Read cisena YEREMIA 9 Bible Online

YEREMIA 9 - cisena bible

YEREMIA 9

¹Ndikhapifunadi kuti msolo wanga mbudakhala mphuno ya madzi, pontho maso anga mbadakhala pyawo mchera wa misozi! Ine mbidalira mosiku na masikati thangwi ya kuchekwa kwachitwa anthu anga.

²Ndikhafuna pyakwanga kukhala na mbuto kuthando yatchetcha, kule mbidakwanisa kuthawa anthu anga. Onsene mbanthu okhonda khulupirika, gulu ya mapanga.

³MBUYA akulonga kuti, “Malulume awo ambasasanyika kulonga pyakunama ninga mauta kuponya matswimo; dziko yonsene yadzala na pyakunama, pyakuonadi nkhabemo. Iwo ambachita nyansanja-nsanja wa pyakudawa; iwo nkhabe kutawira tayu kuti ndine Mulungu wawo.

⁴Munthu onsene athema kuchita mphole-mphole na ashamwali ache, pontho aleke nyindira abale ache. Thangwi mbale ndi mphandu ninga mudachitira Yakobo, pontho shamwali onsene ndi mpeni walezi.

⁵Pimbachitika shamwali kunamiza shamwaliache, nkhabe na mbodzi ene ambalonga pyakuonadi tayu. Malulume awo amala kuafunzisa kulonga pyakunama; iwo ambapidambisa okha ene na kuchita pyakudawa.

⁶Chakudawa chimbatewera chakudawa chinzache, kunama kumbatewerambo kunama; iwo nkhabe funa kundidziwa tayu. Ndalonga ndine MBUYA.”

⁷Natenepo MBUYA Wamphamvu zonsene akulonga kuti, “Yang'anani, ine ndinaayesa kubulusa masepu-sepu muna iwo, thangwi ninji pontho chinafuna ine chita kuna iwo thangwi ya pyakudawa pya anthu anga?

⁸Malulume awo akhala ninga matswimo akupha; ndzidzi onsene kwawo nkhulonga pyakunama basi. Munthu ambatapira m'kanwa kuna shamwaliache, mwenemo mumtima mwache mwadzala na manyerezero akuipa.

⁹Ayi ine sidatheme kuatchunyusa tayu thangwi ya penepi? Ayi ine sidatheme kubwezera tayu thangwi ya pinthu pyandichita dzinza yeneyi? Ndalonga ndine MBUYA.”

¹⁰Ine Yeremia ndinalira na kukalala thangwi ya mapiri, ndinalira maliro thangwi ya kududumuka kwa mpovu m'thando. Mbuto yasala yokha ene pontho nkhabe munthu akugwanda namove tayu, kulira kwa ng'ombe nkhabe vekamove tayu. Mbalame zamala thawamo pontho nyama zabulukamo.

¹¹MBUYA akulonga kuti, “Ndinachitisa Yerusalemu kukhala mulu wa madongolomwa, mbuto yakukhala matika; mizinda ya Yuda inasanduka madembe mbuto yakukhonda khala munthu na mbodzi ene.”

¹²Ine ndidavunza kuti, “Munthu wache mbani ana nzeru zakuvesa pinthu penepi? Munthu wache ngupi apangwa na MBUYA kuti afuthule pinthu penepi? Thangwi ache ninji dziko yasanduka madembe pontho thando yatchetcha, mwakuti nkhabe munthu na mbodzi ene akugwanda namo pontho tayu.”

¹³MBUYA adalonga mbati, “Thangwi yache njakuti iwo akhonda matongero anga adaapasa ine ale; iwo hadandivere, penu kuteweza matongero anga tayu.

¹⁴M'mbuto mwache iwo ateweza pinthu pimbafuna mtimawo wakuuma ule; iwo atewera milungu Baala ninga montho mudaafunzisira makolo awo.”

¹⁵Natenepo MBUYA Wamphamvu zonsene, Mulungu wa Israele akulonga kuti, “Yang'anani, ine ndinachitisa anthu enewa kudya pyakuwawa pontho kumwa madzi akupha.

¹⁶Ine ndinaabalalisa pakati pa madzinza akuti chipo nee iwo, penu makolo awo ambaadziwa tayu, pontho ine ndinati ndiathamangise na talasada mpakana ndimale kuavunga.”

¹⁷MBUYA Wamphamvu zonsene akulonga kuti, “Nyerezerani pya pinthu pinachitikapi! Chemeresani akazi akulira maliro kuti adze; chemeresani anyaluso pakati pawo.

¹⁸Mbadze mwakuchimbiza dzatilira maliro, mpakana maso athu agwe misozi, pontho mikulo ya misozi ikuke m'maso mwathu.

¹⁹Kukalala kukuveka na ku Zioni kuti: Ife tamala vungwa! Ife tachitiswa manyadzo pikulu pene! Ife tathema kubuluka m'dziko muno, thangwi nyumba zathu zamala vungika.”

²⁰Ine ndidalonga kuti, “Imwe akazi, veserani pinthu pinalonga MBUYA; ikhani makutu anu kuna mafala a MBUYA. Funzisani ananu achikazi kulira maliro; funzisanani unango na mwanzache nyimbo za maliro.

²¹Imfa yapita na m'mazhanera pontho mumpanda wamphamvu; yagwanda pakhosi ana m'misewu pontho aphale m'misika.

²²MBUYA andipanga kuti ndilonge mafala awa: Mitembo ya anthu inakhala ninga ulowa gwenjere-gwenjere m'minda, ninga mapira akusiyiwa m'nduli mwa anyakuvuna, wakusowa na mbodzi ene wakuaphalakatira.”

²³MBUYA akulonga kuti, “Nyanzeru mbaleke nyadira nzeru zache, penu nyamphamvu kunyadira mboko zache, penu nyamfuma kunyadira ufumi wache.

²⁴Mbwenye nyakufuna kunyadayo mbanyade na thangwi yakuti: iye ndi nyakuvesa pinthu pontho ambadziwa ine pano, kuti ndine MBUYA, nyakuafuna anthu kokhonda mala, nyakufuna chilungamo, pontho pyakulungama padziko yapansi, thangwi penepi ndiye pimbandikomera. Ndalonga ndine MBUYA.”

²⁵MBUYA akulonga kuti, “Ndzidzi ukudza unafuna ine dzatchunyusa anthu ale ambagwanda nsonga yachimuna, ile imbachitwa pamanungo basi;

²⁶anthu a ku Iguputo, Yuda, Edomu, Amoni, Moabu na anthu a m'thando yatchetcha, ale ambachinga tsisi yawo.[9] Thangwi madzinza onsenewa hadagwandwe nsonga yachimuna tayu, podi na dzinza yonsene ya Israele hidagwandwe mumtima tayu.”