Read cisena EZEKIELE 42 Bible Online

EZEKIELE 42 - cisena bible

EZEKIELE 42

¹Kubuluka penepo munthu ule adenda nane kukhundu yakumpoto muchintalo chakunja mbapita nane m'masubi akuyang'anisana na chintalo cha Nyumba ya Mulungu, pontho kuyang'anisana na fufu yakunja kukhundu yakumpoto.

²Nyumba ile msuwo wache udayang'ana kumpoto ulaphiache ukhali makhono makumashanu, pontho umimbache ukhali makhono makumawiri na ashanu.

³Khundu ibodzi idayang'ana kuchintalo cham'bwalo ile kukula kwache kukhali makhono khumi, pontho khundu inango idayang'ana kunjira yamiyala ya chintalo chakunja. Nyumba yeneyi idamangwa mwakusanjikizana katatu.

⁴Kutsogolo kwa masubi a nyumbayi kukhali njira ile umimbache ukhali makhono mashanu, pontho ulaphiache ukhali makhono makumashanu. Misuwo ya masubi ache ikhali kukhundu yakumpoto.

⁵Masubi a nyumba yapadzululetu ile akhali ang'ono-ang'ono, thangwi njirache idakunda mbuto izinji ene kusiyana na njira za panyumba yapakati na yapansiletu.

⁶Masubi a nyumba yapadzululetu akhali nkhabe mizati, ninga mukhali ipyo na pintalo; tenepo masubi apadzululetu akhali ang'ono kusiyana na apansiletu na apakati.

⁷Pakhali fufu yakunja kwa masubi yapansiletu ile ikhatewezana na masubi ile ulaphiache ukhali makhono makumawiri na ashanu, pontho idayang'anisana na chintalo chakunja.

⁸Masubi akuyang'ana chintalo chakunja, ulaphiache ukhali makhono makumawiri na mashanu, pontho masubi akuyang'ana Nyumba ya Mulungu, ulaphiache ukhali makhono makumashanu.

⁹Masubi a nyumba yapansiletu akhali na msuwo kukhundu yakumabulukiro dzuwa ngakhala munthu anapita mwenemo na muchintalo chakunja.

¹⁰Kukhundu yakumwera[35] m'khundu-khundu mwa fufu ya chintalo chakunja, pontho kuyang'anisana na fufu yakunja kukhali masubi anango

¹¹akukhala na njira kunkhope kwache. Iwo akhali ningambo masubi akukhundu yakumpoto; ulaphiache na umimbache ukhali sasawa. Misuwo yache na kukula kwache pikhali sasawa. Ninga misuwo ya kukhundu yakumpoto

¹²ndi sasawambo na misuwo ile ikhali m'masubi a kukhundu yakumwera. Kukhundu yakumabulukiro dzuwa kwa njira na fufu yache yakunja kukhali msuwo, ule ukhaphatisa anthu basa kupita nawo m'masubi.

¹³Tenepo munthu ule adalonga kuna ine mbati, “Masubi akumpoto na akumwera akuyang'ana chintalo cha Nyumba ya Mulungu ale, nganyansembe, mule munafuna dzadyera anyansembe, ambafika chifupi na MBUYA ale, nsembe zakupambulikaletu. M'masubi enewa iwo anaikhamo nsembe zakupambulikaletu, pyakupereka pya mapira, nsembe zakulekerera pyakudawa na nsembe zakupagalira pyakudawa, thangwi mbutoyo njakuchena.

¹⁴Anyansembe angapita kwene m'mbuto zakuchenazo, iwo mbaleke bulukamo kwenda mbakapita muchintalo chakunja mpakana adule nguwo zidavala iwo ndzidzi ukhatumikira iwo pamaso pa MBUYA ule, thangwi nguwozo nsakuchena. Iwo athema kuvala nguwo zinango mbadzati fika kumbuto zimbakhala anthu zile.”

¹⁵Pidamalisa iye kupima pyonsene pya m'bwalo mwa Nyumba ya Mulungu ile, munthu ule adabuluka nane kunja na pamsuwo wa kukhundu yakumabulukiro dzuwa. Penepo iye adapima mbuto yonsene yakuzungulira Nyumba ya Mulungu:

¹⁶Iye adapima khundu yakumabulukiro dzuwa na mdida; ulaphiache ukhali makhono madzana mawiri na makumashanu.

¹⁷Kubuluka penepo adapima khundu yakumpoto na mdida; ulaphiache ukhali makhono madzana mawiri na makumashanu.

¹⁸Tenepo iye adapima khundu yakumwera na mdidache; ulaphiache ukhali makhono madzana mawiri na makumashanu.

¹⁹Kubuluka penepo iye adazungunuka mbapima khundu yakumadokero dzuwa; ulaphiache ukhali makhono madzana mawiri na ashanu.

²⁰Natenepo adapima khundu zonsene zinayi zakuzungulira Nyumba ya Mulungu. Pakhali mpanda kuzungulira chintalo chonsenecho, ulaphiache ukhali makhono madzana mawiri na makumashanu, pontho umimbache ukhali makhono madzana mawiri na makumashanu. Mpandawo ukhalekanisa pinthu pyakuchena na pinthu pene pyapyo.