Read cisena EZEKIELE 17 Bible Online

EZEKIELE 17 - cisena bible

EZEKIELE 17

¹MBUYA adalonga kuna ine mbati,

²“Iwe mwana munthu, longa nthanthi kuna dzinza ya Israele, pontho uphatise basa msangani.

³Longa kuna iwo kuti MBUYA Mulungu akulonga tenepa: Pidachitwa na mphamba ukulu wakukhala na maphaphido amphamvu, manthenga akulapha akudzala na mathotho akusiyana-siyana, ule udadza ku Lebanoni. Iwo udakaula nsonga ya muti yamkungudza,

⁴iwo udakhwadzula mphukira yakunsongalonga mbaithukula kwenda nayo kudziko ya malonda. Kweneko adaitcheka mumzinda wa anyamalonda.

⁵“Kubuluka penepo iwo udakwata mbewu pang'ono kubulukira m'dzikomo. Iwo adaibzala m'mataka adidi ninga mkotamu m'khundu-khundu mwa madzi.

⁶Mbewuyo idamera mbisanduka mtawi wakuwanga mwadidi. Nthambi zache zidatanthawira m'dzulu kukhali mphamba ule, pontho mitsitsi yache idapita pansi. Tenepo mtawi ule udasanduka ukulu ene mbugudumira.

⁷“Pakhali pontho mphamba unango ukulu wakukhala na maphaphido amphamvu na manthenga akulapha. Ndzidzi wenewu mtawi ule udayang'anisa mitsitsi yache kukhali mphamba ule, kubulukira pa mbuto pakhadabzalwa iwo pale, pontho udatanthawirisa nthambi zache kuna iwo kufuna kuti umpase madzi.

⁸Kwache mtawi ule ukhadabzalwa kale m'mataka akubalisa pinthu, m'khundu-khundu mwa madzi, towera ugudumire, kubala nsapo, pontho kukhala mtawi wadidiletu.

⁹“Longa kuna iwo kuti MBUYA Mulungu akulonga tenepa: Ayi mtawi wenewu unakuladi mwadidi? Ayi mphamba wakutoma anaudula tayu mbaupuluza nsapo zache, towera mtawiwo uunyale pyawo? Mphukira zache zachinchino zonsene zinaunyala. Mtawi ule nkhabe funika anyamphamvu penu anthu azinji ene kuti audule tayu.

¹⁰Podi kwene kuti mbudachita kutchekwa panango pene, ayi iwo mbudakula mwadidi? Ayi mbudadudumuka monsene mwene pidamenya mphepo yakumabulukiro dzuwa, kududumuka pambuto padabzalwa iwo pale tayu?”

¹¹Tenepo MBUYA adalonga kuna ine mbati,

¹²“Longa kuna dzinza yakupandukirayi kuti, ‘Ayi imwe nkhabe dziwa tayu kuti msangani wenewu ukulonganji?’ Longa kuna iwo kuti mfumu wa ku Babiloni adenda ku Yerusalemu mbakwata unyaperezo mfumu na mathubu ache kwenda nawo ku Babiloni.

¹³Iye adakwata mbodzi wa m'banja yachifumu mbachita naye chiverano pakumdumbirisa. Iye adakwata pontho anthu akuveka a m'dzikomo,

¹⁴towera ufumuwo umale mphamvu mbukhonda dzalamuka pontho, mbukhalapo thangwi ya kukoya chiverano chile.

¹⁵Mbwenye mfumu wa Yuda adampandukira pakutumiza aimiriri a dziko kuna mfumu wa Iguputo, towera akakwate akavalo pontho na gulu ikulu ya anyankhondo. Ayi penepi pinamchitisa kupikwanisa? Ayi iye ule ambachita pinthu penepi anakwanisa kupulumuka? Ayi iye anakwanisa kuswa chiverano mbathawa?

¹⁶“Ine MBUYA Mulungu ndikulonga kuti ine ninga Mulungu wamoyo ndikudumbira kuti mfumu weneyu anati akafere ku Babiloni, thangwi iye adaswa kudumbira kwache na chiverano chidachita iye na mfumu wa ku Babiloni, ule adampitisa ufumu.

¹⁷Mfumu wa ku Iguputo na anyankhondo ache amphamvu nkhabe dzamphedza tayu pankhondo yeneyi, ndzidzi unafuna dzamulukwa mataka kutsamira mpanda, pontho kumanga nsanja za anyankhondo kuzungulira mizinda ya Yuda, towera apuluze anthu azinji ene.

¹⁸Iye adalulupisa kudumbira kudachita iye pakuswa chiverano. Na thangwi yakuti iye akhadadumbira kukhala wakuvera, kwache adachita pinthu pyonsenepi, tenepo iye nkhabe dzapulumuka tayu.”

¹⁹MBUYA Mulungu adalonga mbati, “Ine ninga Mulungu wamoyo ndikudumbira kuti ndinati ndimtchunyuse thangwi adalulupisa chiverano chidadumbira iye na dzinanga.

²⁰Ine ndinamzungulira na kokota mbakweshwa na msampha. Ine ndinamdzesa ku Babiloni mbandimtchunyusa kweneko, thangwi ya kukhonda kwache khulupirika kuna ine.

²¹Anyankhondo ache onsene anafuna dzathawa ale anamala kuphiwa pankhondo, pontho anyakusalira na moyo anabalaliswa kunkhomo zonsene zinayi za dziko yapansi. Penepo imwe munapidziwa kuti ndalonga ndine MBUYA Mulungu.”

²²MBUYA Mulungu akulonga tenepa: “Ine ene ndinagwedula mphukira kubulukira pa nsongalonga pa muti wamkungudza mbandiitcheka; ndinakaula nthambi itete mbandikaitcheka pansonga ya phiri yakulapha.

²³Padzululetu pa mapiri a Israele ndiye panafuna ine kaitcheka; iyo inamera nthambi, pontho kubala nsapo mbusanduka mkungudza wakukoma m'maso. Mbalame zamtundu na mtundu zinamanga pisa pyawo mwenemo; izo zinagumana mthunzi munthambi zachezo.

²⁴Miti yonsene ya m'dzikomo inadziwa kuti ndine MBUYA ndimbagwanda miti yakulapha mbindichitisa miti ing'ono-ing'ono kulapha. Ine ndimbaunyalisa miti yakubiriwira mbandichitisa miti yakududumuka kubiriwira. Ndalonga ndine MBUYA, pontho ndinati ndipichitedi.”