Read cisena EZEKIELE 30 Bible Online

EZEKIELE 30 - cisena bible

EZEKIELE 30

¹MBUYA adalonga kuna ine mbati,

²“Iwe mwana munthu, longa mphangwa zauprofeti kuti ine, MBUYA Mulungu ndikulonga tenepa: Kalala mbulonge kuti, ‘Mama ine, nsiku yadzedze ikudza!’

³Thangwi nsiku ili chifupi, nsiku ya MBUYA ili chifupi; nsiku ya makole, ndzidzi wa dzedze ya madzinza.

⁴Talasada inabwera pana Iguputo, pontho kusanyika kukulu kunabwera pana Kushi. Anthu azinji anaphiwa mu Iguputo, mfumache inakwatwa, pontho maziko ache anamala tchikhulwa.

⁵Kushi na Puti, Ludi na Arabia onsene, Libia na anthu a m'madziko, ale akhali na Iguputo gulu ibodzi ya nkhondo, anafa na talasada pabodzi pene na iye.

⁶“Ine, MBUYA ndikulonga tenepa: Anyagulu ibodzi na Iguputo anamala kundwa, pontho anyankhondo ache akudungudza anaphiwa. Kubulukira ku Migidoli mpakana ku Asiwani iwo anamala phiwa pankhondo. Ndalonga ndine MBUYA Mulungu.

⁷Dziko ya Iguputo inasakazika kupiringana madziko anango onsene a padziko yapansi, pontho mizindache inamala vungwa.

⁸Penepo iwo anapidziwadi kuti ine ndine MBUYA, ndingadumika moto Iguputo mbandimala kuvunga anyakumphedzache onsene.

⁹“Pansiku yeneyo ndinatuma anyamphangwa na miyadiya kwenda kathuswa anthu a ku Kushi, ale nkhabe famba chewu-chewu tayu. Iwo anaphatwa na mantha makulu nsiku inava iwo pya kuvungika kwa dziko ya Iguputo, thangwi nyatwazo zinati zimgwere basi.

¹⁰“Ine, MBUYA Mulungu ndikulonga tenepa: Ine ndinamala vunga magulu a anyankhondo a ku Iguputo pakuphatisa basa mphamvu za Nebukadinezara mfumu wa Babiloni.

¹¹Iye na anyankhondo ache ene, madzinza avinga pyakwanga ale, anadzeswa dzavunga dzikoyo. Iwo anasolola matalasadawo pana Iguputo mbadzaza dziko yonsene na anyakuchekwa.

¹²Mkulo wa Nailo ndinamala kuuumisa mbandigulisa dzikoyo kuna amuna akuipa; na mkono wa anthu akudza pyawo, ndinavunga dziko na pyonsenene pili mwenemo pile. Ndalonga ndine MBUYA.

¹³“Ine MBUYA Mulungu ndikulonga tenepa: Ine ndinavunga mifanikizo mbandimalisa kupembedza milungu mu Memfisi. Mu Iguputo nkhabe dzakhalave mfumu tayu, m'dziko monsenemo ndinati ndigwisemo mantha.

¹⁴Nthemba ya Patirosi ndinaisakaza, ndinadumika moto Zoani, mbanditchunyusa mzinda wa Tebesi.

¹⁵Ukali wanga ndinaukhuthulira pana Pelusiamu, mzinda wakutchingwa na mpanda mu Iguputo ule, mbandivunga magulu a anyankhondo mu Tebesi.

¹⁶Ndinadumika moto Iguputo; Pelusiamu anava kupha pyakwanga. Tebesi anambumbuluthwa na chonzi; Memfisi anaona nyatwa nsiku na nsiku.

¹⁷Aphale a kumizinda ya Heliopolisi na Bubasitisi anaphiwa na talasada, pontho anthu awo anakwatwa unyaperezo.

¹⁸Mu Tahipanihesi masikati anasanduka mdima, ndzidzi unafuna ine dzamalisa mphamvu za Iguputo; penepo anyankhondo ache akudungudza ndinamala kuavunga. Iguputo anaphimbirwa na makole, pontho anthu a m'midzi yache anamala kwatwa unyaperezo.

¹⁹Na njira yeneyi ndinatchunyusa Iguputo, penepo iwo anapidziwadi kuti ine ndine MBUYA.”

²⁰Chaka chakhumi na chibodzi, pansiku ya chinomwe ya mwezi wakutoma wa unyaperezo wathu, MBUYA adalonga kuna ine mbati,

²¹“Iwe mwana munthu, ine ndakhumula mkono wa mfumu wa ku Iguputo. Iwo nkhabe mangwa tsakala kuti uwange, penu kumangirirwa kansekete tayu kuti ukhale na mphamvu zakuphata pontho talasada.

²²Natenepo ine MBUYA Mulungu ndikulonga tenepa: Ine ndina mseru na mfumu wa ku Iguputo. Ine ndinakhumula mikono yache yonsene miwiri, mkono wadidi maka wasala ule, pontho na wakukhumuka kale ule, mbandichitisa talasada kudoda pyayo yokha ene m'manja mwache.

²³Anthu a ku Iguputo ndinaabalalisa pakati pa madzinza anango mbandiathamangisira kumadziko onsene.

²⁴Ndinapasa mphamvu mikono ya mfumu wa ku Babiloni mbandiikha talasadanga m'manja mwache, kwache ndinakhumula mikono ya mfumu wa ku Iguputo, tenepo iye anabulira pamaso pache ninga munthu wakukuwazwa pikulu pene.

²⁵Ndinapasa mphamvu mikono ya mfumu wa ku Babiloni, mbwenye mikono ya mfumu wa ku Iguputo inachita chiwewa. Penepo iwo anapidziwadi kuti ine ndine MBUYA, ndingaikha talasadanga m'manja mwa mfumu wa ku Babiloni, iyembo mbaiphatisa basa pana Iguputo.

²⁶Anthu a ku Iguputo ndinaabalalisa pakati pa madzinza anango mbandiathamangisira kumadziko onsene. Penepo iwo anapidziwadi kuti ine ndine MBUYA.”