Read cisena EZEKIELE 1 Bible Online

EZEKIELE 1 - cisena bible

EZEKIELE 1

¹Chaka chamakumatatu, pansiku yachishanu ya mwezi wachinayi, pikhali ine pabodzi pene na anthu adakwatwa kwenda kudziko ya unyaperezo chifupi na mkulo wa Kebari, kudzulu kudafunguka mbandiona Mulungu kumasomphenya.

²Pansiku yachishanu ya mwezi onthowo, chenecho chikhali chaka chachishanu kubulukira ndzidzi udakwatwa Mfumu Yehoiakini kwenda kudziko ya unyaperezo,

³kweneko m'khundu mwa mkulo wa Kebari m'dziko ya Babiloni, MBUYA adalonga kuna ine, Ezekiele nyansembe, mwana Buzi. Kweneko mphamvu za MBUYA zidandigudumira.

⁴Ine ndidakwiza maso, tenepo ndidaona chonzi chikudza kubulukira kumpoto, makole akulu akuzungulirwa na cheza chakugaka moto pyakwanga pene, pontho na kuchetuma kwa njazi. M'bwaloletu mwa motowo mukhayetimira ninga nkuwa wakupukutwa mwadidi,

⁵pontho m'motomo mukhaoneka pinango ninga pyakulengwa pinayi pyamoyo. Ipyo makhaliro awo akhaoneka ninga anthu,

⁶kwache chakulengwa chonsene chikhali na nkhope zinayi na maphaphido manayi.

⁷Miyendo yawo ikhali yakudzongoka; manyalo awo akhaoneka ninga njondo za ng'ombe mbaziyetimira ninga nkuwa wakupukutwa mwadidi.

⁸Kunsi kwa maphaphido awo onsene kumakhundu awo manayi ipyo pikhali na manja a munthu. Pyonsene pinayi pikhali na nkhope na maphaphido,

⁹tenepo maphaphido a chibodzi adaphatana na a chinzache, towera chakulengwa chonsene chiyang'ane kukhundu kwache; pingafuna kubuluka pimbabuluka ninga gulu mbapikhonda zungunuza manungo awo.

¹⁰Nkhope zawo zikhaoneka ninga tenepa: Pyakulengwa pyonsene pinayi, chonsene chikhali na nkhope ya munthu kutsogolo kwache, kukhundu ya kumadyo chikhali na nkhope ya nkhalamu, kukhundu ya kumabzere chikhali na nkhope ya ng'ombe imuna, pontho kunduli chikhali na nkhope ya mphamba.

¹¹Zenezi ndiye zikhali nkhope zawo. Maphaphido awiri[1] chakulengwa chonsene adafuthukira kunja chakudzulu, towera maphaphido a chibodzi adaphatane na maphaphido a chinzache; mwenemo maphaphido anango awiri a chakulengwa chonsene akhaphimbira nawo manungo ache.

¹²Chakulengwa chonsene chidenderatu patsogolo. Konsene kwene kukhaenda mzimuko, ipyo pikhaendambo konthoko, okhonda zungunuka ndzidzi ukhaenda ipyo.

¹³Pakati na kati pa[2] pyakulengwa pyamoyo pakhaoneka ninga pana makala akuyerima penu ninga nsakali ya moto. Motowo ukhachita kwenda patsogolo mbubwerera m'nduli pakati pa pyakulengwa pyamoyo; motowo ukhagaka pyakwanga pene, pontho njazi idachetuma kubulukira mwenemo.

¹⁴Pyakulengwapyo pikhathamanga kutsogolo mbapibwerera m'nduli ninga kuchetuma kwa njazi.

¹⁵Pikhayang'ana ine pyakulengwa pinayi pile, ndidaona galeta ili pansi pache m'khundu mwa chakulengwa chonsene chakukhala na nkhope zinayi.

¹⁶Enewa ndiye akhali makhaliro a magaletawo: Iwo akhathothomuka ninga kirisolite, pontho magaleta onsene manayi akhaoneka sasawa. Galeta yonsene ikhapingisana na galeta inango.

¹⁷Pikhafamba iwo, iwo akhaenda kukhundu yonsene pamakhundu anayi kwayang'ana chakulengwacho. Magaleta ale hakhazungunuka tayu ndzidzi ukhaenda pyakulengwa pile.

¹⁸Magaletawo akhali njenga m'dzulu, pontho akupasa mantha, tenepo magelata onsene manayi ale adamala dzala na maso ponsene pene.

¹⁹Ndzidzi onsene ukhafamba pyakulengwa, magaleta a m'khundu mwawo akhafambambo, pontho ngakhala pyakulengwa pinathukuka magaleta ale akhachitambo chibodzi-bodzi.

²⁰Konsene kwene kukhaenda mzimuko, ipyo pikhaendambo konthoko, tenepo magaleta ale akhathukukambo pabodzi pene napyo, thangwi mzimu wa pyakulengwa pile ukhali m'magaleta mule.

²¹Pyakulengwa pile pingafamba, magaleta ale akhafambambo; pyakulengwa pile pingaimira, magaleta ale akhaimirambo; pyakulengwa pile pingathukuka, magaleta ale akhathukukambo pabodzi pene napyo, thangwi mzimu wa pyakulengwa pile ukhali m'magaleta mule.

²²Padzulu pa misolo ya pyakulengwa pile pakhali chinthu chinango chakuoneka ninga thambo chakuyetimira ninga krusitali, pontho chikhali chakupasa mantha.

²³Pansi pa thamboyo maphaphido awo adafuthuka phaphido kuyang'anizana na inango, pontho na maphaphido anango awiri chakulengwa chonsene chikhaphimbira manungo ache.

²⁴Pikhafamba pyakulengwa pile, ine ndidava dungu ya maphaphido awo ninga kukukuma kwa madzi a m'bara, ninga kusokosa kwa gulu ikulu ya anyankhondo, ninga fala ya Nyamphamvu zonsene. Pidaimira ipyo, pidafunya maphaphido awo.

²⁵Kubuluka penepo padaveka fala kubulukira padzulu pa thambo, pale pakhali padzulu pa pamisolo yawo, mwenemo ipyo pyaimira, pontho kufunya maphaphido awo.

²⁶Padzulu pa thambo, pale pakhali padzulu pa misolo pawo, pakhali chinthu chinango chakuoneka ninga mpando wachifumu wa safire, pontho padzulu pa mpando pakhali chinango chakuoneka ninga munthu.

²⁷Kubulukira pa chinthu chinango chakuoneka ninga chuno chache kukwira m'dzulu ndidaona chinango chakuyetimira ninga nkuwa wakupukutwa mwadidi, pontho kubulukira m'chuno chache kutchitha pansi ndidaona chinango chakuoneka ninga moto; cheza chikulu pyakwanga chidamzungulira munthuyo.

²⁸Cheza chakuyetima chakumzungulira chikhali sasawa na taleza m'makole pansiku ya mvula. Chenechi ndiye chikhali cheza chakuyetima chile chimbaonesa demelero ya MBUYA. Pidapiona ine, ndidapigwisa na fufumimba. Tenepo ndidava fala ya munthu ule akhalonga.