Read cisena EZEKIELE 19 Bible Online

EZEKIELE 19 - cisena bible

EZEKIELE 19

¹MBUYA andipanga kuimba nyimbo ya maliro kulonga pya atongi a Israele

²kuti: “Mako akhalidi ninga nkhalamu ikazi pakati pa nkhalamu. Iye akhagona pakati pa ana a nkhalamu mbalera mwadidi anache.

³Iye adakuza mwanache mbodzi, tenepo mwanayo adasanduka nkhalamu yamphamvu. Iye adafunziswa kuphata nyama, pontho akhadya anthu.

⁴Madzinza adava pya iye, mbamkwesha na mulindi. Na ngoloweko iwo adamkwekwetera kudziko ya Iguputo.

⁵“Pidaona nkhalamu ikazi ile kuti pikhadikhira iye pyachimwanika, chidikhiro chache chonsene chidamala kwenda; iye adakwata pontho mwanache unanago mbamsanduza nkhalamu yamphamvu.

⁶Iye adafamba na nkhalamu zinzache, thangwi iye adasanduka nkhalamu yamphamvu. Iye adafunziswambo kuphata nyama, pontho akhadya anthu.

⁷Iye adagwisa mbuto zawo zakutchingwa na mpanda, mbasakaza maluwani. Dziko na anthu akhakhala mwenemo ale, adaphatwa na mantha na kubangula kwache.

⁸Madzinza adadza dzachita naye nkhondo, ale adadza kubulukira kunthemba zonsene zakuzungulira. Iwo adamteyera misamphawo tenepo iwo adamkwesha na mulindi wawo.

⁹Na ngoloweko yawo iwo adampitisa m'thanga mbadza naye kuna mfumu wa ku Babiloni mbamuikha m'perezo, tenepo kubangula kwache hakudavekeve tayu pamapiri a Israele.

¹⁰“Mako akhali ninga mtawi m'munda wamfesa wakubzalwa m'khundu-khundu mwa mkulo; ukhali na nsapo zizinji pontho wakugudumira thangwi ya kuinjipa kwa madzi.

¹¹Nthambi zache zikhali za mphamvu zakuthema kusasanyira ndodo ya mfumu. Iwo udalapha pyakwanga mbubulukira kunja kupiringana pyakumera pinango, ukhaoneka pyadidi thangwi ya kulapha kwache pontho na kuinjipa kwa nthambi zache zizinji.

¹²Kwache iye adaudula mwakuzhangali mbaugwisa pansi. Iwo udauma thangwi ya mphepo yakumabulukiro dzuwa, nsapo zache zidamala puluzika; nthambi zache zamphamvu zidamala kuuma tenepo moto udamala kuupisa.

¹³Chinchino wabzalwa m'thando yatchetcha, m'dziko yakusowa madzi.

¹⁴Moto udafalikira kubulukira kunthambi yache ikulu mbupisa nsapo zache zonsene. Nthambizo nkhabeve dzakhala zakuwanga tayu Nkhabeve nthambi yamphamvu na ibodzi ene idasalira yakuthemerana na kusasanyira ndodo ya mfumu tayu.” Yeneyi ndi nyimbo ya maliro, ile imbaimbwa kawiri-kawiri.