Read cisena CHILIRO 5 Bible Online

CHILIRO 5 - cisena bible

CHILIRO 5

¹Kumbukani MBUYA pyonsene pyatichitikirapi. Yang'anani, mbamuone kululupiswa kwachita ifeku.

²Pinthu pidatisiyira makolo athu pile, lero pyasanduka pya alendo; misathu yasanduka ya anyakudza.

³Ife tasanduka ana masiye, ana akusowa ababawo; amathu asanduka amamfelwa.

⁴Ife tathema kugula madzi anamwa ifewa; nkhuni zathu zonthozi tathema kuzipagalira.

⁵Anyakutithamangisa ale akhala ninga goli-goli m'khosi mwathu; ife tatopa, pontho nkhabe tawiriswa kupuma tayu.

⁶Ife tidaimisa manja kuna Aiguputo na Aasiria, towera tigumane pyakudya pyakukwana.

⁷Makolo athu adadawa, pontho adamala kufa, tenepo kutchunyuswa kwawo kwagwera pamsolo pathu.

⁸Mabitchu ndiye asanduka atongi athu mwakuti nkhabe na mbodzi ene wakutipulumusa m'manja mwawo tayu.

⁹Ife timbagumana kudya kwathu kubulukira m'thando yatchetcha, kuikha moyo wathu pamoto, thangwi ya mapanga a m'thandomo.

¹⁰Khanda yathu ikuveula ninga dzenje yamoto, thangwi ya kupha kwa njala.

¹¹Akazi a mu Zioni amala phatirirwa, pontho na amiyali ene a m'maluwani a Yuda.

¹²Atongi athu adamangirirwa m'dzulu na manjawo; akulu-akulu nkhabe lemedzwave tayu.

¹³Aphale akukhakhamizwa kupeya palibwe ninga mabitchu; ana achimuna akutchima nayo mitolo ya nkhuni.

¹⁴Akulu-akulu nkhabeve tonga miseru pamsuwo wa mzinda; aphalembo aleka pyawo kuimba nyimbo zawo.

¹⁵Kukomerwa kwabulukamo mumtima mwathu; kuvina-vina kwathu kwasanduka kulira.

¹⁶Chipewu chachifumu chagwa mumsolo mwathu. Dzedze kuna ife, thangwi tadawa!

¹⁷Na thangwi ya penepi mitimathu yalenduka; na thangwi ya penepi maso athu achita chidima,

¹⁸thangwi phiri ya Zioni yavungika; pontho matika akusenzekamo.

¹⁹Kwache imwe MBUYA, ndimwe mtongi kwenda na kwenda; mpando wanu wachifumu umbakhalapo mpakana mifendu yonsene.

²⁰Apo mwatani ndzidzi onsene mumbatiduwalira? Thangwi yache ninji mwatisiya tekha tenepa ndzidzi ukulu ene?

²¹Tibwezereni kuna imwe MBUYA, towera tibwerere kuna imwe; chitisani nsiku zathu kukhala ninga montho mwakale,

²²ngakhala imwe nee mudatikhonderatu monsene mwene tayu, pontho kuzhangali kwanu nee kudapiringane madire tayu.