Read cisena CHILIRO 2 Bible Online

CHILIRO 2 - cisena bible

CHILIRO 2

¹Ngayang'anani mule mwaphimbira Mbuya mzinda wa Zioni na makole a kuzhangali kwache. Iye akunundula demelero ya Israele mbaiponyera pansi kubulukira kudzulu; pansiku ya kuzhangali kwache, iye hadakumbukeve tayu chakutsamizira manyalo ache.

²Mwakusowa nsisi Mbuya adavunga misa yonsene ya Yakobo; na kuzhangali kwache iye agwisa mizinda yakutchingwa na mpanda ya Yuda. Iye achitisa manyadzo ufumu na atongi ache ene.

³Na shungu yache ikulu iye amala khutcha mano anyamphamvu a Israele. Ndzidzi udafika anyamalwawo iye adabulusa pana iwo mkono wache wakuatchinjiriza Iye adayerima pana Yakobo ninga moto wakugaka, ule umbanyekesa pinthu pyonsene pyakuuzungulira.

⁴Ninga nyamalwa iye akweya kale utache; mkono wache wa madyo uli chinjike. Na mkono wache wamphamvu iye adamala cheka onsene akhamkomera m'maso mwache ale; iye akhuthulira ukali wache ninga moto pana anthu a mumzinda wa Zioni.

⁵Mbuya akhala ninga nyamalwa; iye avunga Israele monsene mwene. Iye amala vunga nyumba zache zonsene zachifumu mbagomola mbuto zache zakutchingwa na mpanda. Iye ainjipisa kulira na kusintili pakati pa anthu mu Yuda.

⁶Iye adafudza Nyumbache khala ninga khumbi ya m'munda; iye avunga mbuto yache yakugumaniranako. MBUYA amalisa mu Zioni maphwando akupambulika, pontho na Nsiku zakupuma. Na kuzhangali kwache kukulu, iye apasa nkhodolo mfumu na anyansembe ene.

⁷Mbuya aikhonda guwache yansembe mbapasa nkhodolo mbuto yache yakuchena. Iye adapereka m'manja mwa anyamalwache mafufu a nyumba zachifumu za Zioni; m'Nyumba maka mwa MBUYA, mkhuwo udaveka, khala ninga ikhali nsiku ya phwando.

⁸MBUYA adachita phinga kuti avungiretu mpanda onsene wa mzinda wa Zioni. Iye adaupima na nkhambala yache, towera iye aleke khonda kuuvunga monsene mwene. Iye adachitisa mpanda na mafufu ache kulira, pyonsenene pidamala vungika monsene mwene.

⁹Misuwo yache ya mpanda yamala fikhirika pansi; mphinga zache zamala gwandika na kupanduka-panduka. Mfumu na mathubu ache amala kwatwa kwenda kudziko ya unyaperezo; mwambo wa Mulungu nkhabeve gumanwa tayu; maprofeti ache nkhabeve ona masomphenya akubulukira kuna MBUYA tayu.

¹⁰Akulu-akulu a mu Zioni ali fulike pansi. Iwo apiwaza fumbi mumsolo mwawo pontho amala vala masakha. Akazi a ku Yerusalemu ali tchuli-tchuli.

¹¹Maso anga ali thubu-thubu na kulira; matumbo anga amala mangana. Mumtima mwanga mwadzala na nsisi zikulu, thangwi anthu anga onsene amala vungika, thangwi ana na akachiya ene akhakomokera m'njira za mumzindamo.

¹²Iwo ambalonga kuna amawo mbati, “Mkate na chakumwa pili kupi?” Ndzidzi unachita iwo chipupu moyo ninga anyakukuwazwa m'misewu ya mumzindamo, ndzidzi unamalisika iwo m'manja mwa amawo.

¹³Chinafuna ine kulonga kuna iwe Yerusalemu ninji? Chinafuna ine kukusangiza nacho ninji? Iwe Zioni ndinakusangiza nanji towera ndikuthondoze? Njindako ili zwikoo ninga bara; mbani anakwanisa kukuwangisa?

¹⁴Masomphenya a maprofeti ako akhali akunama pontho apezi. Iwo hadaonese pakwecha pyakudawa pyako tayu, towera pinthu pyako pifambe pontho mwadidi. Mphangwa zikhalonga iwo kuna imwe zile, zikhali zakunama pontho zakuendesa munthu m'tsanga.

¹⁵Onsene anyakugwanda na njira akukuseka; iwo akupidula mbasedegula Yerusalemu mbati: “Ayi mzindache ngwenewu ukhachemerwa wakubalika monsene mwene ule, mzinda wakukomwerwa dziko yonsene yapansi ule?”

¹⁶Anyamalwako onsene, ali mano jentchenene; iwo ambakikita mano awo mbakusedegula mbati, “Ife tamkhudyula. Ehede! Nsiku yache njino ikhadikhilira ife ile; ife tina moyo kuti tiione nsiku yeneyi.”

¹⁷MBUYA achita pidasasanya iye; iye achitisa mafalache kukwana-kwana, mafala adalonga iye kale ene ale. Iye akukunda mwakusowa nsisi, iye atawirisa anyamalwako kukusingirira, iye achitisa anyamalwako kufamba na nthuku phaa.

¹⁸Mitima ya anthu imbalira kuna Mbuya. Iwe mpanda wa Zioni, misozi yako mbikuke ninga mkulo mosiku na masikati; leka khala na ndzidzi wakupuma, pontho maso ako mbaleke mala misozi.

¹⁹Lamukani, mbamukhuwe na mosiku mbamulire chiphedzo mosiku onsene; khuthulani mtimanu ninga madzi pamaso pa Mbuya. Kwizani manjanu kuna iye thangwi ya moyo wa ananu, ale adakomoka na njala pankhomo ya njira yonsene.

²⁰Ngayang'anani MBUYA mbamunyerezere! Mbani adatoma imwe kumchita pinthu ninga penepi? Ayi akazi achite kudya anawo, ana alera iwo ale? Ayi anyansembe na maprofeti aphiwe m'mbuto yakuchena ya Mbuya?

²¹Aphale na nkhalamba zene ali thasa-thasa m'misewu; aphale na atsikananga amala phiwa pankhondo. Imwe mwaapha pansiku idazhangali imwe ile; imwe mwamala kuacheka mwakusowa nsisi.

²²Ninga montho mumbachemerera imwe anthu kuphwando, montho-monthomo mwandichemerera pyakugoswa kubulukira kumakhundu onsene. Imwe MBUYA, pansiku ya kuzhangali kwanu nkhabe na mbodzi ene adathawa penu kupulumuka tayu. Onsenene adabala ine mbandialera, anyamalwanga amala kuavunga.