Read cisena EZEKIELE 46 Bible Online

EZEKIELE 46 - cisena bible

EZEKIELE 46

¹MBUYA Mulungu akulonga tenepa: “Msuwo wakupitira muchintalo cham'bwalo kukhundu yakumabulukiro dzuwa wathema kukhala wakufungwa nsiku zonsene zitanthatu zakuphata basa, mbwenye pa Nsiku Yakupuma na pa Phwando yakusekera Kubalwa kwa Mwezi wathema kufungulwa.

²Mfumu athema kupita m'subi ya pamsuwoyo kubulukira kuchintalo chakunja mbaimira chifupi na mafufu a pamsuwo. Anyansembe athema kupereka nsembe zache zakupyerera pontho na pyakupereka pyache pyachiphatizano. Iye athema kupembedza pamsuwopo, tenepo angamala penepo abuluke pyache panja. Msuwo mbuleke fungwa kufikirana dzuwa kuthobila.

³Pansiku Zakupuma zonsene pontho na pa Maphwando akusekera Kubalwa kwa Mwezi, anthu onsene athema kupembedza MBUYA patsogolo pamsuwopo.

⁴Nsembe zakupyerera zimbadza na mfumu kuna MBUYA pa Nsiku Yakupuma zile zathema kukhala ana mabira amuna atanthatu, pontho na bira wamamuna mbodzi, onsene akhale akusowa chilema.

⁵Pyakupereka pya mapira pile pimbaperekwa kubodzi kwene na bira wamamuna pyathema kukhala ndowa ibodzi, pontho na pyakupereka pya mapira pile pyaperekwa kubodzi kwene na mwanabira onsene, pyathema kupereka ninga munapifunira iye, kubodzi kwene na tugwe wa mafuta aolivi pa ndowa ibodzi yonsene.

⁶Pansiku ya Phwando yakusekera Kubwalwa kwa Mwezi, iye athema kupereka mwanamphulu wamamuna, anabira atanthatu, na bira wamamuna mbodzi; pyonsene pikhale pyakusowa chilema.

⁷Iye athema kupereka pyakupereka pya mapira pyakukwana ndowa ibodzi pa ng'ombe ibodzi imuna, ndowa ibodzi pabodzi pene na bira mbodzi wamamuna, pontho na anabira azinji ene ninga munapifunira iye kupereka, pabodzi pene na tugwe wa mafuta aolivi pa ndowa ibodzi yonsene.

⁸Mfumu angapita, athema kupita na pamsuwo wa chintalo chakunja, pontho athema kubuluka panja na pamsuwo ontho-onthowo.

⁹“Anthu a m'dzikomo angadza dzapembedza pamaso pa MBUYA pandzidzi wakusankhulika wa maphwando, munthu onsene anapita na pamsuwo wakumpoto kapembedza ule, athema kubuluka panja na pamsuwo wakumwera; pontho munthu onsene anapita na pamsuwo wakumwera kapembedza ule, athema kubuluka panja na pamsuwo wakumpoto. Munthu na mbodzi ene mbaleke buluka panja na pamsuwo ontho udapita na iye ule tayu, mbwenye iye athema kubuluka na pamsuwo unango.

¹⁰Mfumu athema kukhalambo pakati pawo, kupitambo na anthu pabodzi ndzidzi unapita iwo m'bwalo, pontho kubulukambo panja ndzidzi unabuluka anthu panja.

¹¹“Pansiku za phwando na pansiku zinango zakusankhulika, pyakupereka pya mapira pyathema kukhala pyakukwana ndowa ibodzi pabodzi pene na ng'ombe imuna, ndowa ibodzi pabodzi pene bira wamamuna, pontho pabodzi pene na anabira azinji ene ninga munapifunira iye, pontho na tugwe wa mafuta aolivi pa ndowa ibodzi yonsene.

¹²“Ndzidzi unapereka mfumu pyakupereka kuna MBUYA mwakufuna kwache, podi pikhale nsembe yakupyereza, penu pyakupereka pyachiphatizano, msuwo wakukhundu yakumabulukiro dzuwa wathema kufungulwa kuti iye apite napo. Iye athema kupereka nsembe zache zakupyerera penu pyakupereka pyache pyachiphatizano ninga mumbachitira iye pa Nsiku Yakupuma. Kubuluka penepo iye athema kubuluka panja, tenepo angabuluka panja, msuwowo wathema kufungwa.”

¹³“Nsiku na nsiku imwe mwathema kupereka kuna MBUYA mwanabira wa chaka chibodzi wakusowa chilema ninga nsembe yakupyerera; imwe mwathema pereka nsembe yeneyi machibese onsene.

¹⁴Imwe pontho mwathema machibese onsene kupereka chakupereka cha mapira akukwana makilogramu mawiri. Imwe mwathema kupereka pontho khundu ibodzi ya makhundu matatu a tugwe a mafuta aolivi akumunyira ufa. Nsembe yeneyi yakuperekwa kuna MBUYA yathema kuchitika kwenda na kwenda.

¹⁵Tenepo mwanabira, ufa, mafuta aolivi pyathema kuperekwa machibese onsene, towera pikhale nsembe zakupyerera za nsiku na nsiku.”

¹⁶MBUYA Mulungu akulonga tenepa: “Ngakhala mfumu apereka khundu inango ya mfuma kuna mbodzi wa anache ninga mtukwa, penepyo pinakhala pontho pya pidzukulu pyache; penepyo pyathema kukhala pyawo ninga pinthu pyathema iwo kusiyirwa na kholo wache.

¹⁷Kwache ngakhala mfumu anapereka khundu inango ya mfumache kuna mbodzi wa anyabasache ninga mtukwa, nyabasayo inakwanisa kukhala yache mpakana Chaka cha Kubwezera;[44] kubuluka penepo chathema kubwezerwa kuna mfumu mwenechiroache. Pinthu pina iye mphya anache ene basi, thangwi ipyo mphyawo.

¹⁸Mfumu mbaleke pokosera chinthu chonsene chasiyira anthu anawo kukhala chache chene, kuathamangisira kutali na pinthu pyawo pene. Iye athema kusiyira anache pinthu pyakubulukira pa mfumache ene basi, towera paleke khala munthu na mbodzi ene wa anthu anga wakulekaniswa na mfuma yathema iye kusiyirwa.”

¹⁹Kubuluka penepo munthu ule adandipitisa na pamsuwo wa chifupi na msuwo wa masubi akupambulika akuyang'ana kumpoto, ale akhali masubi a anyansembe, mbandionesa mbuto ya kunkhomo kumadokero dzuwa.

²⁰Iye adalonga mbati, “Yeneyi ndi mbuto ile inafuna anyansembe dzaterekerapo nsembe zakuperekwa kulekerera pyakudawa penu nsembe zakupagalira pyakudawa, pontho kuphika mikate ya ufa ule, towera aleke kudza nazo muchintalo chakunja, gopesera anthu anavungwa thangwi ya kuchena kwa nsembe zenezi.”[45]

²¹Kubuluka penepo adandidzesa muchintalo chakunja mbandizungulisa nkhomo zache zonsene zinayi, tenepo kweneko ndidaona chintalo chinango pankhomo yonsene.

²²Pankhomo zinayi za chintalo chakunja pakhali pintalo ping'ono-ping'ono. Chintalo chonsene m'nkhomo zache zonsene zinayi zikhali sasawa; ulaphiache ukhali makhono makumawiri, pontho umimbache ukhali makhono khumi na mashanu.

²³Pintalo pyonsene pidazungulirwa na mpanda wa miyala. Mbuto yakugasirapo moto idamangwa m'tchinde mwa mpanda ule.

²⁴Munthu ule adalonga kuna ine mbati, “Zenezi ndi mbuto zakuterekerapo, zile zinafuna anyakutumikira m'Nyumba ya Mulungu dzaterekerapo nsembe zimbapereka anthu.”