Read cisena EZEKIELE 12 Bible Online

EZEKIELE 12 - cisena bible

EZEKIELE 12

¹MBUYA adalonga kuna ine mbati,

²“Iwe mwana munthu, iwe ukukhala pakati pa anthu akupandukira. Iwo ana maso, kwache nkhabe kwanisa kuona; iwo ana makutu, kwache nkhabe kwanisa kuva, thangwi iwo ngakupandukira.

³“Natenepo iwe mwana munthu, manga mitolo yako khala ninga nyakuthawa kwawo mbulamuke kwenda, uku dzuwa ikuswa miti. Munthu onsene mbakuone ukubuluka kwenda kumbuto inango. Mwinango anavesa podi kwene kuti iwo mbanthu akupandukira.[9]

⁴Uku dzuwa ikuswa miti, pontho uku iwo akuona maso, manga mitolo yako khala ninga nyakuthawa kwawo. Tenepo na mosiku uku iwo akuona maso, buluka kwenda pyako khala ninga anyakuthawa kwawo.

⁵Uku iwo akuona maso, phola benga pa fufu ya nyumbako mbubuluse pinthu pyako na pabengapo.

⁶Uku iwo akuona maso, thukula mitolo yako paphewa mbulamuke na mosiku, mwenemo wampsampsika nkhope yako, towera uleke kuona dziko ya kwanu. Pinachita iwepyo ntchidziwiso kucheuza nacho Aisraele.”

⁷Natenepo ine ndidachita ninga mudapangirwa ine. Uku dzuwa ikuswa miti ine ndidabulusa mitolo yanga khala ninga nyakuthawa kwawo. Na mawulo mwache ndidaphola benga pa fufu ya nyumbanga na manja mbandibulusa na penepo pinthu pyanga pyonsene. Na mosiku mwache ine ndidathukula mitolo yanga paphewa uku akuona maso mbindienda pyanga.

⁸Mangwana mwache na machibese MBUYA adalonga kuna ine mbati,

⁹“Iwe mwana munthu, na thangwi yakuti Aisraele akupandukirawa akukuvunza kuti pinachita iwepi ninji,

¹⁰apange kuti MBUYA Mulungu akulonga tenepa: ‘Mphangwa zenezi nsa mfumu wa mu Yerusalemu pabodzi pene na Aisraele onsene a mwenemo.’

¹¹Apange pontho kuti pyachita iwepi ntchidziwiso chakuacheuza nacho cha pinthu pinafuna dzaachitikira pile. Iwo anathawa kwawo mbakwatwa kwenda kudziko ya unyaperezo.

¹²“Mfumu, ule anaatonga, anathukula mitolo yache paphewa pache na mosiku mbathawa. Benga inampholwa pafufu kuti iye abuluke napo. Iye anapsampsira nkhope yache, towera aleke kwanisa kuona dziko ya kwawo.

¹³Ine ndinati ndimteyere msampha mbandimkwesha. Kubuluka penepo ndinamkwata kwenda naye ku Babiloni, dziko ya Akaladea, kwache iye nkhabe dzaiona tayu. Kweneko iye anafa.

¹⁴Ine ndinabalalisa kukhundu zonsene zinayi za dziko yapansi anthu onsene ambakhala m'khundu mwache, mathubu ache na anyankhondo ache; onsene ale ndinaathamangisa uku talasada ili chinjike pana iwo.

¹⁵“Iwo anapidziwa kuti ine ndine MBUYA, ndingaabalalisa pakati pa madzinza anango, pontho kumadziko anango.

¹⁶Kwache ndinasiya na moyo anthu anango pang'ono pakati pawo kubulukira pa nkhondo, njala, na utenda, towera kweneko pakati pa madzinza anango adzindikire kuti pinthu pikhachita iwo pikhali pyakunyansa pyakwanga. Penepo iwo anapidziwadi kuti ine ndine MBUYA.”

¹⁷MBUYA adalonga kuna ine mbati,

¹⁸“Iwe mwana munthu, pakudya utetemere, pontho pakumwa ugedemere na mantha.

¹⁹Longa kuna anthu a m'dzikomo kuti MBUYA Mulungu akulonga tenepa kuna anthu akukhala mu Yerusalemu na m'dziko ya Israele: Iwo anatetemera na mantha pakudya, pontho anataya mtima pakumwa madzi. M'dziko mwawo pinthu pyonsene pinavungwa mwakuti nkhabe dzakhala pinthu tayu, thangwi munthu onsene wakukhala mwenemo ngwakuzunguzika.

²⁰M'maluwani mule mwadzala anthu chinchino munati muvungwe, pontho midzi yawo inati isanduke thando yatchetcha. Tenepo anapidziwa kuti ine ndine MBUYA.”

²¹MBUYA adalonga kuna ine mbati,

²²“Iwe mwana munthu, mwambi wenewu ngwanji nawo umbalongwa m'dziko ya Israele kuti: ‘Nsiku zikugwanda basi, pontho pidalonga maprofeti pile nkhabe chitika tayu!’

²³Natenepo apange kuti MBUYA Mulungu akulonga tenepa: Mwambi wenewu ndinati ndiumalise, pontho hunalongwave tayu mu Israele. M'mbuto mwache apange kuti nsiku zili chifupi zakuti pyonsene pidalonga maprofeti pile pichitike!

²⁴“Thangwi pakati pa anthu a ku Israele nkhabe dzakhalave tayu masomphenya akunama, penu kuombedza pile pimbabausa anthu.

²⁵Ine MBUYA ndinati ndilonge pinafuna ine, pontho pinati pichitikedi mwakukhonda dembuka. Thangwi nsiku za moyo wanu, imwe dzinza yakupandukira, ndinachitisa kukwana-kwana pyonsene pyalonga ine. Ndalonga ndine MBUYA Mulungu.”

²⁶MBUYA adalonga kuna ine mbati,

²⁷“Iwe mwana munthu, Aisraele ambalonga kuti masomphenya ako anaona iwewa pinakwata pyaka pizinji pene kuti akwane-kwane, pontho na mphangwa zako zene zakulonga pya pinthu pinafuna dzachitika kutali m'tsogolo.”

²⁸Natenepo longa kuna iwo kuti, “MBUYA Mulungu akulonga tenepa: Mafala onsene alonga ine nkhabe dzadembuka tayu; pyonsene pyalonga ine pinakwana-kwana. Ndalonga ndine MBUYA Mulungu.”