Read cisena EZEKIELE 31 Bible Online

EZEKIELE 31 - cisena bible

EZEKIELE 31

¹Chaka chakhumi na chibodzi, pansiku yakutoma ya mwezi wachitatu wa unyaperezo wathu, MBUYA adalonga kuna ine mbati,

²“Iwe mwana munthu, longa kuna mfumu wa Iguputo na magulu a anyankhondo ache kuti: Mbani anakwanisa kusangizwa na iwe mfumu?

³Iwe wakhala ninga muti wamkungudza mu Lebanoni, wakukhala na nthambi wakubalika, pontho wakuvata; iwo udalapha kufika kudzulu mbupiringana miti inango yonsene yakulapha.[22]

⁴Madzi adauthirira mwadidi, mphuno za madzi zidauchitisa kulapha; mikulo idafamba mwakuzungulira tchinde yache, pontho idatumiza migelo ya madzi kuna miti yonsene mumsitumo.

⁵Natenepo mutiwo udalapha pyakwanga kupiringana miti inango yonsene ya mumsitumo; nthambi zache zidainjipa pyakwanga, nthambi zache zidakula pontho mbazivata mwadidi, thangwi ya kuinjipa kwa madzi.

⁶Mbalame zamtundu onsene zidamanga pisa pyawo m'nthambizo, pontho nyama zonsene zam'tsanga zidateyana pansi pache; madzinza onsene a padziko yapansi adapuma pansi pa mthunzi wache.

⁷Mutiwo ukhali ukulu pontho wakubalika pyakwanga, wakukhala na nthambi zakuvata mwadidi, thangwi mitsitsi yache idapita pansi kuna madzi azinji.

⁸Mikungudza ya m'munda wa Mulungu ule hidakwanise tayu kuupiringana, nee muti wapaina kukhala sasawa na nthambi ninga zenezi tayu, penu miti ya njale kukhala ninga nthambi zache tayu, nee muti na ubodzi ene m'munda wa Mulungu wakukoma m'maso ninga muti wenewu tayu.

⁹Ine ndidauchitisa kukhala wakukoma m'maso wakukhala na nthambi zizinji. Muti onsene mu Edeni, m'munda wa Mulungu ukhachita bivu na muti wenewu.

¹⁰“Natenepo ine MBUYA Mulungu ndikulonga tenepa: Na thangwi yakuti muti wenewu udalapha pyakwanga pene kupiringana miti yonsene ya mumsitu, pontho kuti ukhanyada na kulapha kwacheko,

¹¹ine ndidaupasa nkhodolo mbandiupereka m'manja mwa mtongi wa madzinza kuti achite pyache pyonsene pinafuna iye malingana na kudawika kwache.

¹²Tenepo alendo akubulukira kuna madzinza avingaletu adaugwanda mbausiya pyawo gwamwa. Nthambi zache zonsene zidagwera pamapiri na m'phedi; nthambi zache zidamala thyokera m'mikulo yonsene m'dzikomo. Madzinza onsene a padziko yapansi adabuluka mumthunzi mwachemo mbaenda pyawo.

¹³Mbalame zonsene zidadza mbizikhazikika m'muti wakugwawo, pontho nyama zonsene zam'tsanga zidakhala m'nthambi zachezo.

¹⁴Natenepo kutomera lero kwenda mtsogolo, nkhabe muti na ubodzi ene wakukhala m'khundu-khundu mwa madzi unalaphave ninga wenewo tayu, penu nsonga zache kulapha kupiringana miti yonsene ya mumsitu tayu.[23] Nkhabe miti inango yakuthirirwa mwadidi inalapha ninga muti wenewu tayu; yonsene yathema kuvungwa, pabodzi pene na anthu a padziko yapansi, ambafa mbatchithira ku Chiphompho chikulu ale.

¹⁵“Ine MBUYA Mulungu ndikulonga tenepa: Pansiku idendeswa mutiwo kudziko ya anyakufa, ndidafunga mphuno za madzi kuonesa kusintili kwanga; mikulo yonsene ndidamala kuiphata, tenepo madzi awo azinji ale adaleka kufamba. Na thangwi ya mutiwo, ine ndidagudumira Lebanoni na mdima ukulu, tenepo miti yonsene ya mumsitu wenewu idamala unyala.

¹⁶Ndidachitisa madzinza kutetemera na kuva dungu ya kuvungwa kwache, ndzidzi udautchithisira ine kudziko ya anyakufa pabodzi pene na anyakwenda ku Chiphompho chikulu ale. Penepo miti yonsene ya mu Edeni, miti yadidiletu pontho yakusankhulika ya ku Lebanoni, miti ikhathirirwa mwadidi ile, idasekera m'dziko ya anyakufa thangwi yakuvungika kwache.

¹⁷Onsene ale akhakhala mumthunzi mwache, ashamwali ache pakati pa madzinza, adendambo naye pabodzi kudziko ya anyakufa ale, kakhala pabodzi na anthu adaphiwa pankhondo ale.

¹⁸“Ngupi muti wache mu Edeni unakwanisa kusangizwa na iwe kubalika pontho kukhala na chilemedzo? Kwache iwembo unaponyerwa kudziko ya anyakufa pabodzi pene na miti ya mu Edeni; iwe unagona pakati pa anthu okhonda gwandwa nsonga yachimuna, na anthu adaphiwa pankhondo ale. “Mutiwo ndi mfumu wa ku Iguputo na magulu ache onsene a anyankhondo. Ndalonga ndine MBUYA Mulungu.”