Read cisena EZEKIELE 4 Bible Online

EZEKIELE 4 - cisena bible

EZEKIELE 4

¹Mulungu adalonga mbati, “Chinchino iwe mwana munthu, kwata pyakulemberapo piwiri pyadongo mbupiikhe kutsogolo kwako, pontho ujambulepo mzinda wa Yerusalemu.

²Manga misasa kusangiza kuzungulirwa kwa mzinda na anyamalwa; manga nsanja ya anyankhondo, mbumuluke mataka kutsamira mpandawo, pontho kusasanya pyakugomolera mpanda kukhundu zonsene.

³Kubuluka penepo kwata chiwaya cha simbi mbuchiimise ninga fufu pakati pa iwe na mzindamo mbuyang'ane kumzindako. Mzindawo unazungulirwa na anyamalwa, tenepo nyakufuna dzauzungulira ndiwepo. Chenechi chinakhala chidzindikiro kuna dzinza ya Israele.

⁴“Kubuluka penepo gona khundu yakumabzere, mbukwate kutchunyuswa konsene kunafuna dzachitwa dzinza ya Israele. Iwe wathema kukwata kutchunyuswa kwawo nsiku zonsene zinagona iwe kukhundu kwako.

⁵Ine ndakuikhira nsiku madzana matatu na makumafemba zakuti iwe ukwate kutchunyuswa kwawo. Nsiku ibodzi kuimirirambo chaka chibodzi pya kutchunyusa kunafuna ine dzachita dzinza ya Israele.

⁶Iwe ungamalisa kuchita penepi, gona pontho kachikano kukhundu yakumadyo mbukwate kutchunyuswa kwa dzinza ya Yuda. Ine ndakuikhira nsiku makumanayi, nsiku ibodzi kuimirirambo chaka chibodzi.

⁷“Yang'anisa maso ako kuna misasa yazungulira Yerusalemu ile, mbukwize shoko yako m'dzulu kulonga mphangwa zauprofeti zakupokanyisana na mzindawo.

⁸Ine ndinakumanga na nkhambala, towera uleke fukunyuka kufikirana umalise nsiku zakuonesa kuzungulira kwako mzindawo ninga anyamalwa.

⁹“Chinchino kwata tirigu na barele, chimbamba na nyimo, pontho mapira na mulumbi; upiikhe pyonsenepyo m'mbodzi mwene mbusasanye mkate. Penepyo ndiye pinafuna iwe dzadya pansiku madzana matatu na makumafemba anafuna iwe dzagonera khundu ya kumabzere.

¹⁰Iwe unatawiriswa kudya mkate wakukwana dzanja[3] basi pansiku, pontho wathema kudya pansiku kabodzi.

¹¹Pima madzi akumwa akukwana makhomitcho mawiri,[4] pontho wathema kuamwa pansiku kabodzi.

¹²Idya kudya ninga mumbadyera iwe pitumbuwa pya barele; piphike mwenemo anthu akuona maso, nkhuni zache mbazikhala matubzi akuuma a anthu.”

¹³MBUYA adalonga mbati, “Na njira yeneyi anthu a ku Israele anadya pyakudya pyokhonda chena pamaso pa Mulungu pakati pa madziko kunafuna ine dzaathamangisira kule.”

¹⁴Mbwenye ndidatawira kuti, “Tayu, MBUYA Mulungu! Chipo ine ndidzati ndapiswipisa ndekha ene pamaso pa Mulungu tayu. Kutomera uwananga mpakana lero nee ndidzati kudya chinthu chakufa chokha, penu yakuchita kuphiwa na nyama zam'tsanga tayu. Chipo chinthu chokhonda chena chadzati pita pakanwa pangapa tayu.”

¹⁵Iye adalonga mbati, “Pyakoma! Ndinakutawirisa kuphika mikate yako na ulowa wa ng'ombe m'mbuto mwa matubzi a munthu.”

¹⁶Tenepo iye adalonga mbati, “Iwe mwana munthu, ine ndinati ndifunge pinthu pyonsene pimbadzesa kudya mu Yerusalemu. Anthu anadya pyakudya mwakunyentchera pyakuchitwa kupimwa, pontho anamwa madzi akuchita kupimwa mbasanyika napyo,

¹⁷thangwi mikate na madzi pinasowa. Iwo anataya mtima pyakwanga angayang'anana mbavungika thangwi ya pyakudawa pyawo.”