Read cisena EZEKIELE 44 Bible Online

EZEKIELE 44 - cisena bible

EZEKIELE 44

¹Kubuluka penepo munthu ule adandikwata mbaenda nane kumsuwo wakunja wa Nyumba ya Mulungu, wakuyang'ana kumabulukiro dzuwa. Tenepo msuwowo ukhali wakufungwa.

²MBUYA adalonga kuna ine mbati, “Msuwo wenewu mbukhale wakufungwa ndzidzi onsene. Iwo hudatheme kufungulwa tayu; munthu na mbodzi ene mbaleke pita na penepa. Iwo wathema kukhala wakufungwa ndzidzi onsene, thangwi MBUYA Mulungu wa Israele apita na penepa.

³Mfumu yekha basi ndiye anakwanisa kukhala pansi m'subi ya pamsuwo wenewo mbadya pamaso pa MBUYA. Iye athema kupita na kubuluka pakuphatisa basa subi ya pamsuwo.”

⁴Kubuluka penepo munthu ule adandipitisa na pamsuwo wakumpoto mbitifika kunkhope kwa Nyumba ya Mulungu. Ndidamwaza maso mbandiona demelero ya Mulungu yadzala m'Nyumba mwache mule. Penepo ine ndidapigwisa na fufumimba.

⁵Tenepo MBUYA adalonga kuna ine mbati, “Iwe mwana munthu, yang'ana mwadidi, pontho uvesere mwadidi mbuikhe khutu kuna pyonsene pinakupanga ine pya mwambo na matongero a Nyumbangayi. Iwe wathema kudziwa mwadidi mwene kuti mbani athema kupita m'Nyumba muno, pontho mbani hadatheme kupitamo tayu.

⁶Longa kuna dzinza yakupandukira ya Israele kuti MBUYA Mulungu akulonga tenepa: Ine ndakwana napyo pyakunyansa pimbachita imwepyo, imwe Aisraele.

⁷Padzulu pa pyakunyansa pyonsene pimbachita imwepyo, imwe mudaswipisa Nyumbanga, pakupitisa alendo m'mbuto yanga yakupambulika, ale nkhabe tsalakana pya Mulungu mumtima mwawo tayu, pontho okhonda gwandwa nsonga yachimuna, ndzidzi ukhapereka imwe nsembe za mafuta na chiropa, natenepo mwaswa chiverano changa.

⁸M'mbuto mwa kuphata basanu mwakuthemerana na pinthu pyanga pyakupambulika, imwe mwasankhula alendo kuyang'anira mbuto yanga yakupambulika.

⁹“Ine MBUYA Mulungu ndikulonga tenepa: Nee nyakudza pyache okhonda tsalakana pya Mulungu mumtima mwache pontho okhonda gwandwa nsonga yachimuna athema kupita m'mbuto yanga yakupambulika, nee alendo ale ambakhala pakati pa Aisraele tayu.

¹⁰“Kuna Alevi, ale adabauka kubuluka kuna ine ndzidzi ukhadabauka Aisraele, pontho ale adazungunukira kuna mifanikizo, athema kutchunyuswa thangwi ya pyakudawa pyawo.

¹¹Iwo anakwanisa kuphata kwene basa kumbuto yanga yakupambulika mbayang'anira misuwo ya Nyumba ya Mulungu pontho na kuphata mabasa anango ene kweneko. Iwo anakwanisa kucheka nyama zakuperekwa na anthu kukhala nsembe zakupyerera na nsembe zinango. Iwo anaphata basa kufiliviri anthu.

¹²Mbwenye na thangwi yakuti iwo adatumikira dzinza ya Israele ndzidzi ukhapembedza iwo mifanikizo mbaachitisa kudawa, natenepo ine ndikudumbira na mphamvu zanga zonsene kuti iwo athema kutchunyuswa thangwi ya pyakudawa pyawo. Ndalonga ndine MBUYA Mulungu.

¹³Iwo hadatheme tayu kufika chifupi na ine dzanditumikira ninga nyansembe, penu kudza chifupi na pinthu pyanga pyakupambulika, penu pyakupereka pyanga pyakuchenaletu. Iwo athema kuchitiswa manyadzo thangwi ya mabasawo akunyansa.

¹⁴Kwache ine ndinaapasa basa yakuyang'anira Nyumba ya Mulungu, pontho na kuphata mabasa anango ene ale athema kuphatwa mwenemo.

¹⁵“Mbwenye anyansembe a m'dzinza ya Levi, ale mphidzukulu pya Zadoki, pontho ale adaphata mwakukhulupirika basa ya kunditumikira m'mbuto yanga yakupambulika ndzidzi ukhadabauka Aisraele ule, enewa ene basi ndiye athema kudza chifupi na ine mbanditumikira; iwo athema kuimira pamaso panga kupereka nsembe za mafuta na chiropa. Ndalonga ndine MBUYA Mulungu.

¹⁶Enewo ene basi ndiye athema kupita kumbuto yanga yakupambulika; iwo ene basi athema kufika chifupi na thebulu yanga kutumikira pamaso panga, pontho kuphata mabasanga.

¹⁷“Iwo angapita pamisuwo ya chintalo cham'bwalo, iwo athema kuvala nguwo zakuchena; iwo hadatheme tayu kuvala nguwo zaubweya wa bira ndzidzi unanditumikira iwo pamisuwo ya chintalo cham'bwalo pontho na m'Nyumba mwanga.

¹⁸Iwo athema kuvala nduwira za nguwo zakuchena na makapundu. Iwo aleke vala chinthu chonsene chakuti anachita nacho kaluma.

¹⁹Iwo angabuluka kuchintalo chakunja, kule kuna anthu, iwo athema kudula nguwo zawo zonsene zidavala iwo ndzidzi ukhatumikira iwo zile mbazisiya m'masubi akupambulika, tenepo athema kuvala nguwo zinango, gopesera anthu anavungwa thangwi ya kuchena kwa nguwoko.[36]

²⁰“Anyansembe mbaleke chinga mpala penu kusiya kwene tsisi nyaviliri tayu. Mbwenye ndzidzi onsene aiyepule kwene basi.

²¹Anyansembe aleke kumwa vinyu angapita muchintalo cham'bwalo.

²²Anyansembe aleke semba mamfelwa penu mkazi wakulekana na mamunache; iwo athema kusemba mwali okhonda dziwa mamuna, pontho wa dzinza ya Israele, penu mamfelwa ule mamunache akhalimbo nyansembe.

²³“Iwo athema kufunzisa anthu anga kusiyana kwa pinthu pyakupambulika na pinthu pene pyapyo, pontho kuafunzisa kusiyanisa pakati pa pinthu pyakukhonda chena na pyakuchena pamaso pa Mulungu.

²⁴“Ngakhala pana miseru, anyansembe athema kutonga miseruyo mwakutewezana na matongero anga. Iwo athema kukoya mwambo na kuteweza matongero anga a pya maphwando anga onsene akusankhulika, pontho athema kuchitisa Nsiku Yakupuma kukhala yakupambulika.

²⁵“Nyansembe mbaleke kupiswipisa yekha ene pakukhuya mtembo; kwache ngakhala nyakumwalirayo ndi babache penu mache, mwanache wamkazi penu wamamuna, nanache penu nyamaingache okhonda sembwa, penepo iye anakwanisa kupiswipisa yekha ene.

²⁶Angamala kupichenesa, iye athema kudikhira nsiku zinomwe.

²⁷Pansiku inafuna iye kapita muchintalo cham'bwalo cha Nyumba ya Mulungu katumikira mwenemo, iye athema kupereka nsembe yakulekerera pyakudawa pyache. Ndalonga ndine MBUYA Mulungu.

²⁸“Anyansembe mbaleke khala na chinthu chawo chene padzulu pa ine pano. Imwe mwathema nee kuapasa chinthu na chibodzi chene tayu mu Israele; ine ndiye ndinafuna dzakhala chinthu chinafuna iwo dzatambira.

²⁹Iwo anadya pyakupereka pya mapira, pontho nsembe zakubulusira pyakudawa pontho na nsembe zakupagalira pyakudawa; pontho pinthu pyonsene pyapereka Aisraele kuna MBUYA pinakhala pyawo.

³⁰Nsapo zadidiletu zakutoma kutokota na mitukwanu yonsene yakupambulika pinakhala pya anyansembe. Imwe mwathema kuapasa ufanu wadidiletu watoma imwe kuusinjawo, towera panyumba panu pakhale mtsanzayiso.

³¹Nyansembe mbaleke kudya mbalame penu nyama yakufa yokha ene, penu yakuchita kuphiwa na pirombo pyam'tsanga.