Read cisena EZEKIELE 32 Bible Online

EZEKIELE 32 - cisena bible

EZEKIELE 32

¹Chaka chakhumi na chiwiri, pansiku yakutoma ya mwezi wakhumi na chiwiri wa unyaperezo wathu, MBUYA adalonga kuna ine mbati,

²“Iwe mwana munthu, imba nyimbo ya maliro yakulonga pya mfumu wa ku Iguputo mbulonge kuna iye kuti: Iwe wapiyesa wekha ene ninga nkhalamu pakati pa madzinza, kwache iwe wakhala ninga ng'ona m'madzi, ule ambathubudza pikulu m'mikulo kukuvulira madzi na manyalo ako pontho kuswipisa mikulo na matope.

³“Ine MBUYA Mulungu ndikulonga tenepa: Na msoka ukulu wa madzinza ndinati ndikuponyere kokota yanga, tenepo iwo anakukuludza na kokotayo.

⁴Ine ndinakuponyera kumtunda mbandikusiya pakwecha phesere. Ndinachitisa mbalame zonsene kuphama pana iwe, pontho nyama zam'tsanga padziko yonsene yapansi zinakukhwadzula-khwadzula.

⁵Pamapiri ponsene ndinathasikapo nyamako mbandidzaza maphedi onsene na manyenyeswa a mtembo wako.

⁶Ndinachitisa dziko kukuka na chiropa chanu mpakana kumapiri, pontho mikulo inadzala na manyenyeswako.

⁷Ndingamala kukuvungani, ndinaphopha kudzulu mbandiswipisa nyenyezi; dzuwa ndinaibisa na makole, pontho mwezi nkhabe dzaonesa cheza chache tayu.

⁸Pyakumwinikira pyonsene pyakudzulu ndinati ndipithimise pana imwe; ndinadzesa chidima padziko yapansi. Ndalonga ndine MBUYA Mulungu.

⁹“Ndinachitisa mitima ya anthu azinji kusanyika pyakwanga ndingavekesa mbiri yakuvungika kwako pakati pa madzinza, pontho kuna madziko anakhonda iwe dziwa ale.

¹⁰Ndinachitisa anthu azinji kututumuka na kuona dzedze yako, pontho mafumu awo anagedemera na mantha, ndzidzi unafuna ine dzadzesa talasadanga pana iwe. Pansiku ya kuvungwa kwako onsenewo anatetemera na mantha okhonda lekeza, thangwi ya kugopa pinafuna dzaachitikira.

¹¹“Ine MBUYA Mulungu ndikulonga tenepa: Talasada ya mfumu wa ku Babiloni inabwera pana iwe.

¹²Ndinachitisa magulu a anyankhondo ako kuphiwa na matalasada a anyankhondo amphamvu, amuna akukalaletu mtima pakati pa madzinza anango onsene ale. Iwo anasakaza pinthu pyonsene pimbanyada na Iguputo, pontho magulu a anyankhondo ache onsene anamala phiwa.

¹³Ndinavunga ng'ombe zako zonsene m'khundu-khundu mwa mikulo yonsene. Panakhala nkhabe munthu kuswipisa madziwo, penu manyalo a ng'ombe kukuvulira madziwo tayu.

¹⁴Penepo ndinachitisa madzi ache kudenkhera, pontho kuchitisa mikulo yache kufamba ninga mafuta. Ndalonga ndine MBUYA Mulungu.

¹⁵Ndingasandusa Iguputo thando yatchetcha, mbandisakaza dzikoyo monsene mwene, ndingapha anthu onsene ambakhala mwenemo ale, penepo iwo anapidziwadi kuti ine ndine MBUYA.

¹⁶“Yeneyi ndi nyimbo ya maliro inafuna iwo dzamulira nayo. Akazi a madzinza anango anaiimba kusintili nayo; kusintili Iguputo na magulu a anyankhondo ache onsene. Ndalonga ndine MBUYA Mulungu.”

¹⁷Chaka chakhumi na chiwiri, pansiku ya khumi na chishanu ya mwezi wakutoma[24] wa unyaperezo wathu, MBUYA adalonga kuna ine mbati,

¹⁸“Iwe mwana munthu, lira thangwi ya magulu a anyankhondo a Iguputo. Agwinyeni pabodzi pene na madzinza anango amphamvu kuti aende ku Chiphompho chikulu.

¹⁹Longa kuna iwo kuti, ‘Ayi iwe ndiye nyakubalika pikulu kupiringana anango onsene? Ndoko ku Chiphompho chikulu mbukagone kweneko pakati pa anyakukhonda gwandwa nsonga yachimuna.’

²⁰Iwo anagwera kubodzi na anthu onsene adaphiwa pankhondo ale. Talasada yachololwa, mulekeni ambuluthwe kubodzi kwene na magulu ache onsene a anyankhondo ale.

²¹M'bwaloletu m'dziko ya anyakufa akadamu amphamvu analonga pya Iguputo na ashamwali ache onsene kuti, ‘Iwo atchithira kuno, tenepo iwo ali gada na anthu okhonda gwandwa nsonga yachimuna, pabodzi pene na anthu adaphiwa pankhondo ale.’

²²“Asiria ali kweneko pabodzi pene na anyankhondo ache onsene; iye azungulirwa na nthumbi za anthu ache adaphiwa ale, onsene adamala phiwa pankhondo ale.

²³Masiye awo ali pansiletu m'Chiphompho chikulu, pontho anyankhondo ache ali gada-gada kuzungulira masiye ache. Onsene ale akhadathuswa dziko ya anthu a moyo ale thasa-thasa, amala phiwa pankhondo.

²⁴“Elamu alimbo kweneko uku nthumbi yache yazungulirwa na magulu a anyankhondo ache onsene, onsenewo ali thasa-thasa, amala phiwa pankhondo. Onsene akhathuswa dziko ya anthu a moyo ale, aenda okhonda gwandwa nsonga yachimuna kudziko ya anyakufa. Iwo akuchita manyadzo pabodzi pene na anthu ambaenda ku Chiphompho chikulu ale.

²⁵Elamu asasanyirwa talimba pakati anyakuchekwa. Iye azungulirwa na masiye a magulu a anyankhondo ache onsene. Onsenewo mbanthu okhonda gwandwa nsonga yachimuna, adaphiwa pankhondo ale. Na thangwi ya kuthuswa anthu kudachita iwo konsene kwene m'dziko ya anthu amoyo, lero iwo akuchita manyadzo pabodzi pene na anthu ambaenda ku Chiphompho chikulu ale; iwo ali gada-gada pakati pa anthu adaphiwa pankhondo ale.

²⁶“Mesheki na Tubali ali kwenekombo pabodzi pene na magulu a anyankhondo awo onsene kuzungulira masiye awo. Onsenewo mbanthu okhonda gwandwa nsonga yachimuna, adaphiwa pankhondo ale, thangwi ya kuthuswa anthu kudachita iwo konsene kwene m'dziko ya anthu amoyo.

²⁷Iwo hadaikhwe m'masiye na demelero tayu ninga anyankhondo akuveka a anthu okhonda gwandwa nsonga yachimuna,[25] ale adatchithira kudziko ya anyakufa na pida pyawo pyankhondo pene, uku atsamira matalasadawo ninga nsago, pontho magogodo awo aphimbirwa na pyakugedera matswimo pyawo. Kalene anyankhondo akuvekawa akhathuswa anthu konsene kwene m'dziko ya anthu amoyo.

²⁸“Iwembo mfumu wa ku Iguputo unavungwa mbugonambo pakati pa anthu okhonda gwandwa nsonga yachimuna, anthu adaphiwa pankhondo ale.

²⁹“Edomu ali kweneko pabodzi pene na mafumu ache pontho atongi ache onsene; podi kwene kuti iwo akhali amphamvu pyakwanga, mbwenye lero ali gada pabodzi pene na anyakuphiwa pankhondo. Iwo ali gada na anthu okhonda gwandwa nsonga yachimuna, ale adenda ku Chiphompho chikulu.

³⁰“Atongi onsenene akumpoto ali kweneko, pontho na anthu onsene a ku Sidoni; iwo aenda pabodzi pene na anyakuphiwa mwakuchitiswa manyadzo, thangwi ya kuthuswa konsene kukhachita iwo na mphamvu zawo. Iwo mbanthu okhonda gwandwa nsonga yachimuna, pontho ali gada pabodzi pene na anthu adaphiwa pankhondo ale. Iwo adachita manyadzo pabodzi pene na anthu ambatchithira ku Chiphompho chikulu ale.

³¹“Mfumu wa Iguputo, pabodzi pene na anyankhondo ache onsene, anaona mbasekera thangwi ya kuvungika kwa magulu a anyankhondo ache onsene ale adamala phiwa pankhondo. Ndalonga ndine MBUYA Mulungu.

³²“Podi kwene kuti ndine ndidamchitisa kuthuswa m'dziko ya anyamoyo, kwache mfumu wa ku Iguputo pabodzi pene na magulua anyankhondo ache onsene a anyankhondo anagona gada pabodzi na anthu okhonda gwandwa nsonga yachimuna, anthu adaphiwa pankhondo ale. Ndalonga ndine MBUYA Mulungu.”