitika kunkhondo.

⁷Podi na chidokowe chene m'dzulu chimbadziwa ndzidzi wache wakubwerera; majiwa, anyanzeze na masili-sili ambadziwa ndzidzi wakufuluka pambuto. Mbwenye anthu anga nkhabe dziwa pinthu pimbafuna MBUYA tayu.

⁸“Ayi imwe mungalonge tani kuti, ‘Ife ndife anzeru, thangwi timbadziwa mwambo wa MBUYA,’ mwenemo mwambowo wasanduzwa wakunama na anyakulemba akunama?

⁹Anyanzeru anati achitiswe manyadzo; iwo anati adzudzumike mbakweshwa na msampha. Podi iwo akhonda mafala a MBUYA, apo nzeru zache nsanji zina iwo?

¹⁰Natenepo ndinapereka akazawo kuna amuna anango, pontho mazunde awo kuna anthu anango. Munthu onsene, mkulu penu mwana, onsene ngamtima, kwawo nkhufuna kuganyali basi; maprofeti na anyansembe ntchibodzi-bodzi, onsene nkhabe chita mwakuona mtima tayu.

¹¹Iwo ambamanga mwajumba njinda za anthu anga khala ninga si pironda tayu. Iwo ambalonga kuti, ‘Mtendere, mtendere’ podi kwene kuti mtenderewo nkhabepo.

¹²Ayi iwo adachita manyadzo na pinthu pyakunyansa pidachita iwopi? Nkhabe, iwo nkhabe kuva napyo manyadzo tayu. Iwo nkhabe kula napyo msolo tayu. Tenepo iwo anagwa ninga mudagwera anzawo, ine ndingaatchunyusa kumala kwawo kunakhala konthoko. Ndalonga ndine MBUYA.

¹³“Ine ndinapokosera pyakuvuna pyawo. M'mitawi yamfesa nkhabe dzakhalave mfesa tayu. M'miti yamkuyu nkhabe dzakhalave makuyu tayu, pontho masambawo anaunyala. Pinthu pyaapasa ine pile ndinati ndiapoke.”

¹⁴Anthu akuvunza kuti, “Tatani tinakhala pano gumanyikane? Tendeni tithawire pyathu kumzinda wakutchingwa na mpanda mbatikafere pyathu kweneko! Thangwi MBUYA Mulungu wathu atichitisa kuti tivungike mbatipasa madzi akupha kuti timwe, thangwi ife tamdawira.

¹⁵Ife maso akhali kunjira kudikhira mtendere, kwache nkhabe chadidi chidachitika tayu, ife tikhadikhira kuwangiswa, kwache chidaona ife mphinthu pyakugoswa pene basi.

¹⁶Kumina kwa akavalo a anyamalwa kukuveka kubulukira ku Dani; dziko yonsene ikutetemera thangwi ya kulira kwa akavalo awo. Iwo adza dzavunga dziko na pyonsene pili mwenemopyo, mzinda na anthu ache onsene ambakhala mwenemo ale.”

¹⁷MBUYA akulonga kuti, “Khalani m'maso, ndinatumiza nyoka zakupha pakati panu, mibobo ile nkhabe kuva matsenga tayu, tenepo izo zinakulumani.”

¹⁸Nyakundithondozanga pandzidzi wakutsukwala kwanga, mtimanga waphatwa na nsisi zikulu.

¹⁹Veserani kulira kwa anthu anga, kubulira kudziko yakutali pyakwanga kuti, “Ayi MBUYA halive mu Zioni tayu? Ayi mfumu wache halive kweneko tayu?” MBUYA akutawira kuti, “Thangwi yache ninji iwo andizhangalisa na mifanikizo yawo, pontho na milungu yawo yakusowa basa?”

²⁰Anthu akulonga kuti, “Ndzidzi wakuvuna wagwanda, mainja amala, apo ife nee tapulumuka tayu.”

²¹Podi anthu anga ali panyatwa zikulu, ine ndikuva kupha; ine ndimbasintili pontho kuphatwa na mantha makulu.

²²Ayi mu Gileadi[8] nkhabemo mitombwe? Ayi na ang'anga ene nkhabemo? Thangwi yache ninji anthu anga nkhabe wanga tayu?