Read cisena EZEKIELE 6 Bible Online

EZEKIELE 6 - cisena bible

EZEKIELE 6

¹MBUYA adalonga kuna ine mbati,

²“Iwe mwana munthu, yang'ana kumapiri a Israele mbulonge mphangwa zanga zakupokanyisana nawo

³kuti: Imwe mapiri a Israele, veserani mafala a MBUYA Mulungu. MBUYA Mulungu akulonga tenepa kuna mapiri, pitunda, mikulo na maphedi: Ine ndili chifupi kudzesa nkhondo pakati panu, mbandivunga mbuto zanu zonsene zakupembedzerapo milungu.

⁴Maguwanu ansembe anagomolwa, pontho maguwanu akufukizirapo pyakununkhira anagwiswa; ndinacheka na talasada anthu anu onsene pamaso pa mifanikizo yanu.

⁵Ndinamwaza mitembo ya anthu a ku Israele pamaso pa mifanikizo yawo; ndinamwaza magogodo anu pakati pa maguwanu ansembe.

⁶Konsene kwene kunakhala imweko, maluwani onsene anasanduka madembe pontho mbuto zakupembedzerapo milungu zinagomolwa, towera maguwanu ansembe avungike pontho kusakazika, mifanikizo yanu iswiwe na kuvungwa, maguwa akufukizirapo pyakununkhira amale gomolwa, pontho pyonsene pidasasanya imwe pidzamale vungwa monsene mwene.

⁷Anthu anu anaphiwa ponsene pene, tenepo imwe munapidziwadi kuti ine ndine MBUYA.

⁸“Kwache ine ndinasiya anthu anango na moyo, thangwi anango a imwe anapulumuka pankhondo ndzidzi unafuna imwe dzabalaliswa pakati pa madzinza anango.

⁹Tenepo anango a imwe, ale anafuna dzapulumuka pankhondo mbakwatwa kwenda kudziko ya unyaperezo, anandikumbuka, mule mwandizhangalisa iwo, thangwi mitimawo yakusowa chikhulupiro idabauka kubuluka kuna ine mbakwatika na mifanikizo. Penepo iwo ananyansirwa napyo okha ene thangwi ya pinthu pyakuipa na pyakunyansa pyachita iwo pile.

¹⁰Iwo anapidziwa kuti ine ndine MBUYA; ine nkhabe kuacheuza kwene pezi pene tayu kuti ndinaatchunyusa.”

¹¹MBUYA Mulungu akulonga tenepa: “Menyesani manjanu! Dindani pansi manyalo anu mbamulire kuti ‘Mama ine!’ na thangwi ya pinthu pyakudawika pontho pyakunyansa pyonsene pyachita Aisraele. Iwo anati afe pankhondo, njala na muliri.

¹²Ale ali kutali pyakwanga anati afe na muliri, alembo ali chifupi anati afe pankhondo; alembo anafuna dzapulumuka mbasala na moyo anati afe na njala. Natenepo ine ndinati ndikhuthulire ukali wanga onsene pana iwo.

¹³Iwo anapidziwa kuti ine ndine MBUYA, mitembo ya anyakuphiwa ingakhala nadza-nadza pakati pa mifanikizo yawo pontho na kuzungulira maguwawo ansembe, pamapiri akulapha ponsene, pontho na pansonga ya phiri yonsene, pansi pa muti onsene wakuvata na muti onsene wamthundu wakugudumira, pambuto pale pakhafukiza iwo pyakununkhira kuna mifanikizo yawo yonsene.

¹⁴Ine ndinati ndifuthule mkono wanga kuavunga mbandisandusa dziko yawo madembe kubulukira kuthando yatchetcha mpakana ku Ribila, konsene kwene kumbakhala iwo. Penepo iwo anapidziwadi kuti ine ndine MBUYA.”