Read cisena EZEKIELE 41 Bible Online

EZEKIELE 41 - cisena bible

EZEKIELE 41

¹Kubuluka penepo munthu ule adandidzesa kusubi yakuchena ya Nyumba ya Mulungu. Iye adapima mafufu a pamsuwo wache, ntchindu yache ikhali makhono matatu kukhundu yonsene.

²Msuwo, umimbache ukhali makhono ashanu, pontho ulaphiache ukhali makhono mawiri na kati ya khono. Iye adapima pontho subi yakuchena, ulaphiache ukhali makhono makumawiri, pontho umimbache ukhali makhono khumi.

³Kubuluka penepo adapita m'subi yam'bwaloletu. Iye adapima mafufu a pamsuwo; ntchindu yache ikhali khono ibodzi. Msuwo umimbache ukhali makhono matatu, pontho ulaphiache ukhali makhono matatu na kati ya khono.

⁴Kubuluka penepo iye adapima pontho subi yam'bwaloletuyo; ulaphiache na umimbache ukhali makhono khumi sasawa makhundu onsene. Tenepo iye adalonga kuna ine mbati, “Yeneyi ndi Mbuto Yakuchenesesa.”

⁵Kubuluka penepo iye adapima mafufu a Nyumba ya Mulungu; ntchindu yache ikhali makhono matatu, pontho subi yonsene yakutsamira Nyumba ya Mulungu kukhundu zonsene, umimbache ukhali makhono mawiri.

⁶Masubi enewa akhali m'nyumba zitatu zakusanjikizana, ibodzi padzulu pa inzache, yonsene mbikhala na masubi makumatatu. Kunja kwa mafufu a Nyumba ya Mulungu adamangwa ninga nsikada zikulu zitatu mwakuti mitandache ya nyumba zitatu zakusanjikizana zile zidatsamira pansikadazo, towera ileke pita m'mafufu a Nyumba ya Mulungu.

⁷Natenepo masubi onsene akunja kwa Nyumba ya Mulungu akhali akubulukira kunja, ale adamangwa mwakutumulirwa kubulukira pansi mpakana padzulu kutewezana na pyakutchinjikira masubi pile. Pakhali nsikada kubulukira nyumba zapansiletu mpakana nyumba zapadzululetu kupita na m'masubi a nyumba zapakati.

⁸Ndidaona kuti kuzungulira Nyumba ya Mulungu pakhali thako yakukwira m'dzulu mbakhala maziko a masubi akutsamira Nyumba ale. Chengo chache chikhali kulapha kwa mdida ule, makhono matatu.

⁹Mafufu akunja a masubi akutsamira Nyumba ale, ntchindu yache ikhali makhono mawiri na kati ya khono. Chintalo cha pakati pa mafufu akutsamira Nyumba ya Mulungu ale,

¹⁰pontho na masubi a anyansembe, umimba akhali makhono khumi kuzungulira Nyumba ya Mulungu ile.

¹¹Pakhali misuwo yakupitira m'masubi akutsamira Nyumba ale kubulukira pa chintalo, msuwo ubodzi kumpoto, unangombo kumwera; umimba wa chiguwa chakubulukira kumasubi ale kwenda kuchintalo ukhali makhono mawiri na kati ya khono.

¹²Nyumba inango ile idayang'ana chintalo cha Nyumba ya Mulungu kumabulukiro dzuwa, umimbache ukhali makhono makumatatu na ashanu. Ntchindu ya mafufu ache ikhali makhono mawiri na kati ya khono, pontho ulaphiache ukhali makhono makumanayi na ashanu.

¹³Kubuluka penepo munthu ule adapima kunja kwa Nyumba ya Mulungu mbagumana kuti ulaphiache ukhali makhono mashanu. Chintalo cha Nyumba ile na mafufu ache ene adakwana pontho makhono makumashanu.

¹⁴Kumsuwo kwa Nyumba ya Mulungu kumabulukiro dzuwa kuthimizapo chintalo kukhundu zonsene ziwiri chile kudakwana pontho makhono makumashanu.

¹⁵Kubuluka penepo iye adapima pontho ulaphi wa nyumba yakuyang'anisana na chintalo kunduli kwa Nyumba ya Mulungu kumadokero dzuwa, kuthimizapo njira zakupitira m'masubi a m'bwalo kukhundu zonsene; iyo ikhali makhono makumashanu. Subi yakupitira m'Nyumba ya Mulungu, Mbuto Yakuchena, pontho Mbuto Yakuchenesesa,

¹⁶mafufu ache onsene kutomera pansi mpakana m'mazhanera adaphophwa na matabwa. Mazhanera adafungwa na matabwa.

¹⁷Mafufu onsene a m'bwalo mwa Nyumba ya Mulungu mpakana padzulu pa misuwo ponsene pene

¹⁸padathemeserwa na pyakulengwa pyakukhala na maphaphido pontho na miti yamdikhwa. Chakulengwa chakukhala na maphaphido chonsene chidapakizana na muti wamdikhwa. Chakulengwa chonsene chikhali na nkhope ziwiri,

¹⁹nkhope ya munthu kuyang'ana mdikhwa khundu ibodzi, pontho nkhope ya nkhalamu kuyang'ana mdikhwa khundu inango. Ipyo pidaikhwa tenepo kuzungulira Nyumba ya Mulungu yonsene.

²⁰Kubulukira pansi mpakana padzulu pa msuwo pakhali pithunzi-thunzi pyakuchita kusemwa pya pyakulengwa pyakukhala na maphaphido na miti yamdikhwa.

²¹Msuwo wakupitira Mbuto Yakuchena mafufu ache akhali na nkhomo zinayi zakulingana, pontho msuwo wakupitira Mbuto Yakuchenesesa ukhali sasawa.

²²Pakhali guwa yansembe yakusasanywa na matabwa; chengo chache chikhali khono na kati ya khono, ulaphiache na umimbache ukhali sasawa, khono ibodzi khundu zonsene. Nkhomo zache zinayi, thako yache, na m'khundu mwache, pyonsene pikhali pya matabwa. Munthu ule adalonga kuna ine mbati, “Yeneyi ndi thebulu ile imbakhala pamaso pa MBUYA.”

²³Mbuto Yakuchena, sasawambo na Mbuto Yakuchenesesa, ikhali na msuwo wakukhala na misuwo miwiri yakufungira.

²⁴Msuwo onsene ukhali na mwakufunya muwiri.

²⁵Misuwo yonsene idathemeserwa na pyakulengwa pyakukhala na maphaphido na miti yamdikhwa pyakuchita kusemwa ningambo pidaikhwa m'mafufu pile. Padzulu pa msuwo wa subi yakupitira m'Nyumba ya Mulungu pakhali chipewu cha matabwa.

²⁶Subi yakupitira m'Nyumba ya Mulungu ikhali na mazhanera ang'ono-ang'ono, pontho mafufu ache kukhundu zonsene ziwiri adathemeserwa na miti yamdikhwa yakuchita kusemwa.