Read cisena EZEKIELE 16 Bible Online

EZEKIELE 16 - cisena bible

EZEKIELE 16

²“Iwe mwana munthu, sumulula Yerusalemu thangwi ya pinthu pyakunyansa pyachita iye

³mbulonge kuti ine MBUYA Mulungu ndikulonga tenepa kuna Yerusalemu: “Kanani ndi dziko ya makolo ako, pontho iwe udabalirwa kweneko. Babako akhali wa Chiamori pontho mako akhali wa Chihiti.[10]

⁴Pidabalwa iwe, nkhabe munthu adagwanda tchombo yako tayu, penu kukusambisa, penu kukukhwaza munyu, penu kukukukutiza mwadidi na nguwo tayu.

⁵Nkhabe na mbodzi ene adakuvera nsisi mbava nawe nyambalo kukuchitira chibodzi mwa pinthu penepi tayu. M'mbuto mwache pidabalwa iwe, udaponywa kunja kuminda, thangwi adanyansirwa nawe.

⁶“Tenepo ine ndidagwanda pyanga chifupi na penepo mbindikuona iwe ukuvidzula-vidzula m'chiropa chako. Pikhasamba iwe chiropa, ine ndidalonga kuna iwe kuti, ‘Khala na moyo.’

⁷Ine ndidakuchitisa kukula ninga mmera. Iwe udakula mbusanduka mtsikana wakubalika pyakwanga. Mabele ako adaimira mwadidi mwene, pontho tsisi yako ikhali yakulapha mwadidi, iwe ule kale ukhali chipezi-pezi pontho chitakwa-takwa.

⁸“Ndidagwanda pontho na penepo, tenepo pidaikha ine maso anga pana iwe, ndidaona kuti ndiwe wathunga ene kuti ndinakwanisa kugwa nawe maya. Ndidakuvazika chakufinika changa kubisa pezi pako. Ine ndidakuvunzira mbandichita nawe chiverano cha banja, natenepo udasanduka wanga ene. Ndalonga ndine MBUYA Mulungu.

⁹“Kubuluka penepo ndidakusambisa kubulusa chiropacho mbandikudzoza mafuta.

¹⁰Ine ndidakuvazika nguwo zakulukwa mwadidi, pontho nkhwaira za nthembe yadidiletu. Ndidakuvazika nguwo zakuchena mbandikufinikiza nguwo zakudula.

¹¹Ndidakuvazika pontho pyakukuthemesera pinango. Ndidakuvazika pibangili mumkono mwako, pontho mkufu m'khosi mwako.

¹²Ndidafeka nthona pamphuno pako, pontho mphete m'makutu mwako mbandikumanga dunku yakubalika mumsolo mwako.

¹³Ndidakuthemesera na golidi pontho siliva; nguwo zako zikhali zakuchena, zakudula pontho zakulukwa mwadidi. Pyakudya pyako pikhali pyakusasanywa na ufa wadidi, uchi na mafuta aolivi. Iwe udasanduka wakubalika pyakwanga, mbukhala matsano.

¹⁴Iwe udaveka konsene kwene kuna madzinza onsene thangwi ya kubalika kwako, pontho demelero idakupasa ine ile idakuchitisa kuoneka wakubalika monsene mwene. Ndalonga ndine MBUYA Mulungu.

¹⁵“Kwache iwe udanyadira kubalika kwako mbuphatisa basa kuveka kwako kusanduka puta. Iwe ukhachita uputa na munthu onsene wakugwanda pyache na njira.

¹⁶Iwe udaphatisa basa nguwo zako zinango kuthemesera mbuto zako zakupembedzerapo milungu mbuchitirapo uputa. Pinthu ninga penepi chipo nee pidzati chitika, pontho nee pinachitikave tayu.

¹⁷Iwe pontho udakwata pyakuthemesera napyo manungo pidakupasa ine pile, pyakusasanywa na siliva na golidi pile, mbupisasanyira wekha ene adzimunthu amuna kukhala milungu, m'nduli mwache udachita nawo pyakuzuda.

¹⁸Iwe udakwata nguwo zakulukwa mwadidi zidakupasa ine zile, mbuzivazika adzimunthuwo. Tenepo udapereka kuna ipyo mafutanga aolivi na pyakufukiza pyakununkhira ninga nsembe.

¹⁹Phoso idakupasa ine kuti udye, ufa wadidi, mafuta aolivi, na uchi, iwe udapipereka pyako ninga nsembe zakhwema yadidi kuna milunguyo. Penepi ndiye pidachita iwe. Ndalonga ndine MBUYA Mulungu.

²⁰“Iwe udakwata anako achimuna na achikazi ene adandibalira iwe ale mbuapereke ninga nsembe yakudya kuna milunguyo. Ayi uputa ukhachita iwewo hudakukwane tayu?

²¹Iwe udacheka ananga mbuapereka nsembe kuna milunguyo.

²²Pyakunyansa pyonsene pikhachita iwe, pontho na uputa onsene ukhachita iwe, iwe hudakumbuke tayu nsiku za utsikanako pikhali iwe chipezi-pezi pontho chitakwa-takwa, kuvidzula-vidzula m'chiropa chako kukhachita iwe kule.

²³“Dzedze! Dzedze kuna iwe. Ndalonga ndine MBUYA Mulungu! Kuthimizira papyakudawika pyako pinango pyonsene pyachita iwe,

²⁴iwe udapisasanyira mbuto yakupembedzerapo milungu, pontho kuchita uputa m'khundu-khundu mwa njira zonsene.

²⁵Pamphambano ponsene iwe udasasanya mbuto zakupembedzerapo milungu mbululupisa kubalika kwako penepo pakupereka manungo ako kuna munthu onsene wakugwanda pyache na njira mbunyanya kuchita uputa.

²⁶Anthu a ku Iguputo iwe udachita nawo pyauputa, atsanthembako achimaso-maso ale. Penepo udandizhangalisa, thangwi udanyanya kuchita uputa.

²⁷“Natenepo ine ndidafuthula dzanjanga kukutchunyusa mbandichepesa madire ako; ndidakuperekani m'manja mwa Afilisti, ambakuzonda, pontho adatutumuka na makhaliro ako akunyansa ale.

²⁸Iwe udachita pontho uputa na Aasiria, thangwi pikhumbo pyako pidainjipa; podi kubuluka penepo, ipyo hapidakukwane tayu.

²⁹Tenepo udathimiza basi kuchita uputa na Ababiloni, dziko ya anyamalonda, mbwenye podi kwene kuti pikhali tenepo, iwe nee udakwane napyo tayu.”

³⁰MBUYA Mulungu akulonga kuti, “Iwe mtimako ngwakukwatika msanga! Iwe udachita pinthu pyonsenepi ninga puta wakusowa manyadzo.

³¹Iwe udapisasanyira mbuto yakupembedzerapo milungu, pontho kuchita uputa m'khundu-khundu mwa njira zonsene. Kwache iwe nee ukhachita ninga mumbachitira maputa anango, thangwi iwe nee ukhafuna kupagalwi tayu.

³²“Iwe mkazi okhonda khulupirika! Iwe umbafuna amuna achilendo kupiringana mamunako chadi-chadi.

³³Puta onsene ambapagalwi na mamuna onsene anagona na iye, mbwenye iwe umbapereka mitukwa kuna pibwenji pyako pyonsene kuanyengerera kuti adze kuna iwe kubulukira konsene kwene dzagona nawe.

³⁴Natenepo uputako wasiyana na uputa wa anango; pakhali nkhabe na mbodzi ene akhachita kukuvunzira kuti ugone naye. Iwe ndiwe wakusiyanadi na anango, thangwi umbaapagali amunawo ndiwepo mbukhonda pagalwi na kobiri ene.

³⁵“Natenepo iwe puta, vesera pinalonga MBUYA!

³⁶MBUYA Mulungu akulonga tenepa: Na thangwi ya pikhumbo pyako pyakuipa, pontho kupionesa kwako pezi pakugonana na pibwenji pyako, pontho na thangwi ya mifanikizo yako yonsene yakunyansa, pontho na kupereka chiropa cha anako kuna milungu ninga nsembe,

³⁷natenepo ine ndinati ndigumanyise pibwenji pyako pyonsene pimbakomerwa na iwe pile, pile pimbafuna iwe na pile pene pimbazonda iwe. Ine ndinati ndiagumanyise onsenewo kubulukira konsene kwene mwakupokanyisana nawe mbandikudula nguwo zako pamaso pawo, tenepo iwo anakuona pezi.

³⁸Ine ndinati ndikutchunyise ninga mumbatchunyusirwa maputa pontho mphandu. Thangwi ya ntchanje yanga ndinakupha mwakuzhangali pyakwanga.

³⁹Ine ndinakupereka m'manja mwa pibwenji pyakopyo, tenepo ipyo pinavunga mbuto zako zakupembedzerapo milungu pontho zakuchitirapo uputa zile. Ipyo pinakudula nguwo zako na pyakuthemesera pyako mbusiyiwa chipezi-pezi pontho chitakwa-takwa.

⁴⁰Iwo anakudzesera gulu ya anthu ale anafuna dzakuponyera miyala, pontho anakugwanda-gwanda m'mapindi na matalasadawo.

⁴¹Ipyo pinapisa nyumba zako mbapikutchunyusa pakwecha mwenemo akazi azinji akuona maso. Ine ndinamalisa uputako, tenepo iwe nkhabe dzapagali pontho pibwenji pyako tayu.

⁴²Penepo ukali wanga pana iwe unambombowa, pontho ntchanje yanga inamala; mtimanga unakhala pansi mbandikhonda kukuzhangalira pontho tayu.

⁴³“Na thangwi yakuti iwe udaduwalira nsiku za utsikanako mbundizhangalisa na pinthu pyonsene pyachita iwe, ine ndinati ndipiikhe pamsolo pako pyonsene pyachita iwe. Ayi iwe hudathimize tayu kuchita pyakuzuda padzulu papinthu pinango pyonsene pyakunyansa pikhachita iwe pile? Ndalonga ndine MBUYA Mulungu.”

⁴⁴MBUYA akulonga kuti, “Iwe Yerusalemu, anthu analonga pya iwe mwambi wakuti, ‘Mwana ambaonera pimbachita mache.’

⁴⁵Iwe ndiwe mwana chadi-chadi wa mako, ule adakhondambo mamunache na anache ene; iwe ndiwe nana chadi-chadi wa abale ako, ale adakhondambo amunawo na anawo. Mako akhali wa Chihiti, babakombo akhali wa Chiamori.[11]

⁴⁶Nanako akhali Samaria, ule akhakhala kumpoto kwako pabodzi pene na anache achikazi, pontho nyamsolo wako, ule akhakhala kumwera kwako, akhali Sodomu.

⁴⁷Iwe hudateweze kokha njira zawo, penu kutsanzira makhaliro awo akunyansawo tayu, mbwenye pidagwanda ndzidzi pang'ono, makhaliro ako onsene adanyanyiratu kuipa kupiringana iwo.”

⁴⁸MBUYA Mulungu adalonga mbati, “Ine ninga Mulungu wamoyo ndikudumbira kuti nyamsolo wako Sodomu na midzi yakumzungulira hadachite pyakuipa ninga pyachita iwe na ananakopi tayu.

⁴⁹Natenepo pyakudawa pya nanako Sodomu mphipi: Iye na midzi yakumzungulira akhali akutumbama, akhadya pyadidi, mbakhala pakutonthola: iwo hadatsalakane pya anyakutcherenga na anyakusowa tayu.

⁵⁰Iwo akhali akunyada mbachita pinthu pyakunyansa pamaso panga. Ndi thangwi yache ine ndidaavunga ninga pinaona imwe chinchinopi.

⁵¹Samaria hadachite na jada ene ya pyakudawa pyachita iwepi tayu. Iwe ndiye wanyanya kuchita pinthu pyakunyansa kupiringana iye, pontho wachitisa abale ako kuoneka ninga mbwenye na pinthu pyakunyansa pyonsene pyachita iwepi.

⁵²Natenepo ndiwe wathema kuchita manyadzo, thangwi wachitisa abale ako kuonekambo ninga akulungama kusiyana na iwepo. Na thangwi yakuti pyakudawa pyako ndiye pidanyanya kuipa kusangiza na pyawo, iwo akuoneka ninga akulungama kupiringana iwepo. Natenepo chita manyadzo mbukule msolo, thangwi iwe wachitisa mbale ako akuoneka ninga mbwenye.”

⁵³MBUYA akulonga kuna Yerusalemu kuti, “Kwache ndinati ndichitise pinthu pya Sodomu na midzi yakumzungulira, pontho pya Samaria na midzi yakumzungulira kufamba pontho mwadidi. Na iwe enembo ndinati ndichitise pinthu pyako kufamba pontho mwadidi,

⁵⁴towera iwe udzachite manyadzo, pontho kukula msolo na pinthu pyonsene pyachita iwe kuonesa kuti abale ako ndi mbwenye kusiyana na iwe.

⁵⁵Kulonga pya abale ako, Sodomu na midzi yakumzungulira pontho Samaria na midzi yakumzungulira, anati abwerere ninga montho mukhali iwo kale; iwembo na midzi yakukuzungulira munati mubwerere ninga montho mukhali iwe kale.

⁵⁶Ayi si iwe tayu adasedegula Sodomu nsiku zile zikhanyada iwe,

⁵⁷mwenemo pyakuipa pyako pidzati onekera tayu pakwecha? Lero wakhalambo ninga iye, kusanduka chakusekesa kuna Aedomu, na atsanthembako onsene pontho na Afilisti, onsene anyakukuzungulira ambakululupisa ale.

⁵⁸Iwe wathema kuona nyatwa thangwi ya pyakuzuda, pontho pyakunyansa pyachita iwe. Ndalonga ndine MBUYA Mulungu.”

⁵⁹MBUYA Mulungu adalonga mbati, “Ine ndinati ndichite kuna iwe mwakuthemerana na pinthu pidachita iwe, thangwi iwe walulupisa kudumbira kudachita ine pakuswa chiverano.

⁶⁰Kwache ndinati ndikumbuke chiverano chidachita iwe na ine, mwenemo mbuli mtsikana. Ndinati ndikhazikise nawe chiverano chokhonda mala.

⁶¹Tenepo iwe unakumbuka makhaliro ako akale mbuchita manyadzo kutambira pontho mbaleako wamkulu na wamng'ono ene. Ine ndinaapereka kuna iwe ninga anako achikazi, kwache nee na thangwi ya chiverano chidachita iwe na ine chile tayu.

⁶²Ndinati ndikhazikise chiverano changa na iwe, pontho unapidziwa kuti ine ndine MBUYA.

⁶³Ine ndinakulekerera pyakudawa pyako pyonsene, kwache unapikumbuka mbuchita napyo manyadzo mwakuti iwe nkhabe na kufuna kwene kupilonga tayu. Ndalonga ndine MBUYA Mulungu.”