Read cisena EZEKIELE 7 Bible Online

EZEKIELE 7 - cisena bible

EZEKIELE 7

¹MBUYA adalonga kuna ine mbati,

²“Iwe mwana munthu, ine MBUYA Mulungu ndikulonga tenepa kuna dziko ya Israele: Mamalisiro! Mamalisiro afika kunkhomo zonsene zinayi za dziko!

³Chinchino mamalisiro afika pana iwepo, Israele, tenepo ndinakhuthulira ukali wanga pana iwe. Ndinati ndikutonge mseru malingana na makhaliro ako mbandibwezera thangwi ya pinthu pyonsene pyakunyansa pyachita iwe.

⁴Ine nkhabe dzakuvera nsisi, penu kukuyang'ana kwene tayu; ndinati ndikutchunyuse thangwi ya makhaliro ako, pontho pinthu pyonsene pyakunyansa pyachita iwe. Penepo iwe unapidziwa kuti ine ndine MBUYA.”

⁵MBUYA Mulungu akulonga kuti, “Kuvungika! Kuvungika, kule chipo kudzati veka tayu kukudza pana iwe.

⁶Mamalisiro afika! Mamalisiro afika! Akufikirani! Mamalisiro afikadi!

⁷Nyatwa ikulu yadza pana imwe, ale mumbakhala m'dzikomo. Ndzidzi wafika, nsiku ili chifupi; anthu ali pampani-pani, nee kukomerwa paphiri tayu.

⁸“Ine ndili chifupi kukhuthulira ukali wanga pana imwe, pontho shungu yanga yonsene inamalira pana imwepo; ine ndinati ndikutongeni mseru malingana na makhaliro anu, pontho dzabwezera thangwi ya pinthu pyakunyansa pyachita imwepo.

⁹Ine nkhabe dzakuverani nsisi, penu kukuyang'ana kwene tayu; ine ndinati ndikutchunyuseni malingana na makhaliro anu pontho thangwi ya pinthu pyakunyansa pyachita imwe. Penepo imwe munapidziwa kuti ndine pano MBUYA aponya mashoko enewa.

¹⁰“Nsiku yafika, pontho yafikadi! Nyatwa ikulu yanyanduka, ndodo yaphwitha, kutumbama kwachita maluwa!

¹¹Kuzunguzika kwasanduka ndodo kuti itchunyuse kudawika; nee na mbodzi ene anafuna dzasiyiwa tayu, nee na chinthu chawo chene, nee mfuma penu demelero tayu.

¹²Ndzidzi wakwana, nsiku yafika. Nyakugula mbaleke kukomerwa, penu nyakugulisa kuphata phutu, thangwi ukali wa Mulungu unagwa pana munthu onsene.

¹³Nyakugulisa nkhabe dzaombola pontho pinthu pidagulisa iye kale pile tayu, mwenemo onsene nyakugulisa na nyakugulayo mbali moyo, thangwi masomphenya akulonga pya kuvungika kwa anthu onsene ale nkhabe dzasanduzika tayu. Na thangwi ya pyakudawa pyawo, nee mbodzi wa iwo anapulumusa moyo wache tayu.

¹⁴Podi kwene iwo ambaliza ngoma mbasasanyika monsene mwene, nkhabe munthu anafuna dzaenda kunkhondo tayu, thangwi ukali wanga uli pana munthu onsene.

¹⁵“Kuyang'ana kunja kuna nkhondo, ndingati soo m'bwalo muna njala na muliri; anyakukhala kunja kwa mzinda anafa pankhondo, pontho anyakukhala mumzindamo anafa na njala pontho muliri.

¹⁶Onsene ale anafuna dzapulumuka mbasala na moyo anathawira kumapiri mbalira ninga jiwa m'phedi, munthu onsene kulira thangwi ya pyakudawa pyache.

¹⁷Manja a munthu onsene anachita chiwewa, pontho mabondo onsene anagogobodoka.

¹⁸Iwo anavala masakha mbaphatwa na mantha makulu. Nkhope zawo zinagwa thangwi ya manyadzo mbapala mpala mumsolo mwawo.

¹⁹Silivawo anamtaya m'njira, pontho golidi wawo anakhala ninga chinthu chakunyansa. Golidi na silivawo nkhabe kwanisa dzaapulumusa tayu pansiku inafuna dzaoneka ukali wa MBUYA. Iwo nkhabe dzakwanisa kumalisa njalawo, penu kukhutisa pifu pyawo tayu na penepyo, thangwi penepyo pyaadawisa.

²⁰Iwo akhanyada na pinthu pyakuthemesera napyo manungo awo mbapiphatisa basa kusasanyira mifanikizo yakunyansa ikhapembedza iwo ninga milungu. Ndi thangwi yache ine ndidasandusa mfumawoyo kukhala chinthu chakunyansa kuna iwo.

²¹Pyonsenepyo ndinati ndipipereke m'manja mwa anyakupokosera achilendo, pontho kuna amuna akudawika a padziko yapansi, tenepo iwo anapiswipisa.

²²Ine ndinaapasa nkhodolo, pontho iwo anaswipisa mbuto yanga yakupambulika; mbava zinapita mwenemo mbaiswipisa.

²³“Sasanyani njemazo, thangwi m'dziko mwadzala na upandu pontho mumzindamo mwadzala na kuchita pyakuzunguzika.

²⁴Ine ndinati ndidzese anthu akudawikaletu pakati pa madzinza kuti apokosere nyumba zawo; ine ndinamalisa kunyada kwa anyamphamvu, pontho mbuto zawo za chipembedzo zinaswipiswa.

²⁵Pyakugoswa pingafika, iwo anasaka-saka mtendere, kwache hanaugumana tayu.

²⁶Dzedze pa dzedze inango, pontho mbiri pa mbiri inango mwakulondozana. Iwo anayesera kufuna kuva masomphenya kubulukira kuna maprofeti; nkhabe dzakhalapove chifunziso cha mwambo kubulukira kuna anyansembe tayu, pontho na uphungu ene wa akulu-akulu unasowa.

²⁷Mfumu anasintili, mwana mfumu kwache kunakhala kusanyika mtima, pontho manja a anthu a m'dzikomo anatetemera na mantha. Ine ndinachita kuna iwo mwakuthemerana na makhaliro awo, pontho ndinaatonga mseru sasawa na mudatongerambo iwo anango. Iwo anapidziwa kuti ine ndine MBUYA.”