Read cisena EZEKIELE 3 Bible Online

EZEKIELE 3 - cisena bible

EZEKIELE 3

¹Tenepo iye adalonga kuna ine mbati, “Iwe mwana munthu, idya chinaona iwechi, idya mpukutuwo; ungamala penepo ndoko kalonge kuna dzinza ya Israele.”

²Natenepo ndidayashamula, tenepo iye adandipasa mpukutu ule kuti ndiudye.

³Iye adalonga kuna ine mbati, “Iwe mwana munthu, idya mpukutu wakupasa inewu mbukhutise mimbako.” Natenepo ndidaudya mbutapira ninga uchi m'kanwa mwanga.

⁴Kubuluka penepo iye adalonga kuna ine mbati, “Iwe mwana munthu, ndoko kuna Aisraele mbukalonge kuna iwo mafalangawa.

⁵Ine nee ndikukutuma kuna dzinza yakulonga chilongero chachilendo pontho chakunensa tayu, mbwenye kuna Aisraele,

⁶nee kuna anthu akulu-akulu akulonga pilongero pyakunensa pyakuti iwe nkhabe kupivesa tayu. Ndimomwene kuti ine mbidakutuma kuna anthu enewa, iwo mbadakuvesera.

⁷Mbwenye Aisraele nkhabe funa pyakuvesera, thangwi iwo nkhabe funa kundivesera tayu, podi dzinza yonsene ya Israele njakuuma mtima pontho yakuchimwanika.

⁸Kwache ine ndinakuchitisambo iwepo kukhala wakukhonda kuva pontho wakuuma mtima ninga iwombo.

⁹Ndinachitisa chipumu chako kukhala chakuwanga pyakwanga ninga mwala, chakuwanga ninga mwala wa daimondi; leka chita nawo mantha penu kugoswerwa nawo, podi kwene onsenewo ndi dzinza yakupandukira.”

¹⁰Tenepo iye adalonga kuna ine mbati, “Iwe mwana munthu, vesera mwadidi pontho mbuikhe mumtima mwako mafala onsene analonga ine kuna iwe.

¹¹Chinchino ndoko kuna anthu ako ale ali kudziko ya unyaperezo mbukalonge kuna iwo pinafuna ine, MBUYA Mulungu kulonga kuna iwo, podi akakuvesere penu akhonde pyawo kukuvesera.”

¹²Tenepo Mzimu wa Mulungu adandithukula, penepo ndidava kunduli kwanga kugwenga kwa fala kuti, “Mbikuzwe demelero ya MBUYA Mulungu kumbuto kumbakhala iye kule!”

¹³Ndidava kuphiphidzana kwa maphaphido a pyakulengwa unango na mwanzache pikhambuluka iwo, pontho na ungwinjiri-ngwinjiri wa magaleta a m'khundu ale, ipyo pikhasokosa pyakwanga.

¹⁴Mzimu wa MBUYA adandithukula mbandibulusa pakhali ine pale, tenepo ndidapita mwenemo mwakupha mtima pontho kuzhangali pikulu pene, uku mphamvu za MBUYA zandigudumira pikulu pene.

¹⁵Natenepo ndidafika ku Telabibu, kule kukhakhala anyakukwatwa unyaperezo m'khundu-khundu mwa mkulo wa Kebari. Ine ndidakhala pakati pawo nsiku zinomwe, wakumalwa nzeru na pinthu pidandichitikira pile.

¹⁶Pidagwanda nsiku zinomwe MBUYA adalonga kuna ine mbati,

¹⁷“Iwe mwana munthu, lero ndakuikha nyakulondali dzinza ya Israele; tenepo vesera mafala analonga inewa mbukacheuze nawo anthu.

¹⁸Ngakhala ine ndinalonga kuna munthu wakuipa kuti, ‘Iwe unati ufe,’ mbwenye iwe mbukhonda kumcheuza, penu kulonga pinthu kuti aleke pyakuipa pyachepyo, towera apulumuse moyo wache, munthu weneyo anati afe nyakudawa; kwache chiropa chachecho chinagwera pamsolo pako.

¹⁹Mbwenye ngakhala iwe unamcheuza nyakudawikayo, iye mbakhonda leka pyakudawa pyache, penu mabasache akuipa, iye anati afe thangwi ya pyakudawa pyache; kwache iwe unapulumusa moyo wako.

²⁰“Pontho ngakhala nyakulungama anataya njira mbachita pyakuipa, inembo mbandimuikhira pyakumgwegwedusa m'njira mwache, iye anati afedi. Ngakhala iwe hudamcheuze tayu, iye anati afe thangwi ya pyakudawa pyache. Kulungama kwache konsene nkhabe dzakumbukwave tayu, tenepo chiropa chache chinagwera pamsolo pako.

²¹Mbwenye ngakhala iwe unamcheuza nyakulungama kuti aleke dawa, iye mbalekadi pyakudawa pyache, iye anakhala na moyo thangwi adava kucheuzwa, pontho iwe unapulumusa moyo wako.”

²²Penepo mphamvu za MBUYA zidandigudumira, pontho iye adalonga kuna ine mbati, “Lamuka, ndoko kuphedi, tenepo kweneko ndinakalonga nawe.”

²³Natenepo ndidalamuka mbandienda kuphedi kule. Tenepo demelero ya MBUYA idaimira penepo, ninga demelero yontho ikhadaona ine m'khundu-khundu mwa mkulo wa Kebari ile. Penepo ine ndidapigwisa na fufumimba.

²⁴Kubuluka penepo Mzimu wa MBUYA adapita muna ine mbandichitisa kuimira dzololo. Iye adalonga kuna ine mbati, “Ndoko kapifungire m'nyumba mwako.

²⁵Iwembo mwana munthu, iwo anati akumange na nkhambala; iwe unamangwa mwakuti unachimwana na kubuluka kwene panja kwenda pakati pa anthu ako.

²⁶Ine ndinachitisa lulume yako kumangika, towera ukhale pyako mulomo phoo, pontho udzachimwane kuasumulula podi kwene kuti iwo ndi dzinza yakupandukira.

²⁷Mbwenye ine ndingalonga nawe, ndinafungula mulomo wako, tenepo iwe wathema kulonga kuna iwo kuti, ‘MBUYA Mulungu akulonga tenepa: Munthu onsene anafuna pyakuveserayo, mbavesere, pontho munthu onsene anakhonda funa pyakuveserayo mbakhonde pyache; thangwi iwo ndi dzinza yakupandukira.’ ”