Read cisena EZEKIELE 14 Bible Online

EZEKIELE 14 - cisena bible

EZEKIELE 14

¹Akadamu anango a Aisraele adadza kuna ine mbakhala pamaso panga.

²Natenepo MBUYA adalonga kuna ine mbati,

³“Iwe mwana munthu, anthu enewa aikha mitimawo pana mifanikizo, mbaikha maso awo pana pinthu pimbaadawisa pile. Ayi ine nkhuatawirisa basi kuvunza nzeru kuna ine?

⁴Natenepo longa kuna iwo mbuapange kuti ine MBUYA Mulungu ndikulonga tenepa: Ngakhala Muisraele onsene, ule aikha mtimache pana mifanikizo mbaikha maso ache pana pinthu pimbamdawisa pile, pontho ule lero akudza kuna mprofeti kumvunza nzeru, ine ene MBUYA ndinati ndimtawire, thangwi ya kuinjipa kwa mifanikizo imbapembedza iye ile!

⁵Ine ndinachita penepi, towera kubweza mitima ya Aisraele, ale adabauka kubuluka kuna ine kupembedza mifanikizo yawo.

⁶“Natenepo longa kuna dzinza ya Israele kuti ine MBUYA Mulungu ndikulonga tenepa: Lekani pyakudawa pyanu, mbamubwerere kubuluka kuna mifanikizo yanu, pontho kuleka pinthu pyakunyansa pimbachita imwe pile!

⁷“Ngakhala mbodzi wa Aisraele, penu mlendo wakukhala pakati pa Aisraele anabauka kubuluka kuna ine kuikha mtimache pana mifanikizo, pontho kuikha maso ache pana pinthu pimbamdawisa pile, kubuluka penepo mbavunza nzeru kuna mprofeti, ine ene MBUYA ndinati ndimtawire.

⁸Ine ndinati ndimpase nkhodolo. Anzache anati aonere iye. Ine ndinati ndimbuluse pakati pa anthu anga mbakhala chinthu chakusekesa. Penepo munapidziwa kuti ine ndine MBUYA.

⁹“Ngakhala mprofeti ananyengezwa mbalonga mphangwa zauprofeti, ndamnyengeza ndine ene MBUYA. Ine ndinati ndimtchunyuse na mkono wanga mbandimbulusa pakati pa anthu anga Israele.

¹⁰Onsene pabodzi pene mprofeti na ule ene anavunza nzeru kuna iye anatchunyuswa sasawa.

¹¹Penepo Aisraele nkhabe dzabaukave kubuluka kuna ine tayu, penu kupiswipisa okha ene na pyakudawa pyawo pyonsene. Iwo anakhala anthu anga, pontho ine ndinakhala Mulungu wawo. Ndalonga ndine MBUYA Mulungu.”

¹²MBUYA adalonga kuna ine mbati,

¹³“Iwe mwana munthu, ngakhala dziko inandidawira pakukhonda khulupirika kuna ine, ine ndinafuthula mkono wanga kuitchunyusa mbindifunga njira zache zakudzesera phoso. Ndinagwisa m'dzikomo njala ikulu ile inafuna dzapha anthu na nyama zawo zene.

¹⁴Podi kwene kuti amuna atatu awa, Nowa, Daniele, na Yobu mbadakhala kweneko, kulungama kwawo mbakudapulumusa kwene moyo wawo basi. Ndalonga ndine MBUYA Mulungu.

¹⁵“Penu ngakhala ndinatumiza nyama zam'tsanga kupha anthu m'dziko monsene, towera isanduke yakugoswa mwakuti nkhabe munthu na mbodzi ene anakwanisa kugwanda na mwenemo tayu,

¹⁶podi kwene kuti amuna atatu ale mbadakhala kweneko, ine ninga MBUYA Mulungu wamoyo ndikudumbira kuti iwo nee mbadakwanisa kupulumusa moyo wa anawo achimuna penu achikazi tayu. Iwo mbadakwanisa kwene kupulumusa moyo wawo ene basi, pontho dziko mbidasanduka thando yatchetcha. Ndalonga ndine MBUYA.

¹⁷“Penu ngakhala ndinadzesa nkhondo m'dzikomo mbandilonga kuti, ‘Nkhondo mbipuluze pinthu pyonsene m'dzikomo,’ pontho ngakhala ndinapha anthu onsene na nyama zawo zene,

¹⁸podi kwene kuti amuna atatu ale mbadakhala kweneko, ine ninga MBUYA Mulungu wamoyo ndikudumbira kuti iwo nee mbadakwanisa tayu kupulumusa moyo wa anawo achimuna penu achikazi, mbwenye kupulumusa moyo wawo ene basi.

¹⁹“Penu ngakhala ndinagwisa muliri m'dzikomo, pontho kukhuthulira ukali wanga pana dzikoyo pakuchuchisa chiropa, kupha anthu na nyama zawo zene,

²⁰podi Nowa, Daniele, na Yobu mbadakhala penepo, ine ninga MBUYA Mulungu wa moyo ndikudumbira kuti iwo mbadakwanisa kupulumusa nee moyo wa anawo achimuna penu achikazi tayu, mbwenye kupulumusa moyo wawo ene basi thangwi ya kulungama kwawo.”

²¹MBUYA Mulungu akulonga tenepa: “Apo pinakhala pyakunyanya tani ndingatumiza pinthu pyakugoswa pinayi kutchunyusa napyo anthu mu Yerusalemu, nkhondo, njala, nyama zam'tsanga, na muliri, kupha anthu na nyama zawo zene.

²²Kwache panakhala anango akusalira na moyo, ana achimuna na achikazi ene anafuna dzabuluka mwenemo. Iwo anabwera kuna imwe, tenepo mungaona makhaliro na mabasawo akuipa, munadzindikira kuti ndachita chilungamo pakumtchunyusa Yerusalemu, nyatwa zonsene zidadzesa ine kuna iye.

²³Mungaona makhaliro na mabasawo akuipa, penepo munapidziwa kuti ine sidachite kwene penepi pezi pene tayu. Ndalonga ndine MBUYA Mulungu.”