Read cisena EZEKIELE 38 Bible Online

EZEKIELE 38 - cisena bible

EZEKIELE 38

¹MBUYA adalonga kuna ine mbati,

²“Iwe mwana munthu, longa mwakupokanyisana na Gogi wa m'dziko ya Magogi, mfumu wamkulu wa ku Mesheki na Tubali. Longa mphangwa zauprofeti mwakupokanyisana naye

³kuti ine MBUYA Mulungu ndikulonga tenepa: Ine ndina mseru na iwe Gogi, mfumu wamkulu wa ku Mesheki na Tubali.

⁴Ine ndinakubulumundisa mbandiikha chimedzo m'malakwi mwako mbandikukwekwetera kunja, pabodzi pene na anyankhondo ako onsene, akavalo ako na anyakuapakirache aphatira pida ale, gulu yonsene ya anyankhondo ache onsene akukhala na pyakugedera matswimo ping'ono na pikulu pene, uku onsene amala phatira matalasadawo.

⁵Amuna a ku Peresia, Kushi,[30] na Puti anakhala nawo pabodzi, onsene akukhala na pyakugedera matswimo na pipewu pyankhondo.

⁶Gomeri na anyankhondo ache onsene, pontho Beti-Togarima wakumpoto pabodzi pene na anyankhondo ache onsene, madzinza azinji ene ale akhali pabodzi pene na iwe.

⁷“Sasanyika; usasanyike iwe pabodzi pene na gulu yako ya anyankhondo ale akuzungulira, pontho uatonge pyakuchita.

⁸Pangagwanda nsiku zizinji zene iwe unati uchemerwe kunkhondo. Pyaka pinadzapyo iwe unasosa dziko ile yabuluka kwene pankhondo chinchino, ile anthu ache adagumanyiswa kubulukira kumadzinza azinji mbadzeswa kumapiri a Israele, ale akhadasanduka madembe pyaka pizinji. Iwo akhadadzeswa kubulukira pakati pa madzinza, tenepo onsene chinchino akukhala pakupata.

⁹Iwe na anyankhondo ako onsene pabodzi pene madzinza azinji ana iwe ale, anaenda nawe pabodzi kwenda ninga chonzi; iwe unakhala ninga makole akugudumira dziko yonsene.

¹⁰“Ine MBUYA Mulungu ndikulonga tenepa: Pandzidzi wenewo manyerezero anapita muna imwe, tenepo munakhala na manyerezero akuipa.

¹¹Imwe munalonga kuti, ‘Ine ndinasosa dziko ya maluwani okhonda tchingwa na mpanda; ine ndinasosa dziko yamtendere, pontho ile anthu ache nkhabe famba chewu-chewu tayu, onsene akukhala m'maluwani okhonda tchingwa na mpanda, yakusowa misuwo na mphinga.

¹²Ine ndinapokosera na kukwata pinthu pya anthu pontho kusakaza mizinda, ile pakutoma ikhali madembe, mbwenye chinchino ikukhala anthu, ale akhadagumanyiswa kubulukira kuna madzinza anango mbakhala na pifuyo pizinji na pinthu pinango, pontho ale akukhala pamchombo wa dziko yapansi.’

¹³Sheba na Dedani na anyamalonda a ku Tarisisi na midzi yache yonsene anakuvunzani kuti, ‘Ayi imwe mwadzera dzapokosera pinthu pyawo? Ayi imwe mwagumanyisa anyankhondo anu kufuna kusosa, towera mukwate siliva na golidi, pifuyo na pinthu pinango pya anthu, pontho na pyakupokosera pizinji?’

¹⁴“Natenepo iwe mwana munthu, longa mphangwa zauprofeti kuna Gogi kuti ine MBUYA Mulungu ndikulonga tenepa: Pansiku yeneyo, anthu anga angakhala pakupata, ayi imwe nkhabe dzapidziwa tayu?[31]

¹⁵Iwe unabulukira kumbuto yako kumpoto kutali, iwe na madzinza azinji ana iwe, onsene apakira akavalo, gulu ikulu ya anyankhondo, pontho anyankhondo amphamvu.

¹⁶Iwe unachita nkhondo na anthu anga Israele ninga makole akugudumira dziko yapansi. Nsiku zinadzazo, iwe Gogi, ndinakuchitisa kumenyana na dziko yanga, towera madzinza andidziwe, ine ndingapionesa kuti ndine nyakuchena pamaso pawo kudzera muna imwe.

¹⁷“Ine MBUYA Mulungu ndikulonga tenepa: Ayi munthu wache si iwe tayu akhalonga ine pakutoma pale, kudzera muna anyabasanga, maprofeti a Israele? Pandzidzi wenewo iwo adalonga mphangwa zauprofeti pyaka pizinji pene kuti ine ndinati ndikuchitise kusosa anthu anga.

¹⁸Ipi ndiye pinafuna dzachitika pansiku yeneyo: Gogi angasosa dziko ya Israele, ukali wanga unalamuka. Ndalonga ndine MBUYA Mulungu.

¹⁹Na phinga yanga pontho ukali wanga ine ndikulonga kuti pansiku yeneyo panakhala chiteke-teke chakugoswa m'dziko ya Israele.

²⁰Nsomba na mbalame zonsene, pirombo pya m'tsanga na nyama zonsene zimbafamba padziko yapansi zile, pontho anthu onsene a padziko yapansi anatetemera na mantha pamaso panga. Mapiri anagwa, matelero onsene anamwalazwa, pontho fufu yonsene inagomoka.

²¹Ndinachemeresa talasada kuti ivunge Gogi pamapiri anga onsene. Ndalonga ndine MBUYA Mulungu. Talasada ya munthu onsene inakhamwadza mwanzache.

²²Ine ndinamtchunyusa na muliri pontho nkhondo; ndinavumbisa mvula yakugoswa, matalala pontho na moto wakugaka na miyala ya moto ya sulufule pana iye, anyankhondo ache, pontho na madzinza onsene azinji ali kukhundu kwache ale.

²³Na njira yeneyi ndinaonesa madzinza onsene ukulu wanga pontho kuchena kwanga. Penepo iwo anapidziwadi kuti ine ndine MBUYA.