Read cisena EZEKIELE 18 Bible Online

EZEKIELE 18 - cisena bible

EZEKIELE 18

¹MBUYA adalonga kuna ine mbati,

²“Ayi imwe anthu munafuna kulonganji, pakuphatisa basa mwambi ufu kulonga pya dziko ya Israele: ‘Makolo adadya nsapo zakujuja, kwache mano a ana ndiye adazirizwa?’ ”

³MBUYA Mulungu adalonga mbati, “Ine ninga Mulungu wamoyo ndikudumbira kuti imwe nkhabe dzaphatisave basa mwambi wenewu tayu mu Israele.

⁴Thangwi munthu onsene ana moyo ngwanga; baba munthu na mwana ene, onsene pabodzi nganga. Nyakudawa onsene ndiye athema kufa.

⁵“Tisangize kuti pana nyakulungama, ule ambachita pyakulungama pontho pyadidi.

⁶Iye nkhabe kwenda kadya pambuto zakupembedzerapo milungu pamapiri, penu kupembedzambo nawo mifanikizo ya dzinza ya Israele. Iye nkhabe chita pyakuzuda na mkazi tsanthembache, penu kugona na mkazi wakumwezi.

⁷Iye nkhabe pondereza na munthu ene tayu, mbwenye iye ambabwezera chinthu chidakwata iye pinyolo; iye nkhabe bera munthu tayu, mbwenye ambapasa pyakudya anyanjala mbapereka pyakuvala kuna anyakupisowa.

⁸Iye nkhabe chitisa katapira tayu angafiyalisa, penu kufiyalisa ninga mumbachitira anyamalonda. Iye ambakhondesa manjache kuchita pyakudawika mbatonga na chilungamo mseru wa pakati pa munthu na mwanzache.

⁹Iye ambavera mwambo wanga, mbachita mphole-mphole kuteweza matongero anga. Munthu ninga weneyu ngwakulungama; iye anati akhale na moyo. Ndalonga ndine MBUYA Mulungu.”

¹⁰“Tisangiza kuti munthu weneyu ana mwanache, ule ambapha na kuba, pontho kuchita pinthu pinango pyakuipa ninga penepi,

¹¹pinthu pyakuti chipo babache hadzati kupichita tayu. Iye ambaenda kadya pambuto zakupembedzerapo milungu pamapiri. Iye ambachita pyakuzuda na mkazi tsanthembache.

¹²Iye ambapondereza anyakutcherenga na anyakusowa. Iye ambaba. Iye nkhabe bwezera pinthu pidakwata iye pinyolo. Iye ambaenda kumbuto zakupembedzerapo mifanikizo. Iye ambachita pinthu pyakunyansa.

¹³Iye ambachitisa katapira. Iye ambafiyalisa ninga mumbachitira anyamalonda. Ayi munthu ninga weneyu athema kukhala na moyo? Nkhabe tayu! Na thangwi yakuti iye achita pinthu pyonsene pyakunyansapi, iye anati aphiwe chiropa chache mbachidzagwera pamsolo pache.

¹⁴“Kwache tisangize weneyumbo ana mwana wamamuna, ule ambaonera babache akuchita pyakudawa pyonsenepi, kwache podi kwene kuti iye ambaonera pinachita babacheyo, iye nkhabe kupitsanzira tayu.

¹⁵“Iye nkhabe kwenda kadya pambuto zakupembedzerapo milungu pamapiri, penu kupembedzambo nawo mifanikizo ya dzinza ya Israele. Iye nkhabe chita pyakuzuda na mkazi tsanthembache.

¹⁶Iye nkhabe pondereza na munthu ene tayu, mbwenye iye ambabwezera chinthu chidaphatira iye pinyolo; iye nkhabe bera munthu tayu, mbwenye ambapasa pyakudya anyanjala mbapereka pyakuvala kuna anyakupisowa.

¹⁷Iye ambakhondesa manjache kuchita pyakudawika, iye nkhabe kuchitisa katapira tayu, penu kufiyalisa ninga mumbachitira anyamalonda. Iye ambavera mwambo wanga, mbachita mphole-mphole kuteweza matongero anga. “Iye nkhabe dzafa tayu thangwi ya kudawa kwa babache; iye anati akhale na moyo.

¹⁸Mbwenye babacheyo anati afe, thangwi ya kupondereza anango, kubera mwanzache, pontho kuchita pinthu pyakuipa kuna anthu onsene.

¹⁹“Kwache imwe mumbavunza kuti, ‘Thangwi yache ninji kuti mwana aleke tchunyuswa thangwi ya pyakudawa pya babache?’ Podi mwanayo achita pinthu pyakulungama pontho pyakuthema mbachita mphole-mphole kutewera matongero anga, iye anati akhale na moyo.

²⁰Nyakudawayo ndiye athema kufa. Mwana hadatheme tayu kutchunyuswa thangwi ya pyakudawa pya babache, penu babambo kutchunyuswa thangwi ya pyakudawa pya mwanache. Kulungama kwache munthu ndiye kunafuna iye dzafupwa nako, pontho kuipa kwache munthu ndiye kunafuna iye dzatchunyuswa nako.

²¹“Mbwenye ngakhala nyakuipa analeka chita pyakudawa pyonsene pyachita iye mbakoya mwambo wanga, pontho kuchita pyakulungama pontho pyakuthema, iye anati akhale na moyo; iye hanafa tayu.

²²Pyakudawa pyache pyonsene pyachita iye pinalekererwa. Na thangwi ya pyakulungama pyonsene pyachita iye, anati akhale na moyo.

²³Ayi ine ndimbakomerwa na imfa ya munthu wakuipa? Nkhabe! Ndalonga ndine MBUYA Mulungu. Nkhabe tayu, ine ndimbakomerwa nyakudawa angaleka pyakudawa pyache mbakhala na moyo.

²⁴“Mbwenye ngakhala nyakulungama analeka chita pyakulungama mbatoma kuchita pyakuipa, mbachita pinthu pyakunyansa pimbachita anyakuipa pile, ayi weneyo athema basi kukhala na moyo? Pinthu pyakulungama pyonsene pyachita iye nee chibodzi chinawerengerwa tayu. Na thangwi ya kukhonda khulupirika kwache, iye adawa pontho thangwi ya pyakudawa pyachita iyepyo, iye anati afe.

²⁵“Kwache imwe mumbalonga kuti, ‘Njira zache MBUYA si zakulungama tayu.’ Ngavani kuno imwe Aisraele: Ayi njira zanga nsakukhonda lungama? Ayi zakupotoka si njira zanuzo tayu?

²⁶Ngakhala nyakulungama analeka chita pyakulungama mbatoma kuchita pyakuipa, iye anati afe thangwi ya kudawa kwacheko; na thangwi ya pyakuipa pyachita iye, iye anati afe.

²⁷Mbwenye ngakhala nyakuipa analeka pyakudawika pyonsene pyachita iye mbachita pyakulungama pontho pyadidi, iye anati apulumuse moyo wache.

²⁸Podi iye adzindikira pyakuipa pyachita iye mbapileka, iye anati akhale na moyo; iye nkhabe dzafa tayu.

²⁹Kwache dzinza ya Israele imbalonga kuti, ‘Njira za MBUYA si zakulungama tayu?’ Ayi imwe dzinza ya Israele, njira zanga si zakulungama tayu? Ayi zakupotoka si njira zanuzo tayu?

³⁰“Natenepo imwe dzinza ya Israele, ine ndinakutongani mseru, kada munthu malingana na mabasache! Ndalonga ndine MBUYA Mulungu. Lekani pyakudawa pyanu! Zungunukani kubuluka kuna pyakuipa pyachita imwe; penepo kudawa nkhabe dzakuvungani tayu.

³¹Pikhondeseni mwekha ene kuchita pyakuipa pyamtundu onsene mbamukhale na mtima utswa pontho na mzimu wachinchino. Thangwi yache ninji imwe Aisraele munafuna kufa?

³²Thangwi ine nkhabe komerwa tayu kuti munthu na mbodzi ene afe. Lekani pyakudawa pyanu mbamukhale na moyo! Ndalonga ndine MBUYA Mulungu.”