Read cisena EZEKIELE 21 Bible Online

EZEKIELE 21 - cisena bible

EZEKIELE 21

¹MBUYA adalonga kuna ine mbati,

²“Iwe mwana munthu, pasa nkhodolo mzinda wa Yerusalemu, mbulalike mwakupokanyisana na mbuto yakuchenayi. Longa mphangwa zauprofeti zakupokanyisana na dziko ya Israele

³mbulonge kuna iye kuti MBUYA akulonga tenepa: Ine ndine nyamalwako. Ndinati ndicholole m'mbuto mwache talasadanga mbandikukhamwadzani monsenene anyakulungama na anyakuipa ene.

⁴Na thangwi yakuti ndinakhamwadza anyakulungama na anyakuipa ene, talasadanga inakhakhatha munthu onsene kutomera kumpoto mpakana kumwera.

⁵Penepo anthu onsene anapidziwa kuti ine MBUYA, ndacholola talasadanga m'mbuto mwache; iyo nkhabe dzabwererave tayu.

⁶“Natenepo iwe mwana munthu, bulira! Bulira mwakusanyika mtima pikulu pontho mwakutsukwala towera munthu onsene akwanise kukuona.

⁷Tenepo iwo angakuvunza kuti, ‘Thangwi yache ninji unabulira?’ Iwe wathema kulonga kuti, ‘Ndi thangwi ya mphangwa zinafuna kudzazi. Mitima ya anthu inanyunguluka na mantha, pontho manjawo anachita chiwewa; kuwanga kwawo mtima kunamala, pontho mabondo awo anagogobodoka.’ Ipyo pikudzadi, pontho pinati pichitikedi. Ndalonga ndine MBUYA Mulungu.”

⁸MBUYA adalonga kuna ine mbati,

⁹“Iwe mwana munthu, longa mphangwa zauprofeti kuti Mbuya akulonga tenepa: Talasada, talasada, yakunozwa, pontho yakupukutwa mwadidi,

¹⁰yakunozwa towera icheke, yakupukutwa mwadidi towera ichetume ninga njazi! “Ayi tinasekera tani, mwenemo anthu anga alulupisa ndodo yanga yakutchunyusa nayo?

¹¹“Talasada ikupukutwa mwadidi, towera ifumbatwe m'manja; ikunozwa na kumusiliswa, kusasanyika kutelegalwi m'manja mwa nyakucheka.

¹²Khuwa pontho kalala, iwe mwana munthu, thangwi talasadayi yasasanyirwa anthu anga; yasasanyirwa atongi onsene a Israele. Iwo aphiwa kubodzi kwene na anthu anga onsene. Tenepo khumatani kuonesa kutsukwala.

¹³“Kuyeserwa kunati kudze. Apo ndi tani ngakhala iwo analulupisa ndodo yakuatchunyusa nayo ile? Ayi ipyo nkhabe dzachitika tayu? Ndalonga ndine MBUYA Mulungu.

¹⁴“Natenepo iwe mwana munthu, longa mphangwa zauprofeti, mbukhethese manjako pabodzi pene. Talasadayi mbikhamwadze kawiri, podi katatu kene. Talasadayo basache nkhucheka; talasada yakucheka kukulu, kuaikha pampani-pani khundu zonsene.

¹⁵Towera mitima inyunguluke, pontho anyakuchekwa akhale azinji ene, ndaikha talasada m'misuwo yawo yonsene ya mpanda. Ande! Iyo yasasanywa kuti ichetume ninga njazi, pontho ili kale m'manja kuti icheke.

¹⁶Iwe talasada, kadza kumadyo, kubuluka penepo kumabzere. Kadza konsene kwene kunazungunukira mano ako.

¹⁷Inembo ndinakhethesambo manjanga pabodzi pene, penepo ukali wanga unambombowa. Ndalonga ndine MBUYA.”

¹⁸MBUYA adalonga kuna ine mbati,

¹⁹“Iwe mwana munthu, ikha chidziwiso kumisewu miwiri kule kunafuna dzabwera mfumu wa ku Babiloni na talasadache. Yonsene iwiriyo inatoma dziko ibodzi. Ikha pikwangwani pamphambano yakwenda mumzinda.

²⁰Ikha chidziwiso kunjira yakwendera ku Raba, mzinda wa Aamoni, kule kunafuna pita na talasada, pontho inangoyo njakwenda ku Yerusalemu, mzinda wa Yuda, wakutchingwa mwadidi na mpanda.

²¹Thangwi mfumu wa ku Babiloni anaimira pamphambano, pana chikwangwani pale. Iye anaombedza, towera adziwe njira inafuna kupita na iye: iye anaphatisa basa matswimo ninga ntsango kuvunza nzeru kuna milungu yache; pontho anasakanyula fafa ya nyama inafuna perekwa nsembeyo.

²²Kumadyo kwache ntsango unagwera Yerusalemu, kule kunafuna iye dzasasanya pyakugomolera mpanda, kupereka matongero akuti nkhondo iotoke, kuliza ngoma za nkhondo, kusasanya pyakukhutchira misuwo ya mpanda, kumuluka mataka kutsamira mpanda, pontho kumanga nsanja za anyankhondo.

²³Kuna anthu a ku Yerusalemu, ale adadumbira kukhala akukhulupirika kuna mfumu wa Babiloni, ipyo pinaoneka ninga kuombedza kwa pezi-pezi. Mbwenye mfumu anaakumbusa pya kudawa kwawo, pontho anaaphata unyaperezo.

²⁴Natenepo MBUYA Mulungu akulonga tenepa: Na thangwi yakuti imwe mwandikumbusira pyakudawa pyanu pakupandukira pakwecha kwachita imwe, kuonesa pakwecha pyakudawa pyanu papyonsene pimbachita imwe; na thangwi yakuti imwe mwachita penepi, imwe munati mukwatwe unyaperezo.

²⁵“Iwe mtongi wakunyansa, pontho wakuipa wa Israele, ule nsiku yache yafika, pontho ndzidzi wache wakutchunyuswa wafika pakundendeya.

²⁶Ine MBUYA Mulungu ndikulonga tenepa: Dula nduwirako pontho chipewu chako chachifumu. Pinthu nkhabe dzakhalave ninga mwakale tayu: Anyakutcherenga anakwizwa, pontho anyapadzulu anatchithiswa.

²⁷Madembe! Madembe! Ande ndinati ndichitise mzindawo kusanduka madembe. Iwo nkhabe dzamangwa pontho tayu mpakana munthu adasankhula ine kuti atonge mzindawo abwere; ine ndinapipereka kuna iye.

²⁸“Iwe mwana munthu, longa mphangwa zauprofeti kuti MBUYA Mulungu akulonga tenepa pya Aamoni na kutikana kwawo konsene: Talasada, talasada, yasasanyika kuvunga; yapukutwa kuti iphate basache, pontho ichetume ninga njazi.

²⁹Masomphenya anaona imwe ngakunama, pontho kuombedza kumbachita imwe nkhwapezi-pezi. Talasada inakhala chinjike pakhosi panu, anyakudawikamwe pontho anyakuipamwe. Nsiku yanu yafika, ndzidzi wanu wakutchunyuswa wafika pakundendeya.

³⁰Bwezerani talasada m'mbuto mwache! Ine ndinati ndikutongeni mseru kumbuto kudalengwa imwe kule, kudziko ya makolo anu,

³¹Ine ndinakhuthulira ukali wanga pana imwe mbandipepesa shungu yanga pana imwe; ndinakuperekani m'manja mwa anyakukala mtima, anyaluso na kuvunga ale.

³²Imwe munakhala nkhuni zakugasira moto, chiropa chanu chinachuchiswa m'dziko mwanu monthomo, imwe nkhabe dzakumbukwave tayu; thangwi ndalonga ndine MBUYA.”