Read cisena EZEKIELE 24 Bible Online

EZEKIELE 24 - cisena bible

EZEKIELE 24

¹Chaka chachifemba, pansiku yachikhumi ya mwezi wakhumi wa unyaperezo wathu, MBUYA adalonga kuna ine mbati,

²“Iwe mwana munthu, lemba nsiku ya lero, lero pano, thangwi lero ndi nsiku ile mfumu wa ku Babiloni amanga misasa yankhondo kuzungulira Yerusalemu.

³Panga dzinza yakupandukirayi msangani ufu mbulonge kuna iwo kuti ine MBUYA Mulungu ndikulonga tenepa: Sanzika supulia pamoto; isanzike mbuikhemo madzi.

⁴M'supuliamo ikhamo nthuli za nyama, nthuli zadidiletu, mwendo na phewa; dzaza supulia na magogodo adidiletu.

⁵Kwata bira wadidiletu kubulukira pa mkumbi. Ikha nkhuni pansi pa supulia kuti uphike nthulizo; kwindimula moto kuti awire mbutokotese magogodowo mwenemo.”

⁶“Thangwi ine MBUYA Mulungu ndikulonga tenepa: Dzedze kuna mzinda wakuchuchisa chiropa, wakhala ninga supulia waubzimbiri okhonda tsuka. Bulusamo m'chikalango nthuli na nthuli okhonda kupichitira ntsango.

⁷Thangwi chiropa chachuchisa iye chili mumzindamo; iye adachita kuchikhuthulira pakwecha pamwala; mbakhonda kuchikhuthulira pansi, pale mataka mbadachiphimbira.

⁸Ine ndasiya chiropa penepo, pale pakuti nkhabe bisika mwakuti chimbandilirira kubwezera mwaukali.”

⁹Natenepo MBUYA Mulungu akulonga tenepa: “Dzedze kuna mzinda wakuchuchisa chiropa! Inembo ndinati ndiikhe mulu ukulu wa nkhuni.

¹⁰Mulukani nkhuni mbamuphatise moto. Nyamayo iphikeni mwadidi, mbamuikhemo pyakukomesera; tenepo magogodowo muapyereze.

¹¹Kubuluka penepo thikitiza pamakala supulia wakusowa pinthuyo, mpakana apise pyakwanga mwakuti simbi ifire, towera pyakunyansa mwenemo pinyunguluke, pontho ubzimbiri ubuluke.

¹²Basa yonsene yaenda m'madzi, ubzimbiri wakuthimbirira hudabuluswe tayu, nee na moto ene tayu.

¹³“Iwe Yerusalemu, kuzuda kwako kwakuswipisa. Na thangwi yakuti ine ndidayesera kukukwecha, mbwenye iwe udachimwanika kuchena. Iwe nkhabe dzakhalave wakuchena tayu kufikirana ndikhuthulire ukali wanga onsene pana iwe.

¹⁴“Ndalonga ndine MBUYA Mulungu. Ndzidzi wafika wakuti ine ndichitepo pinthu. Ine nkhabe dzakuyang'anani kwene tayu; ine sinakuverani nsisi, penu ukali wanga kumbombowa tayu. Imwe munatchunyuswa malingana na makhaliro anu pontho mabasanu achita imwe. Ndalonga ndine MBUYA Mulungu.”

¹⁵MBUYA adalonga kuna ine mbati,

¹⁶“Iwe mwana munthu, na shoko ene ibodzi basi ine ndili chifupi kukubulusira mkazako, wapamtima pako ule. Kwache iwe leka tsukwala penu kusintili, penu kugwisa msozi na pang'ono pene.

¹⁷Lira pyako chibwalo-bwalo; leka sintili thangwi ya nyakufayo. Leka dula nduwirako, penu kufamba wakusowa nkhwaira; leka bisa nkhope yako penu kudya pyakudya pya anyakusintili ninga mwamtemo wache.”

¹⁸Natenepo mangwana mwache na machibese ine ndidalonga kuna anthu, tenepo na mawulo mwache mkazanga adafa. Mangwana mwache na machibese ndidachita ninga montho mukhadapangirwa ine mule.

¹⁹Tenepo anthu adandivunza kuti, “Thangwi yache ninji ukuchita pinthu ninga penepi? Apo pikulonganji kuna ife?”

²⁰Natenepo ndidalonga kuna iwo kuti, “MBUYA adandipanga

²¹kulonga kuna dzinza ya Israele kuti: MBUYA Mulungu akulonga tenepa: Ine ndili chifupi kuvunga Nyumbanga yakuchena, mbuto yakupata imbanyadira imwe ile, chinthu chakukoma m'maso mwanu, pontho chimbakhumba mtimanu chile. Ananu adasiya imwe mu Yerusalemu ale anati afe pankhondo.

²²Penepo imwe munachitambo pinthu ninga pyachita Ezekielepi. Imwe nkhabe dzabisa nkhope zanu tayu, penu kudya pyakudya pimbadya anyakusintili ninga mwamtemo tayu.

²³Imwe nkhabe dzadula nduwira zanu, penu dzafamba kwene wakusowa nkhwaira tayu. Imwe nkhabe dzasintili penu kulira tayu, kwache imwe munamala pakatika thangwi ya pyakudawa pyanu, pontho munabulirana pyanu mwekha ene.

²⁴Ezekiele ndiye anafuna dzakhala chidziwiso chakukucheuzani nacho; imwe munachitambo ninga montho mwachita iye. Tenepo penepi pingachitika, imwe munapidziwadi kuti ine ndine MBUYA Mulungu.

²⁵“Kulonga pya iwe mwana munthu, pansiku inafuna ine dzabulusa mbuto yawo yakupata, chinthu chimbakomerwa na iwo chile, demelero yawo, chinthu chakukoma m'maso mwawo, chinthu chimbakhumba mtimawo chile, pontho na anawo ene,

²⁶pansiku yeneyo, munthu unango wakuthawa mumzindamo anabwera kuna imwe dzakupangani mphangwa za kuvungikaku.

²⁷Na nsiku yonthoyo lulume yako inasudzuka; iwe unalonga nawo mbukhonda dzakhala mulomo phoo. Tenepo iwe unakhala chidziwiso chakucheuza nacho anthu, penepo iwo anapidziwadi kuti ine ndine MBUYA.”