Read cisena EZEKIELE 22 Bible Online

EZEKIELE 22 - cisena bible

EZEKIELE 22

¹MBUYA adalonga kuna ine mbati,

²“Iwe mwana munthu, ayi iwe unatonga mzinda wenewu? Ayi iwe unautonga mseru thangwi ya kuchuchisa chiropa? Msumulule thangwi ya pinthu pyakunyansa pyonsene pyachita iye

³mbulonge kuti MBUYA Mulungu akulonga tenepa: Iwe mzinda, wapidzesera wekha ene kuvungika, thangwi ya kuchuchisa chiropa mbupiswipisa wekha ene pakupembedza mifanikizo.

⁴Iwe wasanduka nyakudawa thangwi ya chiropa chidachuchisa iwe, pontho wapiswipisa wekha ene thangwi ya mifanikizo idasasanya iwe ile. Nsiku zako wazigwandiza wekha, pontho pyaka pyako pyamala. Natenepo ine ndinakusandusa kukhala chinthu chakusekesa kuna madzinza anango, pontho madziko onsene anakusedegula.

⁵Anyakukhala chifupi na iwe na anyakukhala kutali ene anakululupisa, iwe mzinda wa mbiri yakuipa, pontho wakudzala na pyakuzunguzika.

⁶“Yang'ana mule munachitira atongi onsene a Israele, ale ali muna iwe, munaphatisira iwo mphamvu zawo kuchuchisa chiropa.

⁷Muna iwe ababa na amama ene alulupiswa; alendo aponderezwa, pontho ana masiye na amamfelwa avuyiwa.

⁸Iwe wakhonda pinthu pyanga pyakuchena, pontho kuswipisa Nsiku yanga Yakupuma.

⁹Muna iwe muna anthu ale ambasasanya pyakuchuchisa chiropa, pontho anango ale ambadya nsembe pambuto zakupembedzerapo milungu pamapiri mbachita pinthu pyakuzuda.

¹⁰Muna iwe muna ale ambalulupisa matalimba a babawo, pontho ale ambakhakhamiza akazi akumwezi kugona nawo.

¹¹Anango ambachita pyakuzuda na akazi a atsanthembawo, anangombo ambagonana na akwenyawo, anango ambaphatirira anyamaingawo a bele inango.

¹²Muna iwe muna anango ale ambatawira kudyekerwa kuti achuchise chiropa; ambachitisa katapira, ambafiyalisa kobiri ninga mumbachitira anyamalonda kuna atsanthembawo kupifumisa okha ene. Tenepo imwe mwandiduwalira. Ndalonga ndine MBUYA Mulungu.

¹³“Ine ndinakhethesa manjanga thangwi ya kubera anthu kwachita imweku, pontho na thangwi ya kuchuchisa chiropa kwachita imwe m'dziko mwanu.

¹⁴Ayi iwe ukunyerezera kuti unakwanisa kupirira penu kukhala pontho na mphamvu ndingamala kukutchunyusa? Ndalonga ndine MBUYA Mulungu, pontho ndinati ndipichitedi.

¹⁵Ine ndinati ndibalalise anthu ako pakati pa madzinza mbandiathamangisira kumadziko onsene; pyakuipa pinachita iwepi ndinati ndipimalise.

¹⁶Iwe ungalulupiswa pamaso pa madzinza anango, iwe unapidziwa kuti ine ndine MBUYA.”

¹⁷Kubuluka penepo MBUYA adalonga kuna ine mbati,

¹⁸“Iwe mwana munthu, dzinza ya Israele kuna ine yasanduka masepu-sepu; onsenewo akhala ninga nkuwa, lata, simbi, na ntove, ule umbasalira pamoto siliva anganyunguluswa.

¹⁹Natenepo ine MBUYA Mulungu ndikulonga tenepa: Na thangwi yakuti monsenene mwasanduka masepu-sepu, ine ndinakugumanyisani kudza mu Yerusalemu.

²⁰Ninga montho mumbagumanyira anthu siliva, nkuwa, simbi, ntove, na lata kumponya m'dzenje yamoto kuti anyunguluswe na moto wa shungu, inembo ndinakugumanyisani thangwi ya kuzhangali na ukali wanga mbandikuponyani mumzindamo kukunyungulusani.

²¹Ande, ndinakugumanyisani mu Yerusalemu mbandiphatisa moto wa shungu yanga, tenepo imwe munamala kunyunguluka mwenemo

²²Ninga mumbanyungulusirwa siliva m'dzenje yamoto, sasawambo imwe munanyunguluswambo mwenemo. Penepo imwe munapidziwa kuti ine MBUYA ndatchanyula ukali wanga pana imwe.”

²³MBUYA adalonga pontho kuna ine mbati,

²⁴“Iwe mwana munthu, longa kuna dziko ya Israele kuti, ‘Iwe ndiwe dziko yakutembererwa, ile ikhali nkhabe mvula penu mafazi pansiku ya kuzhangali kwanga.’

²⁵Akadamu ache[15] akhala ninga nkhalamu yakubangula thangwi ya nyama yapha iyo. Iwo ambapha anthu mbakwata mfuma na chinthu chonsene chakufunika, pontho na upandu umbachita iwo ule, ambachitisa akazi azinji kukhala amamfelwa.

²⁶Anyansembe ache aswa mwambo wanga, pontho aswipisa pinthu pyanga pyakuchena; iwo nkhabe siyanisa tayu pakati pa pinthu pyakuchena na pyakukhonda chena. Iwo nkhabe funzisa anthu tayu pakati pa pinthu pyakuchena na pyakukhonda chena, pontho nkhabe tsalakana pya Nsiku yanga Yakupuma. Natenepo Aisraele nkhabe kundilemedza tayu.

²⁷Mathubu ache akhala ninga mibinzi yakukhwadzula nyama yapha iyo. Iwo ambachuchisa chiropa mbapha anthu, towera afume na njira zakupotoka.

²⁸Maprofeti ache ambakhwaza ntoto mabasa akuipawa. Iwo ambaona masomphenya akunama mbaombedza pyapezi-pezi. Iwo ambalonga kuti, ‘MBUYA Mulungu ndiye akulonga penepi,’ mwenemo ine, MBUYA Mulungu sidalonge nawo tayu.

²⁹Anthu a m'dzikomo ambadyera nkope-kope anzawo mbaabera pinthu pyawo; iwo ambapondereza anyakutcherenga na anyakusowa pinthu, mbavuya alendo pakukhonda kuachitira chilungamo.

³⁰“Ine ndidayang'ana-yang'ana munthu unango pakati pawo ule mbadakwanisa kumanga pontho mpanda, pontho kuimira pamaso panga ninga mvunuliri wa dzikoyo, towera ine ndileke kuivunga dzikoyo, kwache ine sidamgumane tayu.

³¹Natenepo ndinakhuthulira ukali wanga pana iwo mbandiapisa na shungu yanga. Ndidagwisira pinthu pyonsene pyachita iwo pamsolo pawo. Ndalonga ndine MBUYA Mulungu.”