Read cisena EZEKIELE 9 Bible Online

EZEKIELE 9 - cisena bible

EZEKIELE 9

¹Kubuluka penepo ndidava MBUYA akuchemera mwakugaluza fala kuti, “Dzani kuno imwe, anyakufuna dzatchunyusa mzindawu. Kada munthu mbadze na chida cha nkhondo m'manja mwache.”

²Natenepo ndidaona amuna atanthatu akudza kubulukira kumsuwo wakumtunda pontho wakuyang'ana kumpoto wa Nyumba ya MBUYA. Kada munthu aphatira chida chakugoswa m'manja mwache. Pabodzi pene nawo pakhali munthu unango wakuvala nguwo zakuchena, ule akhadakwapatira chakulembera na pakulembera. Iwo adapita mwenemo mbaimira m'khundu mwa guwa yansembe yankuwa.

³Penepa demelero ya Mulungu wa Israele idakwira m'dzulu kubulukira padzulu pa pyakulengwa pyakukhala na maphaphido, pakhakhala iyo pale mbienda kumsuwo wa Nyumba ya Mulungu. Kubuluka penepo MBUYA adachemera munthu adavala nguwo zakuchena, pontho ule adakwapatira chakulembera na pakulembera ule,

⁴mbalonga kuna iye mbati, “Ndoko mbufamba-famba mumzinda onsene wa Yerusalemu, pontho ikha chidindo pachipumu cha munthu onsene ule anasintili, penu kulira thangwi ya pinthu pyonsene pyakunyansa pinachitikapyo.”

⁵Pikhavesera ine tenepo, iye adalonga kuna anthu anango mbati, “Mtewereni pinaenda iye mumzinda monsenemo mbamuphe mwakukhonda kuva nsisi penu nyambalo.

⁶Iphani nkhalamba, aphale, amiyali, akazi na ana ene, kwache lekani kupha munthu onsene wakukhala na chidindo. Tomani na mbuto yanga yakupambulika makayo.” Natenepo iwo adatoma na akulu-akulu akhali kunkhope kwa Nyumba ya Mulungu ale.

⁷Kubuluka penepo iye adalonga kuna iwo mbati, “Swipisani pyanu Nyumbangayo mbamudzaze pintalo pyonsene na mitembo. Ndokoni!” Natenepo iwo adenda mbatoma na kupha anthu a mumzinda monsenemo.

⁸Pikhapha iwo anthu, mbandisiyiwa ndekha ene, ine ndidapigwisa na fufumimba mbandikhuwa kuti, “Sha, MBUYA Mulungu! Ayi imwe munafunadi kuvunga Aisraele onsene akusalirawo na ukali wanu wakhuthulira imwe pana Yerusalemu?”

⁹MBUYA adanditawira mbati, “Pyakudawa pya dzinza ya Israele na Yuda pyanyanya maka; dziko yadzala na upandu okhokha pontho mumzindamo chilungamo nkhabemo. Iwo akulonga kuti, ‘MBUYA aikhonda dzikoyi; MBUYA hakutiona tayu?’

¹⁰Natenepo ine nkhabe dzaavera nsisi, penu kuayang'ana kwene tayu. Ine ndinagwisa nyatwa pana iwo, thangwi ya pinthu pyachita iwopyo.”

¹¹Kubuluka penepo munthu adavala nguwo zakuchena, pontho adakwapatira chakulembera na pakulembera ule, adabwerako mbalonga kuna MBUYA mbati, “Ndachita pyonsene ninga mudanditongera imwe.”