Read cisena EZEKIELE 25 Bible Online

EZEKIELE 25 - cisena bible

EZEKIELE 25

¹MBUYA adalonga kuna ine mbati,

²“Iwe mwana munthu, pasa nkhodolo Aamoni mbulonge mphangwa zauprofeti zakupokanyisana nawo.

³Longa kuna iwo kuti: Veserani mafala a MBUYA Mulungu. MBUYA Mulungu akulonga tenepa: Na thangwi yakuti imwe mudaseka chihehede, thangwi ya kuvungwa kwa mbuto yanga yakuchena, kuona dziko ya Israele ikusakazika, pontho kuona anthu a ku Yuda akukwatwa unyaperezo,

⁴natenepo ine ndinakuperekani m'manja mwa madzinza akumabulukiro dzuwa. Iwo anamanga misasa pontho makumbi awo pakati panu; iwo anadya nsapo zanu na kumwa mkakanu.

⁵Mzinda wa Raba ndinati ndiusanduse mbuto ya mpovu ya ngamila, pontho Amoni ndinamsandusa kukhala mbuto yakupumirako mabira. Penepo munapidziwa kuti ine ndine MBUYA.

⁶Thangwi MBUYA Mulungu akulonga tenepa: Na thangwi yakuti imwe mukhachita kuimbira manja na kunumpha-numpha, kukomoka na kuseka thangwi ya dziko ya Israele,

⁷natenepo ine ndinati ndifuthule mkono wanga kukutchunyusani, mbandikuperekani m'manja mwa madzinza anango kuti akupokosereni pinthu pyanu pyonsene. Ine ndinakuvungani monsene mwene kuna madzinza kunakhala imwe kule mwakuti imwe nkhabe dzakhalave dzinza tayu. Penepo munapidziwa kuti ine ndine MBUYA.”

⁸MBUYA Mulungu adalonga mbati, “Na thangwi yakuti Moabu[18] adalonga kuti dzinza ya Yuda yasandukambo ninga madzinza anango onsene,

⁹natenepo ine ndinachitisa kuti mizinda yakutchingwa na mpanda m'madire a Moabu ivungwe, yeneyi ndi Beti-Yeshimoti, Baala-Meoni na Kiriataimu, demelero ya dziko yache.

¹⁰Ine ndinapereka Amoabu pabodzi pene na Aamoni m'manja mwa madzinza akumabulukiro dzuwa, towera Aamoni aleke dzakumbukwave pakati pa madzinza;

¹¹pontho ndinatchunyusa Amoabu. Penepo iwo anapidziwadi kuti ine ndine MBUYA.”

¹²MBUYA Mulungu adalonga mbati, “Na thangwi yakuti Aedomu adabwezera mwavinga dzinza ya Yuda mbadawa pikulu pakuchita tenepo,

¹³natenepo MBUYA Mulungu akulonga tenepa: Ine ndinati ndifuthule mkono wanga kutchunyusa Edomu mbandipha munthu na nyama zonsene mwenemo. Ndinasandusa dzikoyo kukhala thando yatchetcha; mbandiapuluza onsenewo pankhondo kutomera kumzinda wa Temani mpakana kumzinda wa Dedani.

¹⁴Ine ndinabwezera Aedomu pakuphatisa basa anthu anga Aisraele, pontho iwo anati achite kuna Aedomu malingana na kuzhangali kwanga, pontho na ukali wanga. Tenepo iwo anadziwa kubwezera kumbachita ine. Ndalonga ndine MBUYA Mulungu.”

¹⁵MBUYA Mulungu adalonga mbati, “Na thangwi yakuti Afilisti abwezera mwavinga na mtima wakuipirwa, mbaavunga Ayuda malingana na chizondi chakale chikhali na iwo,

¹⁶natenepo ine MBUYA Mulungu ndikulonga tenepa: Ine ndili chifupi kufuthula mkono wanga kutchunyusa Afilisti. Ndinapha Akereti onsene mbandipha anthu onsene asalira m'magombe a bara ale.

¹⁷Ine ndinati ndibwezere pikulu pene mbandiatchunyusa na ukali wanga. Penepo iwo anapidziwadi kuti ine ndine MBUYA Mulungu ndingaabwezera.”