Read cisena EZEKIELE 36 Bible Online

EZEKIELE 36 - cisena bible

EZEKIELE 36

¹MBUYA adalonga mbati, “Iwe mwana munthu, longa mphangwa zauprofeti kuna mapiri a Israele mbuapange kuti: Imwe mapiri a Israele veserani mafala a MBUYA.

²MBUYA Mulungu akulonga tenepa: Anyamalwanu adalonga pya imwe mbati, ‘Ehede! Mapiri akale ale asanduka athu ene.’

³Natenepo longa mphangwa zauprofeti kuti MBUYA Mulungu akulonga tenepa: Iwo adakusakazani, pontho kukuvungani kukhundu zonsene mwakuti imwe mudasanduka chinthu cha anthu a madzinza adakuzungulirani ale. Imwe mwasanduka chinthu chakusekesa na chakulongwa tsweda.

⁴Natenepo, imwe mapiri a Israele veserani mafala a MBUYA Mulungu! MBUYA Mulungu akulonga tenepa kuna imwe mapiri, pitunda, mikulo na maphedi, kuna imwe madembe, pontho kuna maluwani adathawiwa na anthu awo ale, pontho ale adapokoserwa pinthu pyawo mbalulupiswa na madzinza onsene akuazungulira.

⁵Ine MBUYA Mulungu ndikulonga tenepa: Na thangwi ya kugaka kwa ukali wanga ine ndikulonga mwakupokanyisana na madzinza anango onsene, pontho na Aedomu ene. Na kuseka kukulu pontho kuipirwa pikulu iwo adapokosera dziko yanga mbakwata na mbuto zampovu zene kukhala zawo zene.

⁶“Natenepo longa mphangwa zauprofeti pya Israele mbulonge kuna mapiri, pitunda, mikulo, na maphedi ene kuti: Ine MBUYA Mulungu ndikulonga tenepa: Ine ndidalonga na ntchanje, thangwi ya kuzhangali na kukutikanani kudakuchitani madzinza anango.

⁷Natenepo ine MBUYA Mulungu ndikulonga tenepa: Ndikudumbira pikulu pene kuti madzinza akuzunguliraniwa anatikanwambo.

⁸Mbwenye imwe, mapiri a Israele, munati mukhale na miti, ile inabala nsapo kuti ikhale phoso ya anthu anga Aisraele, thangwi chinchino anati abwerere kwawo.

⁹Ine ndava namwe nyambalo, tenepo ndinakukomerani mtima; imwe munalimwa, pontho kubzalwa mbewu.

¹⁰Ndinainjipisa anthu muna imwe, podi na dzinza yonsene ene ya Israele. M'maluwani munakhala pontho anthu; madembe anu anamangwa pontho.

¹¹Ndinainjipisa anthu na pifuyo pene muna imwe, tenepo iwo anabalana mbainjipa pyakwanga. Ine ndinachitisa anthu kukhazikika muna imwe ninga mukhali ipyo pakutoma pale, pontho ndinachitisa pinthu pyanu kukufambirani mwadidi kupiringana kale. Penepo imwe munapidziwa kuti ine ndine MBUYA Mulungu.

¹²Ine ndinachitisa anthu, anthu anga Aisraele kudzaponda matakanu. Iwo anakhazikika muna imwe mbamukhala yawo ene. Imwe nkhabeve dzaachitisa kukhala akusowa ana tayu.

¹³“Ine MBUYA Mulungu ndikulonga tenepa: Na thangwi yakuti anthu ambalonga kuna imwe kuti, ‘Imwe mumbavunga anthu mbamuchitisa anthu a m'dziko yawo kukhala akusowa ana,’

¹⁴natenepo kutomera lero kwenda m'tsogolo imwe nkhabe dzavungave anthu, penu kuchitisa anthu a m'dziko yawo kukhala akusowa ana. Ndalonga ndine MBUYA Mulungu.

¹⁵Ine nkhabe dzakuchitisani pontho kuva kukutikanani kumbachita madzinza anango kule tayu, penu kuva kupha na kukusedegulani kumbachita madzinza anango. Imwe nkhabe dzachitisa anthu a m'dziko yawo kugwa tayu. Ndalonga ndine MBUYA Mulungu.”

¹⁶MBUYA adalonga pontho kuna ine mbati,

¹⁷“Iwe mwana munthu, ndzidzi ukhakhala Aisraele m'dziko mwawo, iwo adaiswipisa na makhaliro awo, pontho na mabasawo. Makhaliro awo akhali okhonda chena pamaso panga ninga mumbachitira mkazi wakumwezi.[28]

¹⁸Natenepo ine ndidakhuthulira ukali wanga pana iwo, thangwi ya kuchuchisa chiropa kudachita iwo m'dzikomo, pontho na thangwi yakuti iwo adaswipisa dzikoyo na mifanikizo ikhapembedza iwo ile.

¹⁹Ine ndidaabalalisira pakati pa madzinza anango, tenepo iwo akhali falanthi m'madziko onsene; ine ndidatonga mseru malingana na makhaliro awo pontho mabasawo.

²⁰Natenepo konsene kwene kukhaenda iwo pakati pa madzinza anango, iwo adalulupisa dzinanga yakuchena, thangwi anthu akhalonga pya iwo kuti, ‘Awa mbanthu a MBUYA, kwache iwo adakhakhamizwa kubuluka m'dziko mwache.’

²¹Kwache ikhali na ine kumtima ndi dzinanga yakuchena, ile idalulupisa Aisraele pakati pa madzina anango kukhadenda iwo kule.

²²“Natenepo longa kuna dzinza ya Israele kuti MBUYA Mulungu akulonga tenepa: Ine ndachita penepi nee na thangwi ya imwe dzinza ya Israele tayu, mbwenye na thangwi ya dzinanga yakuchena, ile idalulupisa imwe pakati pa madzina anango kukhadenda imwe kule.

²³Ine ndinaonesa kuchena kwachita dzinanga ikulu, dzina yalulupisa imwe pakati pawo ile. Penepo madzinza anango anapidziwa kuti ine ndine MBUYA, ndingapionesa ndekha ene wakuchena pamaso pa madzinza anango kudzera muna imwepo. Ndalonga ndine MBUYA Mulungu.

²⁴“Ine ndinakubulusani pakati pa madzinza; ndinakugumanyisani kubulukira kumadziko onsene mbandikudzesani kudziko yanu ene.

²⁵Ine ndinakuwazirani madzi akuchena, tenepo imwe munakhala akuchena; ine ndinakuchenesani kuna pyokhonda chena pyanu pyonsene, pontho kuna mifanikizo yanu yonsene.

²⁶Ine ndinakupasani mtima utswa mbandiikha muna imwe mzimu wachinchino; ine ndinabulusa muna imwe mtima wamwala mbandikupasani mtima wamnofu.

²⁷Pontho ndinaikha mzimu wanga muna imwe, pontho ndinakuchitisani kuvera matongero anga pontho kukoya mwambo wanga onsene udakupasani ine ule.

²⁸Imwe munakhala m'dziko idapasa ine makolo anu ile; imwe munakhala anthu anga, inembo mbandikhala Mulungu wanu.

²⁹Ine ndinakupulumusani kuna pyakunyansa pyanu pyonsene. Ndinachitisa phoso kukhala dala-dala, towera muleke dzavave njala.

³⁰Ndinainjipisa nsapo m'miti, pontho mbewu m'mindanu, towera madzinza anango aleke kukululupisani thangwi ya njala.

³¹Imwe mungakumbuka makhaliro akuipa na pyakudawika pyachita imwe, penepo munakula msolo, thangwi ya pyakuipa na pyakudawa pyachita imwe pile.

³²Ine ndinafuna kuti imwe Aisraele, mupidziwe kuti ine ndikuchita penepi nee na thangwi ya imwepo tayu. Chitani manyadzo mbamukule msolo thangwi ya makhaliro anu, imwe Aisraele! Ndalonga ndine MBUYA Mulungu.

³³“Ine MBUYA Mulungu ndikulonga tenepa: Pansiku inafuna ine kukuchenesani kuna pyakudawa pyanu pyonsene, ine ndinakuchitisani kukhazikika m'maluwani mwanu, pontho madembe anati amangwe pontho.

³⁴Dziko ile idasanduka thando yatchetcha inati ilimwe pontho m'mbuto mwa kukhala kwene thando yatchetcha pamaso pa anthu onsene ambagwanda na mwenemo ale.

³⁵Iwo analonga kuti, ‘Dziko ile kale ikhali thando yatchetcha, lero yasanduka ninga munda wa Edeni; mizinda ile kale ikhali madembe, yakusakazi, pontho yakuvungwa monsene mwene, lero njakutchingwa na mpanda pontho anthu akukhalamo’.

³⁶Penepo madzinza akuzungulirani adasalira ale, anapidziwa kuti ine MBUYA ndamanga pontho mizinda yakuvungika ile mbandibzala pontho mbewu m'dziko idasanduka thando yatchetcha ile. Ndalonga ndine MBUYA, tenepo ndinati ndipichitedi.

³⁷“Ine MBUYA Mulungu ndikulonga tenepa: Ndinati ndichite penepi malingana na kundidembetera kwa dzinza ya Israele: ndinachitisa anthu awo kuinjipa ninga mabira,

³⁸kuinjipa ninga mkumbi wa mabira akuperekwa nsembe mu Yerusalemu pandzidzi wache wa maphwando akusankhulika. Sasawambo mizinda ile kale ikhali madembe inadzala na mwinji wa anthu. Penepo iwo anapidziwadi kuti ndine MBUYA.”