Read cisena DANIELE 1 Bible Online

DANIELE 1 - cisena bible

DANIELE 1

¹Chaka chachitatu Yehoiakimu mbali mfumu wa Yuda, Nebukadinezara, mfumu wa ku Babiloni adachita nkhondo na Yerusalemu mbazungulira mzindawo.

²Mbuya adamtawirisa kuphata Mfumu Yehoiakimu, pontho kukwata pyombo pinango pya ku Nyumba ya Mulungu. Penepi adenda napyo ku Babiloni mbakapiikha m'subi yakukoyeramo pinthu m'nyumba yakupembedzeramo milungu yache.

³Kubuluka penepo mfumu adapanga Ashipenazi, thubu wamkulu, kusankhula aphale anango pakati pa Aisraele akhadakwatwa unyaperezo ale, akubulukira m'banja yachifumu, pontho m'mabanja achilemedzo.

⁴Aphalewo adathema kukhala akusowa chilema, akubalika, anzeru, akufunza mwadidi, akuvesa pinthu, pontho akukwana kuphata basa m'nyumba yachifumu. Ashipenazi ndiye adathema kuafunzisa kuwerenga na kulemba chilongero cha ku Babiloni.

⁵Mfumu adalonga kuti nsiku na nsiku iwo adathema kupaswa pyakudya na vinyu kubulukira pa thebulu ya mfumu. Iwo adathema kufunziswa pyaka pitatu, kubuluka penepo kudzeswa pamaso pa mfumu dzamtumikira.

⁶Pakati pa anthu adasankhulwa ale pakhali anango akubulukira ku Yuda: Daniele, Hanania, Mishaele na Azaria.

⁷Mkadamu wa mathubu ale adaatchandula madzinawo ninga tenepa: Daniele adamtchandula Beleteshazara, Hanania adamtchandula Shadraki, Mishaele adamtchandula Meshaki, pontho Azaria adamtchandula Abedenego.

⁸Daniele adanyerezera kukhonda kupiswipisa yekha ene pakudya na kumwa pya kunyumba ya mfumu, pinthu pyokhonda chena pamaso pa Mulungu pile. Tenepo iye adapempha Ashipenazi kuti amtawirise kuchita tenepo.

⁹Mulungu adachitisa Ashipenazi kukomera mtima pontho kuvera nsisi Daniele.

¹⁰Kwache Ashipenazi adalonga kuna Daniele mbati, “Ine ndikugopa mbuya mfumu, ule apereka pyakudya na pyakumwa pyakuthemerana na imwepo. Thangwi yache ninji iwe uli nkhong'o-nkhong'o na anzako anangowa? Penepo mfumu anati andiphe thangwi ya penepyo.”

¹¹Tenepo Daniele adalonga kuna mkadamu, adaikha Ashipenazi kuyang'anira Daniele, Hanania, Mishaele na Azaria ule mbati,

¹²“Ndaphata miyendo, tiyeseni nsiku khumi. Tipaseni muliwo wa masamba okhokha na madzi akumwa.

¹³Tenepo tisiyaniseni na aphale anadya pyakudya pyachifumuwa mbamuchite kuna ife malingana na munafuna dzationera imwe.”

¹⁴Iye adatawira kuayesa nsiku khumi.

¹⁵Tenepo pidakwana nsiku khumi, iwo adaoneka a manungo amphamvu pontho akumusira kupiringana aphale onsene akhadya pyakudya pyachifumu ale.

¹⁶Natenepo mkadamu ule adabulusa pyakudya pyadidi na vinyu pile pidathema iwo kudya na kumwa, m'mbuto mwache adaapasa muliwo wa masamba okhokha.

¹⁷Mulungu adapasa amuna anayi ale udziwisi na luso, pontho nzeru pamabukhu akusiyana-siyana na papifunziso pyonsene, kwache Daniele Mulungu adampasa luso yakuthumbusula masomphenya na ndoto pya mtundu onsene.

¹⁸Pakumala kwa pyaka pitatu, ndzidzi udatonga mfumu ule kuti adzeswe pamaso pache, Ashipenazi adenda na amuna ale kuna Mfumu Nebukadinezara.

¹⁹Mfumu adalonga nawo onsenewo, mbwenye Daniele, Hanania, Mishaele na Azaria adachitisa mfumu kukomerwa pyakwanga kupiringana anango onsene ale. Tenepo iwo adasanduka anyakutumikira mfumu.

²⁰Podi kwene mfumu avunze pyache mvunzo wakunensa tani, penu akhale na nyatwa yakutani, amuna anayiwa adaoneka anzeru kakhumi kupiringana anyakuombedza penu anyamatsenga onsene a muufumuwo.

²¹Daniele adathimiza kukhala kunyumba ya mfumu mpakana chaka chakutoma cha utongi wa Kirusi mfumu wa Peresia.