Read cisena EZEKIELE 43 Bible Online

EZEKIELE 43 - cisena bible

EZEKIELE 43

¹Kubuluka penepo munthu ule adenda nane kumsuwo wakuyang'ana kumabulukiro dzuwa.

²Kweneko ndidaonako demelero ya Mulungu wa Israele ikubulukira kumabulukiro dzuwa. Falache ikhaveka ninga kutitima kwa madzi, pontho dziko yapansi idayetimira na kuchena kwa demelero yache.

³Masomphenya adaona inewa ndi sasawa na masomphenya adaona ine ndzidzi udadza MBUYA dzavunga Yerusalemu. Pikhali pontho ninga masomphenya adaona ine m'khundu-khundu mwa kumkulo wa Kebari ale. Natenepo ine ndidapigwisa na fufumimba.

⁴Demelero ya MBUYA idapita m'Nyumba ya Mulungu na pamsuwo wa kukhundu yakumabulukiro dzuwa.

⁵Penepo Mzimu wa MBUYA adandithukula mbandipitisa muchintalo cham'bwalo. Tenepo demelero ya MBUYA idadzaza m'Nyumba mwachemo.

⁶Pikhaimira munthu ule chifupi na ine, ndidava unango akulonga kuna ine kubulukira m'Nyumba ya Mulungu ile.

⁷Iye adalonga mbati, “Iwe mwana munthu, yeneyi ndi mbuto yakukhalamo mpando wanga wachifumu, pontho mbuto yakusanjikirapo manyalo anga. Kuno ndiye kunafuna ine dzakhala pakati pa anthu anga Aisraele kwenda na kwenda. Dzinza ya Israele nkhabeve dzalulupisa dzinanga yakuchena tayu, nee iwo penu mafumu awo, na uputa umbachita iwo ule, pontho na mifanikizo yakufa ile imbapembedza mafumu awo pambuto zawo zachipembedzo.

⁸Iwo akhamanga nyumba zawo zachifumu chifupi na Nyumbanga, madire ache mbakhala fufu ene basi pakati pa iwo na ine. Iwo adalulupisa dzinanga yakuchena na pyakunyansa pikhachita iwo pile, natenepo na kuzhangali kwanga, ine ndidaavunga.

⁹Chinchino iwo athema kuleka pyauputa pikhachita iwo, pontho kutaya mifanikizo yakufa ya mafumu awo ile, penepo ine ndinakhala pakati pawo kwenda na kwenda.

¹⁰“Iwe mwana munthu, longa kuna Aisraele pya Nyumba ya Mulungu, towera iwo achite napyo manyadzo pyakudawa pyawopyo. Iwo mbanyerezere kutandwa mwadidi kwachita Nyumba ya Mulungu,

¹¹tenepo iwo angachita manyadzo na pyonsene pyachita iwopyo, penepo iwe wathema kuaonesa kutandwa kwa Nyumba ya Mulungu na pinthu pyache, misuwo yache yakupitira m'bwalo na yakubulukira kunja ene, masasanyiro ache onsene, pontho mwambo na matongero ache onsene. Lemba pyonsenepi pamaso pawo, towera iwo akwanise dzakumbuka masasanyiro ache na kuteweza matongero ache onsene.

¹²Mwambo wa Nyumba ya Mulungu ngufu: Mbuto yonsene yazungulira Nyumbayo padzulu pa phiri inakhala yakuchena pyakwanga. Wenewu ndiye mwambo wa Nyumba ya Mulungu.”

¹³Guwa yansembe kukula kwache ikhali tenepa malingana na mdida ontho udaphatiswa basa kupima Nyumba ya Mulungu: Pansi pa thako yache pakhali mgelo ule kuzwika na umimbache ndi kati ya khono. Ntchindu ya milomo ya mgelowo ikhali ninga kulapha kwa dzanja.

¹⁴Kubulukira pansi pa mgelo wa guwayo thako yache ikhali khono ibodzi pontho idabulukira kunja kati ya khono. Kubulukira pa thako kufika padzulu pa chigundiro cha guwa, ulaphiache ukhali makhono mawiri, pontho umimbache ukhali kati ya khono.

¹⁵Mbuto yakugasirapo moto paguwa yansembe chengo chache chikhali makhono mawiri, pontho padzulu pache pakhali nyanga zinayi.

¹⁶Mbuto yakugasirapo moto kulapha kwache kukhali makhono matanthatu, khundu zonsene zinayi zikhali sasawa.

¹⁷Chigundiro cha padzulu ulaphiache na umimbache pikhali sasawa, makhono manomwe kukhundu zonsene. Chikhali na viri kulapha kwache dzanja ibodzi, pontho na mgelo kuzwika kwache manja mawiri kuzungulira chigundirocho. Nsikada za guwayo zikhayang'ana kumabulukiro dzuwa.

¹⁸Kubuluka penepo munthu ule adalonga kuna ine mbati, “Iwe mwana munthu, MBUYA Mulungu akulonga tenepa: Awa ndiye anafuna dzakhala matongero a maperekero a nsembe zakupyerera, pontho mawaziro a chiropa paguwa yansembe ingamala mangwa:

¹⁹Anyansembe a dzinza ya Levi, a m'banja ya Zadoki, ndiwo ene basi athema kudza chifupi na ine dzanditumikira. Iwe wathema kuapasa mwanamphulu wamamuna kukhala nsembe yakubulusira pyakudawa. Ndalonga ndine MBUYA Mulungu.

²⁰Iwe wathema kukwata chiropa cha mwanamphuluyo mbuchitswinga kunyanga zinayi za guwa, pontho pankhomo zinayi kuzungulira chigundiro chapadzulu, pontho na viri yonsene yakuzungulira. Na njira yeneyi guwayo inacheneswa mbikhala yakupambulika kuna ine.

²¹Kubuluka penepo iwe wathema kukwata mwanamphulu wamamuna ule aperekwa kukhala nsembe yakubulusira pyakudawa mbumpise pambuto yache yakusankhulika muchintalo cha Nyumba ya Mulungu kunja kwa Mbuto Yakuchena.

²²“Mangwana mwache iwe wathema kupereka bokho wakusowa chilema ninga nsembe yakubulusira pyakudawa, pontho guwa yansembe yathema kucheneswa ninga montho mudacheneserwa iyo na chiropa cha mwanamphulu ule.

²³Ungamala kuchenesa guwa yansembe ile, iwe wathema kuperekapo mwanamphulu wamamuna na bira wamamuna, pyonsene pyakusowa chilema.

²⁴Penepi wathema kupipereka pamaso pa MBUYA, pontho anyansembe athema kupiwaza munyu, tenepo upipereke kuna MBUYA ninga nsembe yakupyerera.

²⁵Nsiku na nsiku pansiku zinomwe, iwe wathema kudza na bokho ninga nsembe yakubulusira pyakudawa; iwe wathema pontho kudza na mwanamphulu wamamuna na bira wamamuna, pyonsene pyakusowa chilema.

²⁶Nsiku zinomwezo iwo athema kuchita mtemo wakuchenesa guwa yansembe, towera ikhale yakupambulika kuna ine, MBUYA.

²⁷Kumala kwa nsiku zenezi, kutomera pansiku yachisere kwenda m'tsogolo, anyansembe athema kupereka paguwa yansembe nsembe zanu zakupyerera pontho na nsembe zanu zachiphatizano. Penepo ine ndinakutawirani ninga anthu anga. Ndalonga tenepo ndine MBUYA Mulungu.”