Read cisena EZEKIELE 11 Bible Online

EZEKIELE 11 - cisena bible

EZEKIELE 11

¹Kubuluka penepo Mzimu wa Mulungu udandithukula kwenda nane kumsuwo wa mpanda wakumabulukiro dzuwa wa Nyumba ya Mulungu. Penepo pene pamsuwo wa mpandawo pakhali amuna makumawiri na ashanu, pontho pakati pawo ndidaonapo Yaazania mwana Azuri na Pelatia mwana Benaia, akadamu a anthu ale.

²MBUYA adalonga kuna ine mbati, “Iwe mwana munthu, amunache mbenewa ambasasanya kuchita pyakuipa mbapereka uphungu wakuipa mumzindamu.

³Iwo ambalonga kuti, ‘Ayi chinchino ndzidzi unati ukwane tayu wakuti tipimangire nyumba?[8] Mzindawu wakhala ninga chikalango, ife takhala ninga nyama m'chikalango kutchinjirizwambo pang'ono kuna moto.’

⁴Natenepo longa mphangwa zauprofeti kupokanyisana nawo; longa iwe mwana munthu.”

⁵Kubuluka penepo Mzimu wa MBUYA udadza pana ine mbandipanga pinthu pyakuti ndilonge mbati, “MBUYA akulonga tenepa: Imwe dzinza ya Israele pinalonga imwe mphenepi, pontho ndikupidziwa pili m'manyerezero mwanu.

⁶Imwe mwapha anthu azinji mumzinda muno mbamudzaza m'misewu yache na mitembo.

⁷“Natenepo MBUYA Mulungu akulonga tenepa: mitembo yataya imwe kweneko ndiye nyama, mzindawu ndiye chikalango, kwache ine ndinati ndikuthamangiseni mumzindamo.

⁸Imwe mumbagopa talasada, kwache talasadayo ndiye inafuna kudza na ine kukusosani. Ndalonga ndine MBUYA Mulungu.

⁹Ndinakuthamangisani mumzindamu mbandikuperekani m'manja mwa anyakudza mbakutchunyusani.

¹⁰Imwe munaphiwa pankhondo, pontho ine ndinakutchunyusani mpakana kumadire a dziko ya Israele. Penepo imwe munapidziwadi kuti ine ndine MBUYA.

¹¹Mzindawu nkhabe dzakhala chikalango kuna imwe kukutchinjirizani, penu imwe dzakhala nyama mwenemo tayu. Ine ndinati ndikutchunyuseni mpakana kumadire a dziko ya Israele.

¹²Tenepo munapidziwa kuti ine ndine MBUYA thangwi imwe hamudateweze matongero anga tayu, penu kukoya mwambo wanga tayu, mbwenye mwatsanzira mitemo ya madzinza akuzunguliraniwa.”

¹³Pikhalonga ine mphangwa zauprofeti, Pelatia mwana Benaia adafa. Tenepo ndidapigwisa na fufumimba mbindilira mwakugaluza fala kuti, “Mama ine, MBUYA Mulungu! Ayi munafunadi kuvunga Aisraele onsene adasalira ale?”

¹⁴MBUYA adalonga kuna ine mbati,

¹⁵“Iwe mwana munthu, abale ako ale mbabale ako chadi-chadi, na banja yonsene ya Israele, mbale akhalonga anthu mu Yerusalemu pya iwo kuti, ‘Ali kutali pyakwanga na MBUYA; dziko yeneyi idaperekwa kuna ife kukhala yathu ene.’

¹⁶“Natenepo longa kuti, ‘MBUYA Mulungu akulonga tenepa: Podi kwene kuti ndidaathamangisira kutali pakati pa madzinza mbandiabalalisira pakati pa madziko anango, kwache ndzidzi pang'ono ine ndakhala kuna iwo ninga mbuto yawo yakundipembedzerapo m'dziko yaenda iwo kakhala ile.’

¹⁷“Natenepo uapange kuti, ‘MBUYA Mulungu akulonga tenepa: Ine ndinati ndikugumanyiseni kubulukira kuna madzinza anango mbandikubwezerani m'dziko ya Israele kubulukira kudakubalalisirani ine kule, mbandikubwezerani pontho dziko ya Israele kukhala yanu ene.’

¹⁸Iwo angabwerera mwenemo, athema kubulusa mifanikizo yonsene yakunyansa pontho milungu yakuipa ile.

¹⁹Ine ndinati ndiapase mtima utswa na manyerezero atswa. Ndinati ndibuluse mtima wamwala muna iwo mbandiapasa mtima wamnofu.

²⁰Tenepo iwo anakoya mwambo wanga mbachita mphole-mphole kuvera matongero anga. Iwo anakhala anthu anga, inembo mbindikhala Mulungu wawo.

²¹Mbwenye kulonga pya ale mitimawo imbafuna basi pyakupembedza mifanikizo yakunyansa pontho milungu yakuipa ile, ine ndinati ndiatchunyuse malingana na pinthu pyachita iwo. Ndalonga ndine MBUYA Mulungu.”

²²Kubuluka penepo pyakulengwa pyakukhala na maphaphido, pyakukhala na magaleta m'khundu mwawo pile, pidafuthula maphaphido awo mbapimbuluka, tenepo demelero ya MBUYA Mulungu wa Israele ikhali padzulu pawo.

²³Tenepo demelero ya MBUYA idabuluka mumzinda mule mbienda kaimira paphiri kukhundu yakumabulukiro dzuwa.

²⁴Mzimu wa Mulungu adandithukula mbandiendesa kuna anthu akhadakwatwa unyaperezo kudziko ya Babiloni ale. Penepi pikhachitika kumasomphenya adandionesera Mzimu wa Mulungu ale. Kubuluka penepo masomphenya ale adakungunuka.

²⁵Natenepo ndidapanga anthu akhadakwatwa unyaperezo ale pyonsene pikhadandionesa MBUYA pile.