Read cisena EZEKIELE 28 Bible Online

EZEKIELE 28 - cisena bible

EZEKIELE 28

¹MBUYA adalonga kuna ine mbati,

²“Iwe mwana munthu, longa kuna mfumu wa ku Turo kuti MBUYA Mulungu akulonga tenepa: Na kunyada kwakoko iwe umbapilonga kuti, ‘Ine ndine mulungu; ndimbakhala pampando wachifumu wa milungu pakatiletu pabara.’ Mbwenye ndiwe munthu ene pyako, nee mulungu tayu, podi kwene kuti umbapiyesa pyako wanzeru ninga mulungu.

³Ayi iwe ndiwe nyanzeru kupiringana Daniele? Ayi iwe nkhabe bisirwa pinthu tayu?

⁴Na nzeru zako pontho kuvesa kwako pinthu iwe wapifumisa wekha ene mbupigumanyira golidi na siliva mzinji m'masubi mwako.

⁵Na luso ina iwe pamalonda iwe wathimizira mfumako, pontho na thangwi ya mfuma ina iweyo, wasanduka nyakugaya.

⁶“Natenepo ine MBUYA Mulungu ndikulonga tenepa: Podi iwe umbapiyesa wekha ene nyanzeru, nyanzeru ningambo mulungu,

⁷ndinati ndidzese alendo pana iwe, madzinza avinga pyakwanga; iwo anacholola matalasadawo kukhamwadza nawo pinthu pyako pyonsene pyakubalika pyagumana iwe na nzeru zako, mbatema-tema demelero yako yonsene.

⁸Iwo anakugwisira m'Chiphompho chikulu, mbufa mwakusanyika pakatiletu pabara.

⁹Ayi penepo unakwanisa kulonga pamaso pa anthu adakupha ale kuti ndiwe mulungu? Iwe unakhala kwene munthu pyache nee mulungu tayu, m'manja mwa anthu ambakucheka pakhosi ale.

¹⁰Iwe unafa ninga montho mumbafera anthu okhonda gwandwa nsonga yachimuna, m'manja mwa madzinza achilendo. Ndalonga ndine MBUYA Mulungu.”

¹¹MBUYA adalonga pontho kuna ine:

¹²“Iwe mwana munthu, imba nyimbo ya maliro yakulonga pya mfumu wa ku Turo mbulonge kuna iye kuti MBUYA Mulungu akulonga tenepa: Iwe udatandwa mwakuthema monsene mwene, wakudzala na nzeru pontho wakubalika monsene mwene.

¹³Iwe ukhali mu Edeni, m'munda wa Mulungu; mbuthemeserwa na mwala wakudula wamtundu onsene: karinelioni, topazi, na yasipere, kirisolite, berili na onikisi, safire, rubi na emeradi. Pyakuikhamo miyala pyako pikhali pya golidi; pansiku idalengwa iwe, pyonsenepi adamala kukusasanyiraletu.

¹⁴Ndidakuikhira mngelo wamphamvu kukuzondera. Iwe ukhali paphiri yakuchena ya Mulungu; iwe ukhafamba pakati pa miyala ya moto.

¹⁵Makhaliro ako akhali akusowa chakupokanyisa kubulukira pa nsiku idalengwa iwe, kufikirana pyakudawika pidatoma kugumanwa muna iwe.

¹⁶Na thangwi ya kuinjipa kwa malonda akhachita iwe, iwe ndiye udandendeya kuchita pyakuzunguzika, mamalisiro ache mbudawa napyo. Natenepo ninga chinthu chakunyansa ndidakuthamangisa paphiri ya Mulungu, mbandikubulusa pamaso panga. Mngelo wakukuzondera ule adakuthamangisambo kukubulusa pakati pa miyala yakugaka moto.

¹⁷Wasanduka nyakugaya, thangwi ya kubalika kwako, pontho wamala pupwisa nzeru zako kufuna demelero. Natenepo ine ndidakuponyera padziko yapansi; ndidakusandusa chakusekesa pamaso pa mafumu.

¹⁸Na pyakudawa pyako pizinjipyo, pontho na malondako aufaka-faka nawo, iwe waswipisa mbuto yako yakuchena. Natenepo ndidachitisa moto kubuluka muna iwe mbukupisa pikulu pene, mbandikusandusa dotha padziko yapansi pamaso pa anthu onsene akhakuyang'ana ale.

¹⁹Madzinza onsene akhakudziwa kale ale, adatutumuka na kuona dzedze yako; mamalisiro ako mbakugoswa pyakwanga, pontho iwe nkhabe dzaonekave tayu.”

²⁰MBUYA adalonga kuna ine mbati,

²¹“Iwe mwana munthu, pasa nkhodolo mzinda wa Sidoni; longa mphangwa zauprofeti mwakupokanyisana naye

²²mbulonge kuti MBUYA Mulungu akulonga tenepa: Ine ndina mseru na iwe, Sidoni; ine ndinatambira demelero na pinthu pinafuna ine dzachita kuna iwepo. Anthu anapidziwa kuti ine ndine MBUYA, ndzidzi unafuna ine dzakutchunyusa mbandionesa kuchena kwachita ine.

²³Ndinagwisa muliri pana iye mbandichitisa chiropa kukuka m'misewu mwache. Iye anasoswa kukhundu zache zonsene, pontho anyakuchekwawo anati agwe muna iye. Penepo iwo anapidziwadi kuti ine ndine MBUYA.

²⁴“Dzinza ya Israele nkhabe dzakhalave na atsanthemba akuatikana na kuakuwaza ninga ntcheswa na nyakhanche tayu. Penepo iwo anapidziwadi kuti ine ndine MBUYA Mulungu.”

²⁵MBUYA Mulungu akulonga kuti, “Ine ndingagumanyisa anthu a ku Israele kubulukira kumadziko kudaabalalisira ine, ine ndinaonesa kuchena kwanga pakati pawo uku madzinza anango akuona na maso awo. Tenepo iwo anakhala m'dziko mwawo mwene, dziko idapereka ine kuna nyabasanga Yakobo ile.

²⁶Kweneko iwo anakhala pakupata mbamanga nyumba na kubzala mfesa; iwo anakhala pakupata mwenemo ine ndikutchunyusa atsanthembawo akhaachitira pyakuipa ale. Penepo iwo anapidziwadi kuti ine ndine MBUYA Mulungu wawo.”