Read cisena EZEKIELE 13 Bible Online

EZEKIELE 13 - cisena bible

EZEKIELE 13

¹MBUYA adalonga kuna ine mbati,

²“Iwe mwana munthu, longa mwakupokanyisana na maprofeti a Israele ale akupeka mphangwa zauprofeti. Longa kuna anthu ale ambalonga mphangwa za mumsolo mwawo kuti avesere mafala a MBUYA.

³Ine MBUYA Mulungu ndikulonga tenepa: Dzedze kuna maprofeti akupupwawa, ale ambapeka mphangwa zawo, pontho ale chipo hadaone masomphenya tayu.

⁴Imwe anthu a ku Israele, maprofeti anu ngakusowa basa ninga mibinzi yakukhala pakati pa madembe.

⁵Iwo hadakwire tayu m'mafufu kamangira anthu a ku Israele mwakugumuka, towera mpandawo uleke dzagwa pandzidzi wa nkhondo pansiku ya MBUYA.

⁶Masomphenya awo ngapezi-pezi, pontho kuombedza kwawo nkhwakunama. Iwo ambalonga kuti, ‘Alonga ndi MBUYA,’ mwenemo adaatuma si ine, MBUYA tayu. Kwache ambadikhira kuti mafala awo akwane-kwane!

⁷Mbwenye ndikulonga kuti masomphenya anaona imwe ngakunama, pontho kuombedza kumbachita imwe nkhwapezi-pezi. Imwe mumbalonga kuti, ‘Alonga ndi MBUYA,’ podi kwene kuti ine sidalonge namwe tayu.

⁸“Natenepo ine MBUYA Mulungu ndikulonga tenepa: Na thangwi ya mafalanu akunama pontho masomphenya anu akunamawo, ine ndina mseru na imwe. Ndalonga ndine MBUYA Mulungu.

⁹Ine ndinatchunyusa maprofeti ale ambaona masomphenya akunama, pontho na kuombedza pile pimbabausa anthu. Iwo nkhabe dzakhala pabodzi na anthu anga, penu kuwerengerwa panyandandanda wa banja ya Aisraele tayu, penu dzapita m'dziko ya Israele nkhabe. Penepo imwe munapidziwadi kuti ine ndine MBUYA Mulungu.

¹⁰“Ndimomwene, maprofeti ale akubausa anthu anga pakulonga kuti, ‘Mtendere,’ mwenemo mtenderewo nkhabemo, pontho pinamanga anthu mafufu akupotoka, iwo ambadza mbakhwaza ntoto.

¹¹Natenepo apange anyakukhwaza ntoto mafufu ale kuti mafufuwo anati agwe. Mvula yamphamvu inati ivumbe, pontho ndinagwisira matalala pa mafufuwo, pontho chonzi chinamenya mafufuwo.

¹²Mafufuwo angagwa, anthu nkhabe dzakuvunzani tayu kuti, ‘Apo ntoto udakhwaza imwe ule uli kupi?’

¹³“Natenepo ine MBUYA Mulungu ndikulonga tenepa: Na kuzhangali kwanga ndinagwisa chonzi, pontho na ukali wanga ndinagwisa mvula na matalala kuti pivunge mafufuwo.

¹⁴Mafufu akhwaza imwe ntoto ale, ndinati ndiagwise mbandiamwalaza, towera maziko ache asale nyimwa pakwecha. Iwo angagwa, imwe munati mumale vungika; penepo imwe munapidziwadi kuti ine ndine MBUYA.

¹⁵Natenepo ukali wanga ndinaukhuthulira pana mafufu na pana ale ene adaakhwaza ntoto. Ine ndinalonga kuna imwe kuti, ‘Mafufuwo avungwa, sasawambo na ale ene adaakhwaza ntoto,

¹⁶ale ndi maprofeti a ku Israele, ale akhalonga mphangwa zauprofeti kuna Yerusalemu mbaona masomphenya akuti panakhala mtendere, mwenemo mtenderewo nkhabemo tayu!’ Ndalonga ndine MBUYA Mulungu.

¹⁷“Chinchino iwe mwana munthu, pasa nkhodolo akazi pakati pa anthu ako ale akulonga mphangwa zauprofeti za mumsolo mwawo. Longa mwakupokanyisana nawo kuti

¹⁸MBUYA Mulungu akulonga tenepa: Dzedze kuna imwe akazi, ale ambamangirira mphinjiri m'mikono mwa anthu, mbasasanya pyakumpsampsikira nkhope kuti anthu a mathunga onsene avale, towera akweshe napyo moyo wa anthu. Ayi imwe mungakweshe moyo wa anthu anga mbamukoya moyo wanu?

¹⁹Imwe mwandilulupisa pamaso pa anthu anga, towera mugumane barele wakudzala m'manja pontho manyenyeswa a mikate. Imwe mumbapha anthu ale hadatheme kufa, mbamukoya na moyo anthu ale hadatheme kukhala na moyo tayu, pakunamiza anthu anga, ale ambakomerwa na kuvesera pyakunama.

²⁰“Natenepo ine MBUYA Mulungu ndikulonga tenepa: Ine ndimbanyansirwa na mphinjiri zanu zile zimbaphatisa imwe basa kukwesha nazo moyo wa anthu. Ine ndinazithumula m'mikono mwawo; ine ndinasudzula anthu anga adakwesha imwe ninga mbalame ale.

²¹Ndinang'amba pyakumpsampsira napyo nkhope pimbavazika imwe anthu anga, mbandiapulumusa m'manja mwanu, tenepo iwo nkhabeve dzakhala pansi pa utongi wanu tayu. Penepo imwe munapidziwa kuti ine ndine MBUYA.

²²Na kunama kwanuku mudachitisa anyakulungama kutaya mtima, ale ine nkhabe funa kuavunga tayu. Imwe mudawangisa mtima anthu akuipa kuthimiza kuchita pyakuipa pyawo, mbakhonda pulumusa moyo wawo.

²³Natenepo imwe nkhabe dzaonave masomphenya anu akunama penu kuombedza tayu. Ine ndinasudzula anthu anga kubulukira m'manja mwanu. Penepo munapidziwa kuti ine ndine MBUYA.”