Read cisena EZEKIELE 8 Bible Online

EZEKIELE 8 - cisena bible

EZEKIELE 8

¹Chaka chachitanthatu, pansiku yachishanu ya mwezi wachitanthatu wa unyaperezo wathu, pikhali ine m'nyumba mwanga, pabodzi pene na akulu-akulu a Yuda, penepo mphamvu za MBUYA Mulungu zidandigudumira.

²Ndidayang'ana mbandiona chinthu chinango chakuoneka ninga munthu. Kubulukira pale pakhaoneka ninga m'chuno mwache kutchitha pansi, akhaoneka ninga moto, pontho kubulukira penepo kukwira m'dzulu akhayetimira ninga nkuwa wakupukutwa mwadidi.

³Iye adafuthula chinthu chinango chile chikhaoneka ninga mkono wa munthu, tenepo adandithukula pakundikweya tsisi yanga. Kumasomphenya enewa Mzimu wa Mulungu adandiendesa m'dzulu pakati pa dziko yapansi na kudzulu. Tenepo iye adandiendesa ku Yerusalemu, kumsuwo wa m'bwaloletu wa mpanda wakumpoto wa Nyumba ya Mulungu, mule mukhali mfanikizo udazhangalisa Mulungu ule.

⁴Penepo pamaso panga padaoneka demelero ya Mulungu wa Israele ninga montho mudapionera ine kumasomphenya m'phedi mule.

⁵Tenepo iye adalonga kuna ine mbati, “Iwe mwana munthu, yang'ana kumpoto.” Ine ndidayang'anadi, tenepo msuwo wakumpoto chifupi na guwa yansembe ndidaonako mfanikizo udazhangalisa Mulungu ule.

⁶Tenepo Mulungu adalonga kuna ine mbati, “Iwe mwana munthu, ayi ukuona pinthu pinachita iwopi, pinthu pyakunyansa pinachita Aisraele, pinthu pile pinandichitisa kwenda pyanga kutali na mbuto yanga yakuchenayi? Kwache unati uone pinthu pizinji, pyakunyansa kupiringana penepi.”

⁷Kubuluka penepo adandiendesa kumsuwo wa pachintalo. Ndidayang'ana mbandiona benga pa fufu.

⁸Iye adalonga kuna ine mbati, “Iwe mwana munthu, chinchino kumba fufuyi.” Natenepo ndidaikumbadi fufu ile mbandionapo msuwo.

⁹Natenepo adalonga kuna ine mbati, “Pita mwenemo mbukaone pinthu pyakudawika, pontho pyakunyansa pinachita iwo pano.”

¹⁰Natenepo ndidapita mwenemo mbandiyang'ana. Ndidaona m'mafufu monsene mwamala jambulwa pinthu pyakukambadza pya mtundu na mtundu na nyama zokhonda chena pamaso pa Mulungu,[5] pontho na mifanikizo yonsene ya dzinza ya Israele.

¹¹Patsogolo pawo padaimira akulu-akulu makumanomwe a dzinza ya Israele, pontho Yaazania mwana Shafani akhaimirambo pakati pawo. Munthu onsene m'manja mwache akhali na chiwaya chakufukizira pyakununkhira, pontho utsi wa pyakununkhira pile ukhakwira kudzulu.

¹²Iye adalonga kuna ine mbati, “Iwe mwana munthu, ayi ukuona pinachita akulu-akulu a dzinza ya Israele mumdima, kada munthu kupembedza mifanikizo yache m'nyumba mwache? Iwo akulonga kuti, ‘MBUYA hakutiona tayu; MBUYA aikhonda dziko yathuyi?’ ”

¹³Iye adalonga pontho mbati, “Iwe unati uaone basi akuchita pinthu pyakunyansa pyakwanga kupiringana penepi.”

¹⁴Natenepo adandiendesa kumsuwo wakumpoto kwa Nyumba ya MBUYA, mbandiona akazi akhala mwenemo kusintili thangwi ya kufa kwa milungu ya Tamuzu.[6]

¹⁵Iye adalonga kuna ine mbati, “Iwe mwana munthu, ayi ukupiona pinachitikapi? Iwe unati uone pinthu pinango pyakunyansa kupiringana penepi.”

¹⁶Kubuluka penepo adandipitisa muchintalo cham'bwalo cha Nyumba ya MBUYA, penepo pamsuwo wa Nyumba ya MBUYA, pakati pa subi yakupitira m'Nyumba ya MBUYA na guwa yansembe, pakhali amuna ninga makumawiri na ashanu. Iwo adapolamira ku Nyumba ya Mulungu mbayang'ana kumabulukiro dzuwa, pontho akhalambira dzuwa pikhabuluka iyo.

¹⁷Iye adalonga kuna ine mbati, “Iwe mwana munthu, ayi waona penepi? Ayi chenechi ntchinthu ching'ono kuti dzinza ya Yuda achite chinthu chakunyansa ninga chenechi? Ayi iwo athema kudzaza dzikoyi na kuchita pyakuzunguzika, pontho kuthimiza kundizhangalisa basi? Yang'ana pinachita iwo kundishola pikulu pene.[7]

¹⁸Natenepo ine ndinati ndiatchunyuse na kuzhangali kwanga; ine nkhabe dzaavera nsisi, penu kuayang'ana kwene tayu. Podi kwene kuti iwo akhuwe pikulu pene kuna ine, ine nkhabe dzaavesera tayu.”