Read cisena EZEKIELE 34 Bible Online

EZEKIELE 34 - cisena bible

EZEKIELE 34

¹MBUYA adalonga kuna ine mbati,

²“Iwe mwana munthu, longa mwakupokanyisana na amakabuswa a Aisraele. Longa mphangwa zauprofeti kuna iwo kuti MBUYA Mulungu akulonga tenepa: Dzedze kuna imwe amakabuswa a Aisraele, ale mumbatsalakana pya imwe mwekha basi! Ayi imwe mudatheme tayu kuyang'anira mabira?

³Imwe mumbamwa mafuta amkaka mbamuvala nguwo zakusasanywa na ubweya, pontho kupha mabira akunenepa, kwache imwe nkhabe tsalakana mabira tayu.

⁴Mabira akusowa mphamvu imwe nee mwaapasa mphamvu tayu, penu kuwangisa mabira akudwala tayu. Imwe nee mwamanga tsakala mabira akukuwazika, penu kubweza kokha mabira akwenda pyawo chimpune-pune, penu kusaka mabira akutayika tayu. M'mbuto mwache imwe mumbaachitira vinga pontho kuakalira mtima.

⁵Natenepo iwo adamala balalikana thangwi pakhali nkhabe makabuswa, tenepo pidabalalika iwo, adasanduka nyama kuna pirombo pyonsene pyam'tsanga.

⁶Mabira anga adenda pyawo mbatsalakatika m'pitunda na m'mapiri. Iwo amala balalikira ponsene pene padziko yapansi mbapasowa munthu na mbodzi ene wakuakusa penu kuasaka-saka tayu.

⁷“Natenepo imwe amakabuswa veserani mafala a MBUYA!

⁸Ine ninga Mulungu wa moyo, ine MBUYA Mulungu ndikulonga tenepa: Mabiranga akusowa makabuswa, pontho aphatwa mbasanduka nyama kuna pirombo pyonsene pya m'tsanga. Amakabuswa hadende kaasaka tayu, m'mbuto mwache mbatsalakana pya iwo okha basi, nee kutsalakana mabiranga tayu.

⁹Natenepo imwe amakabuswa, veserani mafala a MBUYA Mulungu!

¹⁰Ine MBUYA Mulungu ndikulonga tenepa: Ine ndina mseru na amakabuswa, pontho chiropa cha mabiranga chinagwera pamsolo pawo. Iwo nkhabeve dzakhala amakabuswa a mabiranga tayu. Ine ndinaalekesa kuyang'anira mabiranga, towera amakabuswa aleke kupinenepesa okha ene. Ine ndinapokosera mabiranga kukanwa kwawo, tenepo iwo nkhabe dzakhalave pyakudya kuna iwo tayu.

¹¹“Ine MBUYA Mulungu ndikulonga tenepa: Ine ene mwenechiroache ndinaasaka-saka mabiranga mbandiayang'anira ndekha ene.

¹²Ninga mumbachitira makabuswa kuyang'anira mabirache akhadabalalika ale mwenemo iye ali nawo, sasawambo ine ndinayang'anira mabiranga. Ine ndinati ndiakuse kubulukira kumbuto zonsene kukhadabalaliswa iwo kule pansiku yamdima pontho yakugoswa ile.

¹³Ine ndinati ndiabuluse pakati pa madzinza mbandiagumanyisa kubulukira kumadziko anango, tenepo ndinaadzesa kudziko yawo ene. Ine ndinadyesa pamapiri a Israele, m'maphedi, pontho na mbuto zonsene zinakhala anthu zile.

¹⁴Ine ndinaadyesa mpovu wadidi, pontho mapiri a Israele ndiye anafuna dzakhala mbuto yawo ya mpovu. Kweneko iwo anagona pyawo lamba-lamba mumpovu wa bidoo mbadya pyawo mpovu wadidi ninga munafunira iwo pamapiri a Israele.

¹⁵Ine ene mwenechiroache ndinakhala makabuswa wa mabiranga, mbandiachitisa kugona pyawo lamba-lamba kupuma. Ndalonga ndine MBUYA Mulungu.

¹⁶“Ndinasaka-saka mabira onsene akutayika mbandibweza mabira onsene akwenda pyawo chimpune-pune. Mabira akukuwazika ndinaamanga pironda pyawo mbandipasa mphamvu mabira onsene akusowa mphamvu, kwache onsene akunenepa pontho amphamvu ndinamala kuavunga. Thangwi ndine makabuswa wakuchita pyakulungama.

¹⁷“Kulonga pya imwe mkumbi wanga, ine MBUYA Mulungu ndikulonga tenepa: Ine ndinatonga mseru pakati pa bira na bira mnzache, pontho pakati pa mabira amuna na mbuzi.

¹⁸Ayi kudya mpovu wadidi hamudakwane nako tayu? Ayi imwe mwathema kupondedza pyanu na manyalo anu mpovu wakusalira ule? Ayi kumwa madzi akudenkhera nkhabe kwana nako tayu? Ayi imwe mwathema kukuvulira pyanu na manyalo anu madzi asalirawo?

¹⁹Ayi mabiranga athema kudya mpovu wamala imwe pondedzawo, mbamwa madzi amala imwe kuvulirawo?

²⁰“Natenepo ine MBUYA Mulungu ndikulonga tenepa kuna iwo: Yang'anani, ine ene ndekha ndinati nditonge mseru pakati pa mabira akunenepa na akusowa mphamvu.

²¹Podi imwe mabira akusowa mphamvu mudaamenya mbamuagwinyira kutali, pontho mudaadima na nyanga zanu kuathamangisira kutali,

²²ine ndinati ndipulumuse mabiranga. Tenepo iwo nkhabe dzaphatwave pontho tayu. Ine ndinatonga mseru pakati pa bira na bira mnzache.

²³Ine ndinaaikhira nyabasanga Davite kukhala makabuswawo mbodzi ene basi, tenepo iye anaayang'anira mwadidi. Iye anaayang'anira mwadidi mbakhala makabuswawo.

²⁴Ine MBUYA ndinakhala Mulungu wawo, pontho nyabasanga Davite anakhala mfumu pakati pawo. Ndalonga ndine pano.

²⁵“Ine ndinachita nawo chiverano chamtendere mbandibulusa nyama zonsene zakugoswa m'dzikomo, towera mabiranga akwanise kukhala m'tsanga, pontho kugona m'misitu pakupata.

²⁶Ine ndinaatsanzayisa mbakhala mbuto zakuzungulira phiri yanga.[26] Kweneko ndinawazirako mafazi pandzidzi wache; mafaziwo anakhala mtsanzayiso.

²⁷Miti inabala nsapo, pontho mataka anabalisa mbewu; anthu anakhala pakupata m'dzikomo. Iwo anapidziwa kuti ine ndine MBUYA, ndingabulusa goli-goli m'khosi mwawo, pontho kuabulusa m'manja mwa anthu akhadaachitisa kukhala mabitchu ale.

²⁸Madzinza nkhabe dzapokoserave pinthu pyawo tayu, pontho iwo nkhabe dzadyiwa na nyama zam'tsanga tayu. Iwo anakhala pakupata, pontho nkhabe munthu unango anafuna dzaathuswa tayu.

²⁹Ine ndinaapasa dziko ya mataka akubalisa pinthu, tenepo iwo nkhabe dzatcherengave na njala m'dzikomo, penu dzasekwa na madzinza anango tayu.

³⁰Penepo iwo anapidziwadi kuti ine, MBUYA Mulungu wawo ndili nawo, pontho kuti iwo, dzinza ya Israele, mbanthu anga. Ndalonga ndine MBUYA Mulungu.

³¹Imwe mabiranga, mkumbi umbadya mpovu wanga ule, ndimwe anthu anga, inembo ndine Mulungu wanu. Ndalonga ndine MBUYA Mulungu.”