Read cisena EZEKIELE 45 Bible Online

EZEKIELE 45 - cisena bible

EZEKIELE 45

¹“Imwe mungagawa dzikoyi kuna anthu kukhala yawo ene, imwe mwathema kupereka khundu inango kuna MBUYA ninga nthemba yakupambulika. Ulaphiache ukhale mathanyo pikwi khumi na piwiri na madzana mashanu, pontho umimbache mathanyo pikwi khumi.[37] Mbuto yonseneyo inakhala yakuchena.

²Khundu yapakati ya mbuto yeneyi yakukwana mathanyo madzana mawiri na makumashanu, ulaphiache na umimbache ene, ndiye kunafuna dzamangwa Nyumba ya Mulungu, pontho yathema kuzungulirwa na chintalo chakukwana mathanyo makumawiri na ashanu.

³M'nthemba yakupambulika, pima khundu yakukwana mathanyo pikwi khumi na piwiri na madzana mashanu ulaphiache, pontho na umimbache wakukwana mathanyo pikwi pishanu. Penepo panakhala Nyumba ya Mulungu, Mbuto Yakuchenesesa.

⁴Mbuto yeneyi inakhala khundu yakuchena ya dzikoyo yakupambulirwa anyansembe, ale ambatumikira MBUYA m'Nyumba mwache. Mwenemo munakhala nyumba zawo na mbuto yakumangapo Nyumba ya Mulungu.

⁵Khundu inango yakukwana mathanyo pikwi khumi na piwiri na madzana mashanu ulaphiache, pontho mathanyo pikwi pishanu umimbache, yathema kukhala ya Alevi, ale ambatumikira m'Nyumba ya Mulungu. Kweneko ndiye kunafuna dzakhala maluwani awo.[38]

⁶“Iwe wathema kupereka khundu inango kuna mzindawo ninga mbuto yakukwana mathanyo pikwi khumi na piwiri na madzana mashanu ulaphiache, pontho umimbache mathanyo pikwi piwiri na madzana mashanu, kuphatanizana na mbuto yakupambulika ile; mbuto yeneyi inakhala ya dzinza yonsene ya Israele.

⁷“Mfumu anakhala na mbuto yakuchita madire kukhundu zonsene na mbuto ile ndi nthemba yakupambulika pontho na mbuto ile nja mzinda. Mbutoyo inafumukira kukhundu yakumadokero dzuwa mpakana ku Bara ya Mediterania, pontho kukhundu yakumabulukiro dzuwa mpakana kumadire akukhundu yakumabulukiro dzuwa a dziko. Ulaphiache unakhala sasawa na nthemba yakuperekwa kuna dzinza yonsene ya Israele.

⁸Nthemba yeneyo ndiye inakhala yache enembo mu Israele. Natenepo mafumu anga nkhabe dzaponderezave anthu anga tayu, mbwenye anatawirisa madzinza a Israele kukhala na nthemba yawo ene malingana na dzinzawo.”

⁹MBUYA Mulungu akulonga tenepa: “Imwe atongi a Israele mwachita kundendeya! Lekani kuchita upandu pontho kuboneresa anthu kunachita imweko mbamuchita pinthu pyakuthema pontho pyakulungama. Alekeni pyawo anthu anga akhale m'mbuto zawo mbamukhonda kuabulusamo. Ndalonga ndine MBUYA Mulungu.

¹⁰“Imwe mwathema kuphatisa basa midida ya chitundu[39] na ndowa[40] yakuona.

¹¹Chitundu na ndowa pyathema kukhala sasawa mwakuti homeri ibodzi yathema kupita pitundu khumi, pontho homeri ibodzi yathema kupita ndowa khumi. Midida yonsene miwiriyi yathema kutewezana na kukula kwa homeri.[41]

¹²Mdida wa sekeli wathema kukhala wakukwana magera makumawiri. Mdida wa mina wathema kukhala wakukwana masekeli makumatanthatu.

¹³“Mtukwa wakupambulika wathema imwe dzapereka ngufu: Chibodzi papinthu makumatanthatu pya tirigu; chibodzi papinthu makumatanthatu pya barele;

¹⁴pontho chibodzi papinthu dzana pya mafuta. Mididache njishi: pitundu khumi ndi sasawa na homeri, pontho midida ya homeri na kori ntchibodzi-bodzi.

¹⁵Perekani bira mbodzi pa mabira madzana mawiri onsene kubulukira pa mikumbi yadidi ya Israele. Mwenemu ndiye munafunira imwe dzapereka pyakupereka pyanu pya mapira, nsembe zakupyerera, pontho nsembe zachiphatizano, towera pyakudawa pyanu pilekererwe. Ndalonga ndine MBUYA Mulungu.

¹⁶“Anthu onsene a m'dzikomo athema dzaperekambo mitukwa yakupambulika kuti iphatiswe basa na mfumu wa Israele.

¹⁷Inakhala basache mfumu kudza na nsembe zakupyerera, pyakupereka pya mapira, na nsembe za pyakumwa pandzidzi wa maphwando akusekera kubalwa kwa mwezi, Nsiku Yakupuma na maphwando anango onsene akusankhulika a dzinza yonsene ya Israele. Iye athema kupereka nsembe zakulekerera pyakudawa, pyakupereka pya mapira, nsembe zakupyerera, na pyakupereka pya chiphatizano, towera pikhale nsembe zakulekerera nazo pyakudawa pya dzinza ya Israele.

¹⁸“Ine MBUYA Mulungu ndikulonga tenepa: Pansiku yakutoma ya mwezi wakutoma, imwe mwathema kukwata mwanamphulu wamamuna wakusowa chilema mbamuchenese Nyumba ya Mulungu.

¹⁹Nyansembe athema kukwata chiropa pang'ono cha nsembe yakulekerera pyakudawa ile, mbachitswinga pamafufu a misuwo ya Nyumba ya Mulungu, pankhomo zinayi zachigundiro chapadzulu cha guwa yansembe, pontho na pamafufu a misuwo ya mpanda ya muchintalo cham'bwalo.

²⁰Pansiku yachinomwe ya mwezi imwe mwathema kuchita chibodzi-bodzi na munthu onsene ule adawa mwasusudewu penu mwamadengwa; tenepo imwe mwathema kupereka nsembe yakuchenesa nayo Nyumba ya Mulungu.

²¹“Pansiku yakhumi na chinayi ya mwezi wakutoma, imwe mwathema kuchita Phwando ya Paska, ile imbamala nsiku zinomwe. Ndzidzi wenewu imwe mwathema kudya mikate yakusowa chakufufumisira.

²²Pansiku yeneyo mfumu athema kupereka ng'ombe imuna ninga nsembe yakulekerera pyakudawa pyache na pya anthu onsene m'dzikomo.

²³Nsiku na nsiku, pansiku zinomwe iye athema kudza na ng'ombe zimuna zinomwe na mabira amuna anomwe, pyonsene pyakusowa chilema, kukhala nsembe yakupyerera kuna MBUYA. Iye athema kuperekambo bokho kukhala nsembe yakubulusira pyakudawa.

²⁴Iye athema pontho kupereka ninga pyakupereka pya mapira chakukwana ndowa ibodzi[42] padzulu pa nsembe ya ng'ombe yonsene, pontho ndowa ibodzi pa bira onsene pabodzi pene na tugwe mbodzi[43] wa mafuta aolivi padzulu pa ndowa yonsene.

²⁵“Pandzidzi wa nsiku zonsene zinomwe za Phwando ya Misasa, ile imbatoma pansiku yakhumi na chishanu ya mwezi wachinomwe, mfumu athema kudza na pyakupereka ninga pyontho-pyonthopyo kukhala nsembe zakulekerera pyakudawa, nsembe zakupyerera, pontho pyakupereka pya mapira na mafuta aolivi.”