Read cisena EZEKIELE 33 Bible Online

EZEKIELE 33 - cisena bible

EZEKIELE 33

¹MBUYA adalonga kuna ine mbati,

²“Iwe mwana munthu, longa kuna anthu ako kuti: Ine ndingadzesa nkhondo m'dziko, tenepo anthu a m'dzikomo angasankhula mbodzi wa anthu awo mbamuikha kukhala nyakulondali,

³tenepo munthuyo angaona anyamalwa akudza, iye mbaliza ngoma ya chidziwiso kucheuza anthu,

⁴tenepo ngakhala munthu anava kulira kwa ngomayo mbakhonda ikha konta, nkhondoyo mbifikadi munthuyo mbafa, chiropa chache chinati chigwere pamsolo pache.

⁵Podi iye adava kulira kwa ngoma kumcheuza mbakhonda kupiikha konta, penepo chiropa chache chinati chigwere pamsolo pache. Iye mbadaikha konta kucheuzwa kule, iye mbadapipulumusa yekha ene.

⁶Kwache ngakhala nyakulondali anaona anyamalwa akudza, iye nee liza ngoma kucheuza anthu tayu, tenepo anyamalwawo angadza mbapha mbodzi wa anthuwo, penepo munthu weneyo anaphiwa thangwi ya pyakudawa pyache, kwache chiropa chache chinagwera pamsolo pa nyakulondaliyo.

⁷“Iwe mwana munthu, ine ndakuikha kukhala nyakulondali wa dzinza ya Israele; tenepo vesera mafala analonga inewa mbukacheuze nawo anthu.

⁸Ngakhala ndinalonga kuti, ‘Iwe nyakudawa, unati ufe,’ iwe mbukhonda kulonga kuna iye kumcheuza kuti aleke pyakudawa pyache, munthu weneyo anati afe thangwi ya pyakudawa pyache, kwache chiropa chache chinagwera pamsolo pako.

⁹Mbwenye ngakhala iwe unamcheuza nyakudawika kuti aleke pyakudawa pyache, iye mbakhonda kuchita tenepo, iye anati afe, thangwi ya pyakudawa pyachepyo, kwache iwe unapulumusa moyo wako.

¹⁰“Iwe mwana munthu, longa kuna dzinza ya Israele kuti: Imwe mukulonga kuti, ‘Umambalathu na pyakudawa pyathu pikutilemera, pontho tikumala pakatika thangwi ya pinthu pimbachita ife. Apo tinakwanisa tani kukhala na moyo?’

¹¹Longa kuna iwo kuti MBUYA Mulungu akulonga tenepa: Ine ninga Mulungu wamoyo, nkhabe komerwa na imfa ya anyakudawika tayu. Mbwenye ndimbakomerwa kuona anyakudawikawo aleka pyakudawa pyawo mbakhala na moyo. Imwe dzinza ya Israele zungunukani! Lekani pyakudawa pyanu! Thangwi yache ninji munafuna kuti mufe?

¹²“Natenepo, iwe mwana munthu, longa kuna anthu a dzinzako kuti, ‘Munthu wakulungama angadawa, kulungama kwacheko nkhabe dzampulumusa tayu, pontho ngakhala nyakudawa analeka pyakudawa pyache, iye nkhabe dzatchunyuswa tayu thangwi ya pyakudawa pidachita iye pile. Ngakhala nyakulungama anadawa, iye nkhabe dzakhala na moyo tayu thangwi yakuti pakutoma iye akhali nyakulungama.’

¹³Mbwenye ngakhala ndinampanga nyakulungama kuti iye anati akhale na moyo, kwache iye mbanyindira kulungama kwacheko mbachita pyache pyakuipa, ine nkhabe dzawerengera tayu na chibodzi chene pa mabasache adidi adachita iye ale; iye anafa thangwi ya pyakudawa pyachita iye.

¹⁴Pontho ngakhala ndinalonga kuna nyakudawika kuti, ‘Iwe unati ufe,’ kwache m'nduli mwache mbaleka pyakudawa pyache mbachita pyakulungama pontho pyadidi

¹⁵ngakhala iye anabwezera pinthu pidaphatira iye pinyolo pile penu kubwezera pinthu pidaba iye, mbateweza matongero akupasa moyo, pontho kuleka pyakudawa pyache, iye anati akhale na moyo; iye nkhabe dzafa tayu.

¹⁶Nkhabe na chibodzi chene cha pyakudawa pyachita iye pinakumbukwa tayu. Iye anati akhale na moyo, thangwi achita pyakulungama pontho pyadidi.

¹⁷“Kwache anthu a dzinzako ambalonga kuti, ‘Njira za Mbuya si zakulungama tayu.’ Nkhabe, zakupotoka ndi njira zawo.

¹⁸Ngakhala nyakulungama analeka chita pyakulungama mbachita pyakuipa, iye anati afe thangwi ya penepi.

¹⁹Ngakhala nyakuipa analeka pyakudawa pyache mbachita pyakulungama pontho pyadidi, iye anapulumusa moyo wache.

²⁰Kwache imwe dzinza ya Israele mumbalonga kuti, ‘Njira za MBUYA si zakulungama tayu.’ Kwache ine ndinatonga mseru munthu onsene wa imwe malingana na mabasache.”

²¹Chaka chakhumi na chiwiri, pansiku yachishanu ya mwezi wakhumi wa unyaperezo wathu, munthu unango ule akhadathawa ku Yerusalemu adadza kuna ine mbalonga kuti, “Mzinda wavungwa.”

²²Usiku mwache munthuyo mbadzati fika mphamvu za MBUYA zidandigudumira. Mbwenye na machibese mwache, pidafika munthu ule, MBUYA adandifungula mulomo. Tenepo mulomo wanga udafunguka mbandikhonda khalave mulomo phoo.

²³MBUYA adalonga kuna ine mbati,

²⁴“Iwe mwana munthu, anthu ale anakhala m'madembe a dziko ya Israele akulonga kuti, ‘Abrahamu akhali munthu mbodzi basi, kwache iye adapaswa dziko yonsene ninga yache ene. Mbwenye ife ndife azinji, ndimomwene dziko yaperekwa kuna ife.’

²⁵“Natenepo longa kuna iwo kuti: Ine MBUYA Mulungu ndikulonga tenepa: Podi imwe mukuthimiza basi kudya nyama kubodzi kwene na chiropa chache, kupembedza mifanikizo, pontho kuchuchisa chiropa, ayi imwe nkhukwata basi dzikoyi ninga yanu ene?

²⁶Imwe mumbanyindira matalasadanu mbamuchita pinthu pyakunyansa, pontho munthu onsene wa imwe ambachita pyakuzuda na mkazi tsanthembache. Apo imwe nkhukwata basi dzikoyi ninga yanu ene?

²⁷“Longa kuna iwo kuti: Ine MBUYA Mulungu ndikulonga tenepa: Ine ninga Mulungu wamoyo, anthu asalira m'madembe ale anaphiwa pankhondo. Anthumbo anakhala kutsanga ale, anadyiwa na nyama zam'tsanga, pontho ale anabisala m'mbuto zakupata pontho kunkhwimba, anafa na muliri.

²⁸Ine ndinasandusa dzikoyi thando yatchetcha, pontho mphamvu zikhanyada na iwo zile zinati zimale. Mapiri a Israele anasanduka msitu wakugoswa pyakwanga mwakuti nkhabe munthu anafuna dzagwanda namove tayu.

²⁹Penepo anapidziwa kuti ine ndine MBUYA, ine ndingasakaza dzikoyo mbandiisandusa thando yatchetcha, thangwi ya pinthu pyakunyansa pyachita iwo pile.

³⁰“Kulonga pya iwe, mwana munthu, anthu a dzinzako akulonga pya iwe kuna unango na mwanzache pinagumanyikana iwo pampanda, pontho m'misuwo ya nyumba zawo kuti, ‘Tendeni, tivesere mafala akubulukira kuna MBUYA.’

³¹Anthu anga ambadza kuna iwe ninga mumbachitira iwo ndzidzi onsene mbakhala pamaso pako kufuna kuvesera pinafuna iwe longa, kwache iwo nkhabe chita pinthu pimbaapanga iwe pile tayu. Na m'kanwa mwawo iwo ambaonesadi kuti ambandifuna, kwache mitimawo imbakhumba kuganyali mwakuba.

³²Kuna iwo, iwe si pinthu tayu kusangiza na munthu ule ambaimba nyimbo zakukoma na chikolingo mbaimba pontho mwadidi na pyakuimbira, thangwi iwo ambavesera mafalako, kwache iwo nkhabe chita tayu pinalonga iwepyo.

³³Kwache pinthu pyonsenepi pingakwana-kwana; ande, ipyo pinati pichitikedi, penepo iwo anapidziwadi kuti pakati pawo pakhali mprofeti.”