Read cisena EZEKIELE 10 Bible Online

EZEKIELE 10 - cisena bible

EZEKIELE 10

¹Ndidayang'ana kuthambo padzulu pa misolo ya pyakulengwa pyakukhala na maphaphido pile, mbandiona chinango chakukhala ninga mpando wachifumu wa safire.

²MBUYA adalonga kuna munthu adavala nguwo zakuchena ule mbati, “Pita mwenemo pakati pa magaleta pansi pa pyakulengwa pyakukhala na maphaphido; dzaza manjako na makala a moto akubulukira pakati pya pyakulengwa pyakukhala na maphaphido mbuawazire kumzinda.” Tenepo iye adapita, mwenemo uku ndikuona na maso anga.

³Pikhapita munthu ule mwenemo, pyakulengwa pyakukhala na maphaphido pikhaimira kukhundu yakumwera kwa Nyumba ya Mulungu. Tenepo makole adadzala muchintalo cham'bwalo.

⁴Demelero ya MBUYA idabuluka padzulu pa pyakulengwa pyakukhala na maphaphido pile mbienda kumsuwo kwa Nyumba ya Mulungu. Makole adadzala Nyumba yonsene ya Mulungu, pontho pachintalo pache padzala na kuyetima kwa demelero ya MBUYA.

⁵Kuphiphidza kwa maphaphido a pyakulengwa pyakukhala na maphaphido pile kukhaveka na kuchintalo chakunja, khala ninga fala ya Mulungu Wamphamvu zonsene angalonga.

⁶Pidatonga MBUYA munthu adavala nguwo zakuchena ule kuti, “Kwata moto pakati pa magaleta kubulukira pa pyakulengwa pyakukhala na maphaphido pile,” munthu ule adapitadi mwenemo mbakaimira m'khundu mwa galeta.

⁷Kubuluka penepo chakulengwa chakukhala na maphaphido chibodzi chidafuthula dzanjache kuifikisa pamoto ukhali pakati pawo ule. Icho chidapala motowo mbauikha m'manja mwa munthu adavala nguwo zakuchena ule. Iyembo adaukwata mbabuluka nawo panja.

⁸Pansi pa maphaphido a pyakulengwa pyakukhala na maphaphido pile pakhaoneka chinthu chinango chakuoneka ninga manja a munthu.

⁹Ndidayang'ana mbandiona magaleta manayi m'khundu mwa pyakulengwa pyakukhala na maphaphido pile. Galeta ibodzi kukhundu ibodzi ya pyakulengwa pile; magaleta ale akhayetimira ninga mwala wa kirisolite.

¹⁰Kulonga pya kuoneka kwa magaleta ale, onsene manayi akhaoneka sasawa; pontho galeta yonsene ikhapingisana na galeta inango.

¹¹Pikhafamba iwo, akhakwanisa kwenda kumakhundu onsene manayi, kule kwayang'ana pyakulengwa pyakukhala na maphaphido; pyakulengwa pile pingafamba, magaleta nkhabe funika kuzungunuka tayu. Pyakulengwapyo pikhaenda kukhundu konsene kwayang'ana msolo kule mwakukhonda zungunuka pingafamba.

¹²Manungo awo onsene, kuthimizapo kunduli kwawo, manjawo na maphaphido awo ponsene pene pakhali maso okhokha ninga mudachitirambo magaleta manayi ale.

¹³Ine ndidava magaleta ale akuchemerwa kuti, “Magaleta akulira ngwinjiri-ngwinjiri!”

¹⁴Chakulengwa chakukhala na maphaphido chonsene chikhali na nkhope zinayi: nkhope ibodzi ikhaoneka ninga ng'ombe imuna; inango ikhaoneka ninga nkhope ya munthu; yachitatu ikhaoneka ninga nkhope ya nkhalamu; yachinayi ikhaoneka ninga nkhope ya mphamba.

¹⁵Tenepo pyakulengwa pyamoyo pile pidathukuka. Pyakulengwa pyakukhala na maphaphidopi mphile pikhadaona ine chifupi na mkulo wa Kebari.

¹⁶Pyakulengwa pyakukhala na maphaphido pile pingafamba magaleta a m'khundu akhafambambo; pontho pyakulengwa pile pingafuthula maphaphido awo kufuna kumbuluka, magaleta ale hakhabuluka kukhundu kwawo tayu.

¹⁷Pyakulengwa pile pingaimira dzololo na magaleta enembo akhaimira; pyakulengwa pile pingathukuka na magaleta enembo akhathukuka nawo pabodzi, thangwi mzimu wa pyakulengwa pya moyo pile ukhali muna iwo.

¹⁸Kubuluka penepo demelero ya MBUYA idabuluka pamsuwo wa Nyumba ya Mulungu ile mbiimira padzulu pa pyakulengwa pyakukhala na maphaphido.

¹⁹Pikhayang'anisisa ine pyakulengwa pile, pidafuthula maphaphido awo mbapimbuluka kubulukira pansi; tenepo pikhaenda ipyo magaleta ale akhaenda napyo pabodzi. Ipyo pidaphama pamsuwo wa mpanda wakumabulukiro dzuwa a Nyumba ya MBUYA, tenepo demelero ya Mulungu wa Israele ikhali padzulu papyo.

²⁰Penepi ndiye pikhali pyakulengwa pile pidaona ine pansi pa mpando wachifumu wa Mulungu wa Israele chifupi na mkulo wa Kebari, tenepo ndidapidzindikira kuti ipyo pikhali pyakulengwa pyakukhala na maphaphido pile.

²¹Chakulengwa chakukhala na maphaphido chonsene chikhali na nkhope zinayi, na maphaphido manayi, pontho pansi pa maphaphido awo pakhaoneka chinthu chinango chakukhala ninga manja a munthu.

²²Nkhope zawo zidaoneka sasawa na zile zidaona ine pamkulo wa Kebari. Chakulengwa chonsene chidenderatu m'tsogolo.