Read cisena EZEKIELE 27 Bible Online

EZEKIELE 27 - cisena bible

EZEKIELE 27

¹MBUYA Mulungu adalonga kuna ine mbati,

²“Iwe mwana munthu, imba nyimbo ya maliro yakulonga pya Turo.

³Longa kuna Turo, ule ali pagombe ninga msuwo wa kubara mbachita malonda na anthu akukhala m'magombe azinji kuti MBUYA Mulungu akulonga tenepa: “Iwe Turo, umbapilonga wekha ene kuti, ‘Ndine wakubalika monsene mwene.’

⁴Musako ndi bara ikulu; amisiri ako adakusasanya kukhala mwadiya wadidiletu.

⁵Matabwako onsene akhali a paina a ku Seniri, mbaphatisa basa muti wamkungudza wa ku Lebanoni kukhala chakuphatisira chinguwo chakufambisira mwadiya.

⁶Na mithundu ya ku Bashani iwo adasasanya ng'ombo; na matabwa anjale akubulukira kumagombe a Kipro iwo adasasanya subi yakuthemeserwa na nyanga ya nzowu.

⁷Nguwo zakuthemeserwa mwadidi za ku Iguputo ndiye zikhali chinguwo chakukufambisa nacho mbachikhala ninga bandera kuna iwe; nsoyi yako idaphimbirwa na nguwo yachoza yakubulukira kumagombe a Kipro.

⁸Amuna a ku Sidoni na Arivadi ndiye akhali anyakuchapako; iwe Turo, amunako aluso akhali anyakufambisa mwadiya.

⁹Anyakusasanya mwadiya akhali anyampala matabwa aluso a ku Gebali. Miyadiya yonsene ya pabara na anyakuifambisache akhadza dzachita nawe malonda.

¹⁰“Amuna a ku Peresia, Ludi na Puti adaphata basa ninga anyankhondo ako. Iwo adakoloweka m'mafufu mwako pyakugedera matswimo pyawo na pipewu pyawo; iwo adakudzesera demelero.

¹¹Amuna a ku Arivadi na Heleki adalondali mpandako kukhundu zonsene; amuna a ku Gamadi akhali munsanja zako. Iwo adakoloweka pyakugedera matswimo pyawo m'mafufu mwako monsene; iwo adakuchitisa kukhala wakubalika monsene mwene.

¹²“Iwe udachita malonda na anthu a ku Tarisisi. Iwo adakupagali siliva, simbi, lata na ntove kuchinjisana na pinthu pyako pyakuinjipa pile.

¹³Iwe udachita malonda na anthu a ku Grisi, Tubali, Mesheki; iwo adakupasa mabitchu na pyombo pyankuwa kuchinjisana na pinthu pyako.

¹⁴Anthu ku Beti-Togarima adakupasa akavalo, akavalo ankhondo na mabulu kuchinjisana na pinthu pyako.

¹⁵Anthu a ku Rodesi[19] adachita nawe malonda; anyamgombe azinji adakupasa nyanga za nzowu na mphingwe kuchinjisana na pinthu pyako.

¹⁶Anthu a ku Aramu adachita nawe malonda, thangwi ya pinthu pyako pizinji. Iwo adakupasa miyala ya emeradi, nguwo zamsuzi wanyemba, nguwo zakulukwa, nguwo zakuchena, korali na miyala ya rubi kuchinjisana na pinthu pyako.

¹⁷“Yuda na Israele adachita nawe malonda; iwo adakupasa tirigu wa ku Miniti, pijejede, manyuchi, mafuta aolivi na mitombwe kuchinjisana na pinthu pyako.

¹⁸“Na thangwi ya kuinjipa kwa pinthu pimbasasanya iwe pontho na mfuma izinji ina iweyo, Damasiko adachita nawe malonda. Iwo adakupasa vinyu wa ku Heleboni pontho na ubweya wa mabira wa ku Zahari kuchinjisana na pinthu pyako.

¹⁹“Anthu a dzinza ya Dani na Agriki kubulukira ku Uzali adagulambo pinthu pyako pakukupasa simbi, pontho pyakukomesera napyo muliwo pya kasia, na kalamusi.

²⁰“Anthu a ku Dedani adakupasa pyakukhalira pamsana pa mabulu kuchinjisana na pinthu pyako.

²¹“Arabia na atongi onsene a ku Kedara akhali anyakukugulako; iwo akhachita nawe malonda a anabira, mabira amuna, na mbuzi.

²²“Anyamalonda a ku Sheba na Raama akhachitambo nawe malonda basi; iwo adakupasa pyakukomesera muliwo pyadidi pyamtundu onsene, pontho miyala yakudula na golidi kuchinjisana na pinthu pyako.

²³“Mizinda ya Harani, Kane na Edeni, pontho na anyamalonda a ku Sheba, Ashuri na Kilimadi adachitambo nawe malonda.

²⁴Kuchinjisana na pinthu pyako iwo adakupasa nguwo zakukoma m'maso, nguwo zachoza, nguwo zakulukwa, nguwo zakuthasika pansi zamtundu-mtundu, pontho nkhambala zakulukwa mwaluso.

²⁵“Miyadiya mikulu-mikulu ya ku Tarisisi ikhaphata basa yakuthukula mitolo yako. Iwe wamala dzala na mitolo yakulemera pakatiletu pa bara.

²⁶Anyakukuchapa akuendesa kwakuzwika, kwache mphepo ya mbalu inati ikupandule pakatiletu pa bara.

²⁷Mfumako, pinthu pyako, na mitolo yako, anyakukufambisako, anyakuchapako, anyakusasanya miyadiyako na anyamalondako, anyankhondo ako onsene, pontho na munthu onsene apakira m'mwadiyamo analilima pakatiletu pa bara pansiku inafuna dzapanduka iwe.

²⁸Magombe anatekenyeka na thangwi ya kukhuwa kwa amunako ali m'mwadiyamo.

²⁹Anyakuchapa onsene anaisiya pyawo miyadiyawo; anyakufambisa mwadiya onsene na akadamu awo anaimira pyawo pagombe.

³⁰Iwo anakusintili mbakulira pikulu pene; iwo anawaza fumbi mumsolo mwawo mbabulumunda padotha.

³¹Iwo anachinga tsisi yawo thangwi ya iwepo mbavala masakha. Iwo anakulira mwakusanyika mtima, pontho mbakusintili pikulu pene.

³²Ndzidzi unafuna iwo dzakulira na kusintili, iwo anaimba nyimbo ya maliro yakulonga pya iwe kuti, ‘Chipo mbani avungwa ninga Turo, ule abizwa m'bara?’

³³Pikhafamba anyamalondako pabara iwe udachitisa madzinza mazinji ene kukhuta; na mfumako izinji, pontho pinthu pyako iwe udafumisa mafumu a padziko yapansi.

³⁴Lero iwe wavungwa na bara; wabizwa m'madzi akuzwika; mitolo yako na anthu onsene akhali na iwe ale wamala kwenda nawo pabodzi pene.

³⁵Onsene akukhala m'magombe atutumuka na kuona dzedze yako; mafumu awo aphatwa na mantha, pontho kunkhope kwawo kukuonesa mantha makulu.

³⁶Anyamalonda a madzinza anango akukusedegula; mamalisiro ako ngakuchitisa mantha pyakwanga, tenepo iwe nkhabe dzakhalapove tayu.”