Read cisena EZEKIELE 23 Bible Online

EZEKIELE 23 - cisena bible

EZEKIELE 23

²“Iwe mwana munthu, pidachitwa na akazi awiri, ale mawo akhali mbodzi ene.

³Iwo adasanduka maputa pikhakhala iwo m'dziko ya Iguputo mbachita pyauputa kutomera utsikanawo. M'dzikomo anthu akhaasisita pagangafuwa mbatinya-tinya mabele awo.

⁴Mkulu dzinache ikhali Ohola,[16] mng'onoache dzinache ikhali Oholiba.[17] Ndidaasemba mbandibala nawo ana achimuna na achikazi ene. Ohola akuimirira mzinda wa Samaria, pontho Oholiba akuimirira Yerusalemu.

⁵“Ohola akhachita pyauputa, mwenemo mbali mkazanga, tenepo iye adathamanga na pibwenji pyache pya ku Asiria, anyankhondo

⁶akuvala nguwo zachoza, akulu a boma, akadamu ankhondo; onsenewo akhali achiphale akubalika, pontho anyakupakira akavalo.

⁷Iye adapipereka yekha ene ninga puta kuna anyakubalika onsene a ku Asiria, tenepo adapiswipisa yekha ene pakupembedza mifanikizo yawo yonsene ikhasirira iye ile.

⁸Iye hadaleke tayu kuchita pyauputa pidatoma iye kupichita ku Iguputo, kule kukhagonwa iye kutomera utsikanache; iwo akhatinya-tinya mabele ache, pontho akhachita naye pyauputa.

⁹“Natenepo ine ndidampereka m'manja mwa pibwenji pyache pya ku Asiria akhasirira iye pyakwanga ale.

¹⁰Iwo adamdula nguwo mbamkwatira anache achimuna na achikazi ene. Kubuluka penepo iwo adampha na talasada. Iye adasanduka chinthu chakusekesa pakati pa akazi anango, thangwi ya kutchunyuswa kudachitwa iye.

¹¹“Podi kwene kuti Oholiba mbaleache wamng'ono adaona penepi, kwache adakwatirambo makhaliro akusirira mbanyanya kuchita pyauputa kupiringana nanache Ohola.

¹²Iyembo adasirira pyakwanga amuna a ku Asiria, akulu a boma, akadamu ankhondo, anyankhondo amphamvu akuvala nguwo zankhondo, anyakupakira akavalo, onsene aphale akubalika ale.

¹³Ine ndidaona kuti iyembo adapiswipisa yekha ene; onsene uwiriawo makhaliro awo akhali abodzi ene.

¹⁴“Kwache iye adathimiza basi kuchita pyauputa. Iye adaona pithunzi-thunzi pya amuna m'mafufu, pithunzi-thunzi pya amuna a ku Akaladea, pyakujambulwa na tinta yakufira,

¹⁵uku amanga mthimbalimba m'chunu mwawo na pipewu kumsolo kwawo; onsenewo akhaoneka ninga mathubu a pingolo, mzika za ku Babiloni.

¹⁶Sindzidzi iye nkhupiona, adapisirira mbatumiza anyamphangwa kuna Akaladea kuti adze.

¹⁷Tenepo anthu a ku Babiloni adadza dzagona naye. Iwo adamswipisa pikulu pene na pyakuzuda pyawo kufikirana iye adanyansirwa nawo mbabuluka pana iwo.

¹⁸Pidathimiza iye akuchita pakwecha pyauputa pyache mbapionesa yekha ene pezi, ine ndidanyansirwa naye mbandimpasa nkhodolo ninga mudachitira ine na nanache.

¹⁹Kwache iye ndiye adanyanyiratu kuchita pyauputa ninga mukhachitira iye mbali mtsikana m'dziko ya Iguputo.

²⁰Kweneko iye akhathamanga na pibwenji pyache, ale akhali am'chuno ninga bulu, pontho achimaso-maso ninga kavalo.

²¹Natenepo iwe Oholiba ukhafuna kuchita pontho pyakuzuda ninga montho mukhachitira iwe ku Iguputo mbuli mwali, kweneko amuna akhakusisita pagangafuwa mbakutinya-tinya mabele.

²²“Natenepo, iwe Oholiba, ine MBUYA Mulungu ndikulonga tenepa: Ine ndinachitisa pibwenji pyako kukusandukira, amuna adaphulira iwe mata ale, tenepo ndinaadzesa kubulukira kukhundu zonsene dzapokanyisana nawe.

²³Ndinadzesa Ababiloni, Akaladea onsene, Apekodi, Ashua na Akoa, pontho na Aasiria onsene, aphale akubalika, ale ndi akulu a boma na akadamu ankhondo, mathubu na anyankhondo amphamvu, onsene anyakupakira akavalo.

²⁴Iwo anabwera kubulukira kumpoto dzachita nawe nkhondo na gulu ikulu ya anyankhondo, na pingolo pyankhondo na pigudumu; iwo anakuzungulira kukusosa kukhundu zonsene uku aphatira pyakugedera matswimo pikulu na ping'ono pene mbavala pipewu. Ine ndinakupereka m'manja mwawo kuti akutchunyuse, tenepo iwo anakutchunyusa ninga munapifunira iwo.

²⁵Ine ndinaatawirisa kukutchunyusa mwaukali thangwi ndakuzhangalira pyakwanga. Iwo anagwanda mphuno na makutu ako, pontho onsene anafuna dzasalira ale anaphiwa na talasada. Ande, iwo anakwata anako achimuna na achikazi, pontho na onsene anafuna dzasalira na moyo ale mbaapisa pamoto.

²⁶Iwo anakudula nguwo zako mbakwata pyakuthemesera napyo manungo ako.

²⁷Natenepo ine ndinati ndimalise pyakuzuda na uputako onsene udatoma iwe m'dziko ya Iguputo. Iwe nkhabe dzakhumbira pontho pinthu penepi, penu kukumbuka pontho Iguputo tayu.

²⁸“Thangwi ine MBUYA Mulungu ndikulonga tenepa: Ine ndili chifupi kukupereka m'manja mwa anyakukuzonda, pontho kuna anthu adaphulira iwe mata ale.

²⁹Iwo anakuchitira vinga, pontho anakupokosera pinthu pyako pyonsene pyaphatira iwe basa. Iwo anakusiya chipezi-pezi, pontho chimanja-manja, penepo manyadzo a pikhumbo pyauputako pinaonekera pakwecha. Kuzuda kwako na uputako

³⁰ndiye pyakudzesera penepi, thangwi iwe udathamanga na amuna a madzinza anango mbupiswipisa wekha ene na mifanikizo yawo.

³¹Iwe udapondambo manyalo a nanako; natenepo ndinati ndikumwesembo khomitcho cha nyatwa idamwesa ine nanako ile.”

³²MBUYA Mulungu akulonga tenepa: “Iwe unati umwe khomitcho idamwambo nanako, ikulu pontho yakuzwika ile; anthu onsene anakusedegula pontho kukuseka, khomitcho njakudzala pyakwanga.

³³Iwe unaledzera pontho kutsukwala; thangwi ya khomitcho yakugoswa pontho yakusakaza, khomitcho ya nanako Samaria ile.

³⁴Iwe unaimwa mbuisiyiratu kakata; iwe unaiphumudza mbuchekeka nayo mabele ako. Ndalonga ndine MBUYA Mulungu.

³⁵“Natenepo ine MBUYA Mulungu ndikulonga tenepa: Podi iwe wandiduwalira mbundipasa nkhodolo, iwe wathema kuona nyatwa zikulu thangwi ya kuzuda pontho uputako onsene.”

³⁶MBUYA adalonga kuna ine mbati, “Iwe mwana munthu, ayi unatonga mseru Ohola na Oholiba? Tenepo asumulule thangwi ya pinthu pyakunyansa pyachita iwo pile.

³⁷Iwo achita pyauputa, pontho m'manja mwawo mwadzala na chiropa. Iwo ambachita uputa na mifanikizo yawo; iwo ambapereka kuna mifanikizo yawo anawo adandibalira iwo ale ninga nsembe za pyakudya.

³⁸Padzulu pa penepi iwo adachita pinthu ipi kuna ine: iwo adaswipisa Nyumbanga, mbaswipisa pontho Nsiku Yakupuma.

³⁹Nsiku yontho idapereka iwo anawo nsembe kuna mifanikizo, iwo adapita m'mbuto yanga yakuchenesa mbaiswipisa. Penepi ndiye pidachita iwo kuna Nyumbanga!

⁴⁰“Si pyokhapyo tayu, iwo adatuma anyamphangwa kachemera amuna kudza kubulukira kutali. Pidafika amunawo, iwe udasamba mwadidi, kutswinga ntchiye zako na tinta mbuvala pyakuthemesera napyo manungo.

⁴¹Iwo akhakhala pamakadera adidi, pontho patsogolo pawo akhaikhapo thebulu yakudzala na pyakudya pyadidi kuthimizapo pyakufukiza pyakununkhira na mafutanga aolivi.

⁴²“Kusokosa kwa mwinji wa anyatsenzo kudamzungulira; gulu ya Asebea idadza kubulukira kuthando pabodzi pene madombe. Iwo adavazika pibangili m'mikono mwa mkaziyo na nanache ene, pontho adaavazika pipewu pyachifumu mumsolo mwawo.

⁴³Kubuluka penepo ndidalonga pya ule adachita kusakaliratu na uputa kuti, ‘Alekeni pyawo amphatise basa ninga puta, thangwi iye maka ndi puta.’

⁴⁴Tenepo iwo adagona nawo. Ninga mumbachitira amuna kugona na puta, sasawambo iwo adagona na akazi awiri akuzuda ale, Ohola na Oholiba.

⁴⁵Mbwenye amuna akulungama anati atonge akazi enewa pamseru wakuchita pyauputa na kuchuchisa chiropa, thangwi iwo ambachita uputa pontho m'manja mwawo ngakudzala na chiropa.”

⁴⁶MBUYA Mulungu akulonga tenepa: “Dzani na gulu ya anthu kuapokanyisa, mbamuachitise kuvungika pontho kupokoserwa pinthu pyawo.

⁴⁷Gulu ya anthuyo inaaponyera miyala mbiaakhamwadza na talasadawo; iwo anapha anawo achimuna na achikazi ene mbapisa nyumba zawo.

⁴⁸“Natenepo ndinati ndimalise kuzuda konsene m'dziko, towera kucheuza akazi onsene pontho kuti aleke kukwatira makhaliro anu akuzuda.

⁴⁹Imwe munati muone nyatwa thangwi ya uputanu, pontho munaona nyatwa thangwi ya pyakudawa pyanu pakupembedza mifanikizo. Penepo imwe munapidziwa kuti ine ndine MBUYA Mulungu.”