Read cisena EZEKIELE 5 Bible Online

EZEKIELE 5 - cisena bible

EZEKIELE 5

¹MBUYA adalonga mbati, “Iwe mwana munthu, chinchino kwata talasada yakutwa mbuiphatise basa ninga lezi kupala ndevu na tsisi yako ene. Kubuluka penepo pima kulemera kwa tsisiyo mbuigawe patatu.

²Tenepo nsiku zakuzungulira kwako mzinda ninga anyamalwa zingamala, pisa khundu yachitatu ya tsisiyo mumzindamo. Kwata khundu inango mbuigwande-gwande na talasada pinafamba iwe kuzungulira mzindawo. Khundu yakusalirayo uiwazire m'dzulu towera imbuluke na mphepo, thangwi ine ndinaibalalisa uku talasada ili chinjike.

³Kwache isiye tsisi inango pang'ono, yeneyo uimangirire pamfundo wa mkhanjo wako.

⁴Ukwate pontho pang'ono uiponye pamoto mbuipise. Kubuluka penepo moto unafalikira kuna dzinza yonsene ya Israele.”

⁵MBUYA Mulungu adalonga mbati, “Mzinda wenewu ndi Yerusalemu, mzinda waikha ine pakati na kati pa madzinza, ule wazungulirwa na madziko anango.

⁶Kwache anthu a ku Yerusalemu adakhonda kuteweza matongero na mwambo wanga mbanyanya kudawa kupiringana madzinza na madziko azungulira ale. Iwo akhonda kuvera mwambo wanga mbakhonda kuteweza matongero anga.

⁷Natenepo ine, MBUYA Mulungu ndikulonga tenepa: Iwe wapandukira kupiringana madzinza akuzungulirawa, iwe wakhonda kuteweza matongero anga penu kuvera mwambo wanga. Iwe watsanzira mitemo ya anthu a madzinza anango.

⁸Natenepo ine MBUYA Mulungu ndikulonga tenepa: Ine mwenechiro ndasanduka nyamalwanu. Ine ndinati ndikutchunyuseni pamaso pa madzinza onsene.

⁹Na thangwi ya mifanikizo yanu yonsene yakuchitisa manyadzo ile, ine ndinati ndichite kuna imwe chinthu chakuti chipo ndidzati kuchichita tayu pontho sinachichitave tayu.

¹⁰Mamalisiro ache mu Yerusalemu anakhala akuti makolo anadya anawo, anambo anadya makolo awo. Ndinati ndikutchunyuseni mbandibalalisa konsene kwene onsenene anyakusalira na moyo.

¹¹“Natenepo ine MBUYA Mulungu ndikulonga kuti: Ine ninga Mulungu wamoyo, ndikudumbira kuti ine nkhabe dzakuverani nsisi, penu kukuyang'anani kwene tayu. Ine ndinakupuluzani, thangwi imwe mwaswipisa mbuto yanga yakuchena na mifanikizo yanu yakupupwa, pontho na pinthu pyakunyansa pidachita imwe pile.

¹²Khundu ibodzi ya makhundu matatu ya anthu anu anafa na muliri penu njala mumzindamo; khundu inango inamala puluzika pankhondo kunja kwa mzinda; pontho khundu yakusalirayo ndinaabalalisa kukhundu zonsene zinayi za dziko yapansi, pontho ine ndinaathamangisa na talasadanga.

¹³“Penepo shungu yanga nkhabe dzaleka, pontho ukali wanga nkhabe dzambombowa pana imwe tayu, kufikirana ndakhuthulira ukali wanga pana imwe mbandiva kululupirwa. Penepo munapidziwa kuti ine MBUYA ndalonga penepi thangwi ya ntchanje yanga na imwe.

¹⁴“Ine ndinakuchitisani kuvungika, pontho kukhala chinthu chakusekesa pakati pa madzinza akuzungulirani ale, pontho pamaso pa onsene akugwanda pyawo na njira.

¹⁵Imwe munasanduka chinthu chakusekesa pontho chakunyansa, chinthu chakucheuza nacho anango, pontho chakugumisa manungo kuna madzinza onsene akuzunguliraniwa, ndzidzi unafuna ine dzakutchunyusani thangwi ya kuzhangali kwanga, ukali wanga na kukusumululani kwanga. Ndalonga ndine MBUYA.

¹⁶Ine ndingaponya pana imwe matswimo akupha pontho akugoswa anjala, chinafuna ine nkhukuvungani kwene basi. Njalayo ndinati ndiinyanyise pyakwanga pene pakati panu mbandibulusa pyonsene pimbakudzeserani pyakudya pile.

¹⁷Ine ndinagwisa njala pontho kutumiza nyama zam'tsanga pakati panu, tenepo ipyo pinakusiyani akusowa ana. Muliri na upandu pinagwa pakati panu mbandidzesa nkhondo pakati panu. Ndalonga ndine MBUYA.”