Read cisena EZEKIELE 2 Bible Online

EZEKIELE 2 - cisena bible

EZEKIELE 2

¹Iye adalonga kuna ine mbati, “Iwe mwana munthu, lamuka mbuimire na manyalo ako, tenepo ine ndinalonga nawe.”

²Pikhalonga iye, Mzimu wa Mulungu adapita muna ine mbandiimirisa dzololo, tenepo ndidamva akulonga kuna ine.

³Iye adalonga mbati, “Iwe mwana munthu, ine ndikukutuma kuna Aisraele, dzinza ya anyakupandukira ile; iwo na makolo awo andidawira mpakana lero.

⁴Kunakutuma ine kule anthu ache ngakuuma mtima pontho akuchimwanika. Natenepo kalonge kuna iwo kuti, ‘MBUYA Mulungu akulonga tenepa.’

⁵Podi kwene iwo akavesere penu akakhonde kuvesera (thangwi iwo ndi dzinza yakupandukira) kwache anati apidziwe kuti pakati pawo pakhali mprofeti.

⁶Kulonga pya iwe, mwana munthu, leka chita nawo mantha, penu kugopa mafala analonga iwo ale. Leka chita mantha, podi kwene kuti iwe wazungulirwa na ntcheswa na nyakhanche, pontho kuti ukukhala pakati pa akong'a. Kwache leka chita mantha na pinthu pinalonga iwo, penu kugoswerwa napyo, thangwi iwo ndi dzinza yakupandukira.

⁷Iwe wathema kulonga mafalanga kuna iwo, podi kwene avesere, penu akhonde kuvesera, kumbuka kuti iwo mbanthu akupandukira.

⁸Mbwenye kulonga pya iwe, mwana munthu, vesera pinakupanga inepi. Leka khalambo wakupandukira ninga dzinza yeneyi; yashamula mbudye pinafuna ine kukupasa.”

⁹Tenepo ndidayang'ana mbandiona dzanja ikuthambidzira kuna ine. M'manjamo mukhali mpukutu,

¹⁰ule adaufuthula mwenemo ine ndikuona maso. Kukhundu zonsene ziwiri mpukutu ule ukhadalembwa mafala a chiliro, akusintili na akulonga pya dzedze.