Read cisena EZEKIELE 37 Bible Online

EZEKIELE 37 - cisena bible

EZEKIELE 37

¹Mphamvu za MBUYA zidandigudumira, tenepo Mzimu wache adandithukula mbandidzesa kuphedi; phediyo ikhali magogodo nadza-nadza.

²Iye adandifambisa uku na uku pakati pa magogodo ale, tenepo ndidaona magogodo azinji akulu-akulu pansi m'phedi mule, pontho magogodowo akhali kukutu kuuma.

³Iye adandivunza mbati, “Iwe mwana munthu, ayi magogodowa anakwanisa kukhala na moyo?” Ine ndidatawira kuti, “MBUYA Mulungu, penepyo munapidziwa ndimwepo!”

⁴Tenepo iye adalonga mbati, “Longa mphangwa zauprofeti kuna magogodowa kuti, ‘Imwe magogodo akuuma, veserani mafala a MBUYA!

⁵MBUYA Mulungu akulonga tenepa kuna magogodowa: ndinapepesera muya muna imwe, tenepo munakhala pontho na moyo.

⁶Ndinakuphatanizani na uzingo pontho kukupasani mnofu mbandikuphimbirani na khanda; ndinapepesera muya muna imwe, tenepo imwe munakhala na moyo. Penepo imwe munapidziwa kuti ine ndine MBUYA.’ ”

⁷Natenepo ndidalonga mphangwa zauprofeti ninga mudapangirwa ine. Pikhalonga ine mphangwa zauprofeti zile, ndidava ugogobodo-gogobodo, tenepo magogodo ale akhaphatana inango na inzache.

⁸Ine ndidayang'ana mbandiona kuti magogodo ale akhali na uzingo mbakukutizwa na mnofu, pontho khanda, kwache akhali nkhabe muya tayu.

⁹Tenepo MBUYA adalonga kuna ine mbati, “Longa mphangwa zauprofeti kuna muya;[29] longa iwe mwana munthu kuti MBUYA Mulungu akulonga tenepa: Idza iwe muya kubulukira kunkhomo zonsene zinayi za dziko yapansi mbupepesere muna anyakufawa, towera akhale pontho na moyo.”

¹⁰Natenepo ine ndidalonga mphwangwa zauprofeti ninga mudapangirwa ine, tenepo muya udapita muna magogodo ale; iwo adakhala pontho na moyo mbaimira dzololo, gulu ya anyankhondo azinji ene.

¹¹Kubuluka penepo MBUYA adalonga kuna ine mbati, “Iwe mwana munthu, dzinza ya Israele yakhala ninga magogodowa. Iwo ambalonga kuti, ‘Magogodo athu amala uma pontho ife nkhabeve chidikhiro tayu; ife nkhabe tsogolo tayu.’

¹²Natenepo longa mphangwa zauprofeti kuna Aisraele mbuapange kuti ine, MBUYA Mulungu ndikulonga tenepa: Imwe anthu anga, ine ndinafukula nthumbi zanu mbandikubulusanimo; ine ndinakudzesani pontho kudziko ya Israele.

¹³Penepo imwe anthu anga, munapidziwa kuti ine ndine MBUYA, ine ndingafukula nthumbi zanu mbandikubulusanimo.

¹⁴Ine ndinaikha Mzimu wanga muna imwe, tenepo munakhala pontho na moyo. Ine ndinakuchitisani kukhazikika m'dziko yanu ene. Penepo imwe munapidziwa kuti ndalonga ndine MBUYA, pontho kuti ndapichita ndine pano. Ndalonga ndine MBUYA.”

¹⁵MBUYA adalonga kuna ine mbati,

¹⁶“Iwe mwana munthu, kwata ndodo mbulembepo mafala akuti, ‘Ya Yuda na Aisraele onsene pabodzi naye.’ Kubuluka penepo kwata ndodo inango mbulembepo mafala akuti, ‘Ya Yosefe (ndodo ya Eferemu) na Aisraele onsene pabodzi naye.’

¹⁷Phataniza ndodo ziwiri kukhala ndodo ibodzi ene, towera ikhale ndodo ibodzi ene m'manja mwako.

¹⁸Anthu ako angakuvunza kuti, ‘Ayi hunatipanga tayu kuti penepi pikufuna kulonganji?’

¹⁹Longa kuna iwo kuti, ‘Ine MBUYA Mulungu ndikulonga tenepa: Ine ndinakwata ndodo ya Yosefe na madzinza anango a Aisraele, yaphatira Eferemu ile, mbandiiikha pabodzi na ndodo ya Yuda kuti ikhale ndodo ibodzi ene, tenepo inasanduka ndodo ibodzi ene m'manja mwangamu.’

²⁰“Phatira ndodo zalemba iwezi m'manja mwako pamaso pawo,

²¹mbulonge kuna iwo kuti, ‘Ine ndine MBUYA Mulungu ndikulonga tenepa: Ine ndinabulusa Aisraele pakati pa madzinza anango kukhadenda iwo kule. Ine ndinaagumanyisa kubulukira kumadziko onsene mbandiadzesa kudziko yawo ene.

²²Ine ndinaachitisa kukhala dzinza ibodzi ene m'dzikomo, pamapiri a Israele. Pakati pawo panakhala mfumu mbodzi ene basi kuatonga, pontho iwo nkhabeve dzakhala madzinza awiri, penu dzakhala pontho maufumu mawiri akugawikana tayu.

²³Iwo nkhabe dzapiswipisave okha ene na mifanikizo yawo, penu pinthu pyawo pyakunyansa pontho na pyakudawa pinango pene tayu, thangwi ine ndinaapulumusa thangwi ya kubwerera kwawo m'nduli mbandiachenesa kuna pyakudawa pyawo; penepo iwo anakhala anthu anga, inembo ndinakhala Mulungu wawo’.

²⁴“Mfumu ninga nyabasanga Davite ule anakhala mfumu wawo, tenepo onsene anakhala pansi pa makabuswa mbodzi. Iwo anakoya mwambo wanga mbateweza matongero anga mwakukhulupirika.

²⁵Iwo anakhala m'dziko idapereka ine kuna nyabasanga Yakobo, dziko ikhakhala makolo anu ile. Iwo na anawo pontho pidzukulu pyawo anakhala kweneko kwenda na kwenda, tenepo mfumu ninga nyabasanga Davite anakhala mfumu wawo kwenda na kwenda.

²⁶Ine ndinachita nawo chiverano cha mtendere; icho chinakhala chiverano cha kwenda na kwenda. Ine ndinaakhazikisa mbandiachitisa kuinjipa, penepo ndinaikha nyumbanga yakuchena pakati pawo kwenda na kwenda;

²⁷Mbuto yanga yakukhalako inakhala nawo pakati pawo; ine ndinakhala Mulungu wawo, iwombo anakhala anthu anga.

²⁸Penepo madzinza anadzipidziwa kuti ine MBUYA ndimbachitisa Israele kukhala wakuchena, ndzidzi unaikha ine mbuto yanga yakuchena pakati pawo kwenda na kwenda.”