Read cisena EZEKIELE 39 Bible Online

EZEKIELE 39 - cisena bible

EZEKIELE 39

¹“Iwe mwana munthu, longa mphangwa zauprofeti kupokanyisana na Gogi. Umpange kuti ine MBUYA Mulungu ndikulonga tenepa: Ine ndina mseru na iwe Gogi, mfumu wamkulu wa ku Mesheki na Tubali.

²Ine ndinakubulumundisa mbandikukwekweta uku na uku. Ndinakudzesa kubulukira kutali kumpoto mbandikutumiza kapokanyisana na anthu akukhala pamapiri a Israele.

³Penepo ndinatchola utako kubulukira kumkono wako wamabzere, mbandichitisa matswimo ako kudoda kumkono wako wamadyo.

⁴Penepo pamapiri a Israele iwe unagwa, iwe pabodzi pene na anyankhondo ako, pontho na madzinza azinji ali kukhundu kwako ale. Ine ndinakusandusa phoso ya malezi na nyama zam'tsanga.

⁵Iwe unagwera pakwecha kutsanga, thangwi ndalonga ndine MBUYA Mulungu.

⁶Ine ndinagasa moto pana Magogi pabodzi pene na anyamgombe, onsene ambakhala pakupata ale, penepo iwo anapidziwadi kuti ine ndine MBUYA.

⁷“Ine ndinachitisa dzinanga yakuchena kudziwika pakati pa Aisraele. Ine nkhabe dzayang'ana kwene tayu kuti dzinanga yakuchena ilulupiswe. Penepo madzinza anapidziwa kuti ine MBUYA ndine Nyakuchena wa Israele.

⁸Ikudza! Ande pinati pichitike. Ndalonga ndine MBUYA Mulungu. Yeneyi ndi nsiku yalonga ine ile.

⁹“Penepo anthu ale ambakhala m'maluwani a Israele anabuluka kwenda mbaphatisa basa pida pyankhondo ninga nkhuni mbapipisa, pyakugedera matswimo ping'ono na pikulu pene, mauta na matswimo, pigomba pyankhondo na madipa. Pyaka pinomwe ipyo pinaphatiswa basa ninga nkhuni.

¹⁰Iwo nkhabe dzafunikave kusaka nkhuni kubulukira kuminda penu kutema miti mumsitu tayu, thangwi iwo anaphatisa basa pida ninga nkhuni. Iwo anapokosera pinthu pya anthu adaapokoserambo pinthu pyawo ale. Ndalonga ndine MBUYA Mulungu.

¹¹“Pansiku yeneyo ndinapereka masiye kuna Gogi mu Israele, m'phedi ya anyaulendo kumabulukiro dzuwa kwa bara. Iyo inatchinga njira ya anyaulendo, thangwi Gogi na gulu yache ya anyankhondo anaikhwa m'masiye kweneko. Tenepo mbutoyo inachemerwa Phedi ya Hamoni-Gogi.

¹²“Miyezi minomwe dzinza ya Israele anaikha m'masiye mitembo ya anthu enewa, towera achenese dzikoyo.

¹³Anthu onsene m'dzikomo anaphedzana kuaikha m'masiye, tenepo pansiku inafuna ine dzatambira demelero inakhala nsiku ile kuna iwo nkhabe dzaduwalika tayu. Ndalonga ndine MBUYA Mulungu.

¹⁴Anthu anango analembwa basa, towera achenese dzikoyo. Anango anazungulira m'dzikomo, pontho kuthimizira penepo, anango anaikha m'masiye anthu ale anafuna dzasalira m'dzikoyo. Pakumala kwa miyezi minomweyi, iwo anatoma basa yakusakanyula-sakanyula.

¹⁵Ndzidzi onsene unafamba-famba iwo m'dzikomo, tenepo mbodzi wa iwo mbaona gogodo ya munthu, iye anaikhapo chidzindikiro mpakana anyakukumba masiye aifikhire m'mphedi ya Hamoni-Gogi.

¹⁶(Panakhala pontho luwani yakuchemerwa Hamona.)[32] Natenepo iwo anachenesa dzikoyo.”

¹⁷MBUYA Mulungu adalonga kuna ine mbati, “Ine MBUYA Mulungu ndikulonga tenepa: Iwe mwana munthu, chemeresa mbalame na nyama zam'tsanga zene mbulonge kuti, ‘Gumanyikanani kubulukira konsene kwene kunakhala imwe mbamudze kuna phwando ya nsembe inakusasanyirani ine ile, nsembe ikulu pamapiri a Israele. Kweneko iwo anadya nyama na kumwa chiropa.

¹⁸Imwe munadya manungo a anyankhondo amphamvu mbamusuta chiropa cha ana mafumu apadziko yapansi khala ninga akudya mabira amuna, anabira, mbuzi na ng'ombe zimuna, zonsenezo nyama zakunenepa zakubulukira ku Bashani.

¹⁹Paphwando ya nsembe inakusasanyirani ine ile, imwe munadya mpakana kukhuta, pontho kumwa chiropa mpakana muledzere.

²⁰Pathebulu panga imwe munadya mbamukhuta chonsene chinafuna iwo pa akavalo na anyakuapakirache, anyankhondo a mphamvu pontho na anyankhondo a mtundu onsene.’ Ndalonga ndine MBUYA Mulungu.”

²¹MBUYA adalonga mbati, “Ine ndinati ndionese demelero yanga pakati pa madzinza, tenepo madzinza anaona kuatchunyusa kunafuna ine dzaachita na mkono wanga.

²²Kutomera penepo kwenda m'tsogolo dzinza ya Israele anapidziwa kuti ine ndine MBUYA Mulungu wawo.

²³Pontho madzinza anango anapidziwa kuti dzinza ya Israele idenda kudziko ya unyaperezo thangwi ya pyakudawa pyawo, thangwi iwo akhali okhonda khulupirika kuna ine. Natenepo ine ndidabisa nkhope yanga mbandiatawirisa anyamalwawo kuakunda, tenepo iwo adafa pankhondo.

²⁴Ine ndidachita kuna iwo malingana na kukhonda chena kwawo, pontho na umambalawo, tenepo ine ndidaabisira nkhope yanga.

²⁵“Natenepo ine MBUYA Mulungu ndikulonga tenepa: Ine ndinamdzesa Yakobo kubulukira kudziko ya unyaperezo, pontho ndinavera nsisi dzinza ya Israele mbandikhala na chipapu na dzinanga yakuchena.

²⁶Iwo anaduwalira manyadzo akhali na iwo ale, pontho kukhonda khulupirika kwawo konsene kuna ine iwo angakhala pakupata m'dziko mwawo mbapakhonda khala na mbodzi ene wakuathuswa.

²⁷Ine ndingaabweza kubulukira pakati pa madzinza anango, pontho kuagumanyisa kubulukira kumadziko a anyamalwawo, ine ndinapionesa ndekha ene kuna madzinza azinji kuti ndine nyakuchena kudzera muna iwo.

²⁸Penepo iwo anapidziwadi kuti ine ndine MBUYA Mulungu wawo, podi kwene kuti ine ndidaaendesa kudziko ya unyaperezo pakati pa madzinza. Ine ndinaagumanyisa kuabwezera kudziko yawo ene mbandikhonda kusiya m'nduli munthu na mbodzi ene.

²⁹Ine nkhabe dzaabisirave nkhope yanga tayu, thangwi ndinakhuthulira Mzimu wanga pana dzinza ya Israele. Ndalonga ndine MBUYA Mulungu.”