Read cisena EZEKIELE 26 Bible Online

EZEKIELE 26 - cisena bible

EZEKIELE 26

¹Chaka chakhumi na chibodzi, pansiku yakutoma ya mwezi wa unyaperezo wathu, MBUYA adalonga kuna ine:

²“Iwe mwana munthu, na thangwi yakuti anthu a ku Turo akusedegula Yerusalemu kuti, ‘Hehede, Yerusalemu, ule akhali mzinda wakuchitira malonda na madzinza anango avungika, natenepo anyamalonda anabwera kuna ife. Na thangwi yakuti iye avungika ife tinati tifume!’

³“Natenepo ine MBUYA Mulungu ndikulonga tenepa: Ine ndina mseru na iwe, Turo, pontho ndinadzesa madzinza azinji kuchita nawe nkhondo, ale anafuna dzabwera ninga nyanza kukapiza mabimbi ache.

⁴Iwo anavunga mpanda wa Turo mbagwisa nsanja zache; ine ndinaunga madongolomwa ache onsene mbandimsiya nyimwa.

⁵Iye anasanduka mbuto, ile amisiri a nsomba anathasikapo makokotawo. Ndalonga ndine MBUYA Mulungu. Madzinza anapokosera pinthu pyache,

⁶pontho ale ambakhala m'midzi yache yakumtunda anamala phiwa pankhondo. Penepo iwo anapidziwadi kuti ine ndine MBUYA.”

⁷MBUYA Mulungu akulonga kuti, “Kubulukira kumpoto ine ndinati ndidzese Mfumu Nebukadinezara wa ku Babiloni, mfumu wamkulu pakati pa mafumu onsene, pabodzi pene na akavalo ache na pingolo pyache, anyakupakira akavalo na anyankhondo azinji dzachita nkhondo na Turo.

⁸Iye anavunga midzi yako yakumtunda na nkhondo; iye anamanga nsanja za anyankhondo kukuzungulira, iwe Turo, mbamuluka mataka kutsamira mpandako. Iye anakwiza m'dzulu pyakugedera pyache matswimo kuthimbana nawe.

⁹Iye anasasanya mphinga zakugomolera mafufu ako mbagwisa nsanjako na mbadzo.

¹⁰Akavalo ache anainjipa pyakwanga mwakuti fumbi yawo inakuphimbira. Mpandako unatekenyeka thangwi ya mulikiti wa akavalo, pingolo pyankhondo na pigudumu, ndzidzi unapita iye na pamsuwo wako wa mpanda ninga mumbakhalira ipyo anyankhondo kupita mumpanda wakugomoka.

¹¹Njondo za akavalo awo zinakumba-kumba misewu yako yonsene; iye anapha anthu ako na talasada, pontho mizati yamphamvu maka ile inamala gomolwa.

¹²Iwo anakupokosera mfumako mbakwata pinthu pimbachita iwe napyo malonda; iwo anagomola mafufu ako mbagwisa nyumba zako zadidi mbaponyera m'bara miyalako, matabwako na madongolomwako.

¹³Ine ndinamalisa nyimbo zako zakusokosa, pontho nyimbo zako zakuimbwa na anyakatangale nkhabe dzavekave tayu.

¹⁴Ine ndinakuchitisa kusala nyimwa mbusanduka mbuto yakuthasikirapo makokota. Mzindawo nkhabe dzamangwa pontho tayu, thangwi ndapilonga ndine MBUYA. Ndalonga ndine MBUYA Mulungu.”

¹⁵MBUYA Mulungu akulonga tenepa kuna mzinda wa Turo: “Ayi anyamgombe nkhabe dzatetemera tayu na mantha angava kuvungwa kwako, kubulira kwa anyakukukuwazwa, pontho na kuphiwa kwa anthu ako?

¹⁶Natenepo mafumu onsene a m'magombe anatchitha pamipando yawo mbaikha mikhanjo yawo pakhundu mbadula nguwo zawo zakukhala na pyakuthemesera. Iwo anachita mantha mbakhala pansi uku akutetemera okhonda lekeza, kututumuka na kuona dzedze yako.

¹⁷Iwo anaimba nyimbo ya maliro kulira nayo iwepo mbalonga kuna iwe tenepa: ‘Wavungwa tani tenepa, iwe mzinda wakuveka, miyadiyako ikulu-ikulu nkhabe onekave pabara! Iwe ukhali nyamphamvu pabara; iwe na mzika zako zene mukhathuswa anyamgombe onsene.

¹⁸Chinchino anyamgombe akutetemera thangwi ya nsiku ya kuvungwa kwako; anyamntchuwa akugoswerwa na kuvungwa kwako.’

¹⁹“MBUYA Mulungu akulonga tenepa: Ndingakusandusa madembe, ninga mizinda inango ile nkhabe khalamo anthu tayu, pontho ndingakubiza na bara yakuzwika, pontho na madzi makulu,

²⁰penepo ine ndinakutchithisira ku Chiphompho chikulu, kule kumbakhala anthu a mvula zakale. Ine ndinakuchitisa kukhala m'dziko ya anyakufa pansi pa mataka, kumadembe akale pabodzi na anyakwenda ku Chiphompho chikulu ale. Iwe nkhabe dzabwererako, penu kukhalambo na mbuto yako m'dziko ya anthu a moyo tayu.

²¹Mamalisiro ako anakhala akugumisa manungo, pontho iwe nkhabe dzaonekave tayu. Iwe unasakwa-sakwa, kwache hunagumanwave tayu. Ndalonga ndine MBUYA Mulungu.”