Read cisena CHILIRO 3 Bible Online

CHILIRO 3 - cisena bible

CHILIRO 3

¹Ine ndine munthu ule asanyiswa na ndodo ya ukali wa MBUYA.

²Iye andiendesa kumbuto zamdima, mbandichitisa kufamba mumdima wa ndiwe ani.

³Ndimomwene, iye anditchunyusa na mkono wache mbapichita kawiri-kawiri, nsiku yonsene.

⁴Iye achitisa khanda na mnofu wanga kukhwidzimbira, pontho iye aswa magogodo anga.

⁵Iye andisosa mbandizungulira na misasa ya mtswotswo pontho nyatwa.

⁶Iye andichitisa kukhala mumdima ninga ale adafa kale.

⁷Iye andifungira mumpanda, towera ndichimwane thawa; iye andimbuluthira pansi na nkhambala.

⁸Podi ndichemere pyanga tani, penu kukhuwa kufuna chiphedzo. Iye nkhabe vesera kupempha kwanga tayu.

⁹Iye atchinga njiranga na miyala; iye achitisa njiranga kugongonyeka-gongonyeka.

¹⁰Ninga mumbachitira nyalugwe swiswiswi, pontho ninga nkhalamu kubisalira chinthu,

¹¹iye adandikwekweta kundibulusa m'njira, mbandinyedza-nyedza, pontho andisiya wakusowa chiphedzo.

¹²Iye adakweya utache, mbandithamswira na matswimo ache.

¹³Iye adandilasa pamtima na matswimo akubulukira m'chakuikhiramo chache.

¹⁴Ine ndasanduka chakusekesa kuna anthu anga onsene; nyimbo zawo zimbakhala kuimba ine nsiku yonsene.

¹⁵Iye andimwesa mwavi mbandiledzeresa na khomitcho ya nyatwa.

¹⁶Iye akhutcha mano anga na ntchangalabwe; iye andiviviniza padotha.

¹⁷Mtendere ukhali na ine, iye andibulusira; ine ndaduwalira kuti ufumi ninji.

¹⁸Natenepo ndimbalonga kuti, “Demelero yanga yaenda, pyonsene pile pikhadikhira ine kuna MBUYA.”

¹⁹Ine ndimbakhalira kukumbuka kusanyika kwanga, pontho na umanzenzanga, mwavi udamwa ine na nyatwa zanga.

²⁰Penepi pene ndiye pimbakumbuka ine mwakuti ndikusanyika mtima pikulu pene.

²¹Kwache ndingakumbuka ipi, penepo ine ndimbakhala na chidikhiro:

²²Na thangwi ya kutifuna kukhonda mala kwa MBUYA ife nee tamaliratu tayu, thangwi iye nkhabe dzaleka tayu kuva nafe nyambalo.

²³Nsisi zache zimbaoneka zachinchino machibese onsene; kukhulupirika kwache nkhukulu pyakwanga.

²⁴Ine ndimbalonga ndekha ene kuti, “MBUYA ndiye pinthu pimbafuna ine basi; natenepo ndinati ndimnyindire.”

²⁵MBUYA ngwadidi kuna ale, chidikhiro chawo chili muna iye, kuna anyakumsaka-saka.

²⁶Mphyadidi kukhala pyako fule kudikhira chipulumuso cha MBUYA.

²⁷Mphyadidi kuna munthu, kuthukula pyache goli-goli mbali mphale.

²⁸Mulekeni akhale pyache mulomo phoo, thangwi MBUYA ndiye amthukulisa.

²⁹Mulekeni agone na fufumimba pamataka, mwinango anagumanamo chidikhiro.

³⁰Mulekeni pyache aperekere phutu yache kuna nyakufuna kumgasa mbama, pontho mulekeni achitiswe manyadzo.

³¹Thangwi Mbuya nkhabe pasa nkhodolo tayu anthu ache kwenda na kwenda.

³²Podi kwene kuti iye ambadzesa pyakutsukwalisa, iye anati ave nyambalo; kutifuna kwache kokhonda mala nkhukulu pyakwanga.

³³Iye nkhabe komerwa na kudzesa nyatwa, penu pyakutsukwalisa pana anthu tayu.

³⁴Kuponderezwa kwa anyaperezo onsene a padziko yapansi,

³⁵kuponderezwa kwa ufulu wa munthu pamaso pa Nyakudzulu-dzulu,

³⁶pontho kupotoza chilungamo pamseru wa munthu, ayi Mbuya nkhabe kupiona pinthu ninga penepi tayu?

³⁷Mbani anakwanisa kutonga, pinthupyo mbapichitikadi, ngakhala hadapitonge ndi Mbuya tayu?

³⁸Ayi si m'kanwa mwa Nyakudzulu-dzulu tayu, mule mumbabuluka dzedze na mtsanzayiso?

³⁹Thangwi yache njanji munthu wamoyo ambadungunya, angatchunyuswa thangwi ya pyakudawa pyache.

⁴⁰Tendeni tione mwadidi njira zathu na kuziyesa, pontho mbatibwerere kuna MBUYA.

⁴¹Tendeni tifungule mtima mbatikwiza manjathu kuna Mulungu kudzulu, mbatilonge kuti,

⁴²“Ife tadawa pontho tapandukira, tenepo imwe hamudatilekerere tayu.

⁴³“Imwe mwatibiza na kuzhangali kwanu, mwatithamangisa mbamutipha mwakusowa nsisi.

⁴⁴Imwe mwapibisa mwekha ene na makole mwakuti kupemphera kwathu nkhabe fika kuna imwe.

⁴⁵Imwe mwatisandusa pakati pa madzinza anango ninga shuzhu pontho pyakunyansa.

⁴⁶“Anyamalwathu onsene kukanwa kuli yashaa kutisedegula.

⁴⁷Ife tagoswerwa pikulu mbitigwera m'dzenje; tavungika pontho tamaliratu.

⁴⁸Mikulo ya misozi ikukuka m'maso mwanga, thangwi anthu anga amala vungika.

⁴⁹“Misozi m'maso mwanga nkhabe dzauma tayu, pontho nkhabe dzapuma tayu

⁵⁰kufikirana MBUYA ayang'ane pansi kubulukira kudzulu mbapiona.

⁵¹Pyonsene pimbaikha ine maso pimbandidzesera kutsukwala, thangwi ya dzedze ina akazi onsene a mumzinda mwanga.

⁵²“Ale akhali anyamalwanga okhonda na thangwi ene adandikhulisa ninga mbalame.

⁵³Iwo adandiponya wamoyo m'dzenje mbandiponyera miyala;

⁵⁴madzi adandibiza, tenepo ndidanyerezera kuti, ‘Ine ndili chifupi kusiyana nayo dziko.’

⁵⁵“M'dzenje yakuzwika mule, ine ndidachemera dzinanu MBUYA.

⁵⁶Imwe mudava kupempha kwanga kuti, ‘Lekani phopha makutu anu pinalira ine kufuna chiphedzo.’

⁵⁷Imwe mudadza chifupi pidakuchemerani ine, pontho mudalonga kuti, ‘Leka chita mantha.’

⁵⁸“Mbuya imwe mudakwata mseru wanga; imwe mudaombola moyo wanga.

⁵⁹Imwe MBUYA mwaona kusowa chilungamo kwachitirwa ine. Tongani mseru wanga mwakundikomera!

⁶⁰Imwe mwaona kubwezerwa kukulu kwachita iwo, pyonsene pyasasanya iwo kupokanyisana na ine.

⁶¹“MBUYA, imwe mwava kunditikana kukulu kwandichita iwo, pyonsene pyasasanya iwo kupokanyisana na ine,

⁶²pinthu pinalonga anyamalwanga chiwere-were kupokanyisana na ine nsiku yonsene yamumphu.

⁶³Ayang'aneni, pinachita iwo khale-khale pontho chiliri-chiliri, nyimbo zawo nsakusingirira nazo ine pano.

⁶⁴“MBUYA abwezereni mwakuthemerana na pidachita iwo, thangwi ya pinthu pidachita manjawo.

⁶⁵Phimbirani mitimawo na chakumpsampsira, pontho apaseni dzedze!

⁶⁶Athamangiseni mwakuzhangali, MBUYA, mbamuatswaire pansi pa thambo.”