Read cisena DANIELE 2 Bible Online

DANIELE 2 - cisena bible

DANIELE 2

¹Chaka chachiwiri Nebukadinezara mbali mfumu, adalota ndoto. Ndotozo zidamsanyisa pyakwanga pene mwakuti hadaone nazo chitulo tayu,

²natenepo adachemeresa mapungu ache anyakuombedza, anyamatsenga, mfiti na anyakulotera kuti amthumbusulire ndoto zache zile. Pidadza iwo onsene mbaimira pamaso pa mfumu,

³iye adalonga kuna iwo mbati, “Ine ndikusanyika mumtima na ndoto zalota ine. Chinafuna ine nkhudziwa kuti ndotozo zikulonganji basi.”

⁴Mapungu a mfumu ale adatawira mfumuyo m'Chiaramu[1] mbati, “Mfumu mbakhale na moyo kwenda na kwenda! Ngatipangeni ndoto zanuzo, tenepo ife tinakuthumbusulirani.”

⁵Mfumu adalonga kuna iwo mbati, “Ine ndanyerezera kuti mundipange ndoto zalota ine, kubuluka penepo mundipange kuti ndotozo zikulonganji. Ngakhala imwe munachimwana kuchita tenepo, munati mugwandwe nthuli-nthuli mbandichitisa misanu kusanduka madembe.

⁶Kwache mungandipanga ndotozo, pontho kundithumbusulira kuti zikulonganji, penepo ndinakufupani na mitukwa, pontho na chilemedzo chikulu. Natenepo ngandipangeni ndotozo, pontho kundithumbusulira kuti zikulonganji.”

⁷Iwo adatawira kachiwiri kache mbati, “Mfumu, ngakhala imwe munatipanga ndotozo, ife tinakwanisa kuzithumbusula.”

⁸Penepo mfumu adatawira mbati, “Ndimomwene anachita imwe ndi masalapita, thangwi mukudzindikira kuti penepi ndiye pyanyerezera ine.

⁹Mungakhonda kundipanga ndotozo munati mupione pinafuna buluka m'mabondo mwanu. Imwe mwapangana kundipanga pinthu pyakunama pontho pyapezi-pezi kunyerezera kuti mwinango pinthu pinachinja. Tenepo mungandipanga ndotozo, ine ndinapidziwa kuti imwe munakwanisa kuzithumbusula.”

¹⁰Mapungu a mfumu ale adamtawira mfumu mbati, “Nkhabe munthu padziko yapansi anakwanisa kuchita pinafuna imwepyo tayu. Nkhabe tayu mfumu, chipo nee munthu wakuveka penu wamphamvu adapempha chinthu ninga chenechi kuna anyakuombedza, anyamatsenga, penu mfiti tayu.

¹¹Pinapempha imwe mfumu mphyakunensa pyakwanga mwakuti nkhabe na mbodzi ene anakwanisa kukupangani tayu, kupambula milungu; apo milunguyo nkhabe khala pakati pa anthu tayu.”

¹²Na mafala enewa mfumu adazhangali pyakwanga mbatonga kuti mapungu onsene a mfumu mu Babiloni amale phiwa.

¹³Natenepo matongerowo adaperekwa kuti mapungu a mfumu aphiwe, pontho amuna adatumwa kasaka-saka Daniele na ashamwali ache ene kuti aphiwe.

¹⁴Kubuluka penepo Daniele adenda kuna Arioki, mkadamu wa anyakulondali mfumu, ule akhadatongwa kupha mapungu a mfumu. Iye adalonga naye mwanzeru pontho mphole-mphole

¹⁵kumvunza thangwi idachitisa mfumu kupereka matongero avinga ninga enewa. Tenepo Arioki adampanga Daniele pikhadachitika pile.

¹⁶Kabodzi kene Daniele adenda kuna mfumu kampempha kuti ampase ndzidzi kuti athumbusule ndoto zachezo.

¹⁷Tenepo Daniele adenda kwawo mbakapangambo ashamwali ache, Hanania, Mishaele na Azaria pikhadachitika pile.

¹⁸Iye adaapanga kuti apemphere kuna Mulungu wa kudzulu kuti aavere nsisi, pontho kupempha kuti atchulule pinthu pyakubisikapi kuna iwo, towera aleke pherwa kubodzi kwene na mapungu a mfumu a mu Babiloni.

¹⁹Na mosiku mwache Mulungu adatchulula pyakubisika pile kuna Daniele kumasomphenya, tenepo iye adakuza Mulungu wa kudzulu mbati,

²⁰“Mbikuzwe dzina ya Mulungu kwenda na kwenda; nzeru pontho mphamvu mphyache.

²¹Iye ambatonga pyakuchitika padziko yapansi; iye ambapitisa pampando mafumu, pontho ambaabulusa pampandopo. Iye ambapereka nzeru kuna anyanzeru mbapasa udziwisi kuna anyakuvesa pinthu.

²²Iye ambatchulula pinthu pyakuzwika pontho pyakubisika; iye ambadziwa pimbachitika mumdima, pontho cheza chili muna iye.

²³Ndinapereka takhuta kuna imwe, pontho ndinakukuzani, imwe Mulungu wa makolo athu. Imwe mwandipasa nzeru na mphamvu; imwe mwatidziwisa pinthu pyakupemphani ife; imwe mwatitchululira ndoto za mfumu.”

²⁴Kubuluka penepo Daniele adenda kuna Arioki, akhadatongwa kupha mapungu a mfumu onsene a mu Babiloni. Iye adalonga kuna iye mbati, “Lekani kuapha. Ndiendeseni kuna mfumu, tenepo ine ndinakampanga kuti ndotozo zikulonganji.”

²⁵Kabodzi kene Arioki adenda na Daniele pamaso pa Mfumu Nebukadinezara mbampanga mfumu mbati, “Ndamgumana munthu pakati pa anyakukwatwa unyaperezo a Chiyuda, ule anakwanisa kukupangani kuti ndoto zanu zikulonganji.”

²⁶Mfumu adalonga kuna Daniele (ule akhachemerwa pontho Beleteshazara) mbati, “Ayi iwe unakwanisa kundipanga ndoto zidalota ine, pontho kundithumbusulira?”

²⁷Daniele adatawira mbati, “Mbuya mfumu, nkhabe mfiti, nyamatsenga, nyakuombedza penu nyakulotera anakwanisa kuthumbusula kuna mfumu pinthu pyakubisika pinafuna imwepyo tayu,

²⁸mbwenye pana Mulungu wa kudzulu ule ambatchulula pinthu pyakubisika. Iye akudziwisani pinthu pyonsene pinafuna dzachitika m'tsogolo muno. Chinchino ndinakupangani ndoto zanu, pontho masomphenya adaona imwe pikhagona imwe.

²⁹“Pikhagona imwe mfumu, mudalota pya m'tsogolo, tenepo Mulungu nyakutchulula pinthu pyakubisika adakuonesani pinthu pinafuna dzachitika m'tsogolo muno.

³⁰Tenepo ndinakupangani pinthu pyakubisika pyatchululwa kuna inepi, nee na thangwi yakuti ndine wanzeru pyakwanga kupiringana munthu unango onsene tayu, mbwenye kuti imwe mfumu mudzindikire kuti ndoto zanu zikulonganji, pontho kuvesa pinthu pili m'manyerezero mwanu.

³¹“Mfumu, imwe mudalota chidzimunthu chaimira pamaso panu, chikulu pyakwanga, chakuyetimira pontho chakugoswa pyakwanga.

³²Msolo wache udasasanywa na golidi chadi-chadi, gangafuwa na mikono yache pidasasanywa na siliva, pontho chuno chache na ntchafu zache pidasasanywa na nkuwa;

³³miyendo yache idasasanywa na simbi, pontho manyalo ache akhali pang'ono simbi pang'ono dongo.

³⁴Pikhachiyang'ana imwe, mwala ukulu udatchodoka okha ene, tenepo udagwera pamanyalo a pang'ono simbi pang'ono dongo ale, penepo manyalo ale adavavadika.

³⁵Kabodzi kene simbi, dongo, nkuwa, siliva na golidi pidamala peyeka mbapisanduka ninga masundu-sundu pambuwa ndzidzi wa malimwe. Mphepo idapimbulusa mbikhonda siya na nyenyeswa ene. Mwala udagwera chidzimunthu ule, udakula mbusanduka phiri, ile idadzala dziko yonsene yapansi.

³⁶“Ndoto zanu zikhali zenezi. Tenepo ndinakupangani kuti ndotozo zikulonganji.

³⁷Mfumu, imwe ndimwe wamkulu pakati pa mafumu onsene. Mulungu wa kudzulu akuchitisani kukhala mfumu mbakupasani mphamvu, mboko pontho chilemedzo.

³⁸Iye adakuchitisani kukhala mtongi wa anthu onsene a padziko yonsene yapansi, pontho adakupasani utongi pana nyama na mbalame zene. Imwe mwakhala ninga msolo wa golidi ule.

³⁹“Mungabuluka imwe, panabwera mfumu unango nee wamkulu kupiringana imwe tayu. Kubuluka weneyo panabwera unango wachitatu, ufumu wa nkuwa, ule anatonga dziko yonsene yapansi.

⁴⁰Kubuluka weneyo panabwera unango wachinayi, mfumu wamphamvu pyakwanga ninga simbi, ile imbavunga na kuswa pinthu. Tenepo ninga mumbavungira simbi pinthu, iye anavunga na kupwetedza mafumu onsene akutoma ale.

⁴¹Imwe mudaona pontho manyalo na pyala kuti pikhali pang'ono simbi pang'ono dongo. Penepi pikulonga kuti ufumuwo unagawikana. Kwache unakhala na mphamvu za simbi pang'ono, ninga mudapionera imwe simbi kuvungazikana na dongo.

⁴²Pyala pile pikhali pang'ono simbi pang'ono dongo, nkhulonga kuti khundu ibodzi ya ufumu inakhala yamphamvu, khundu inangomboyo mbikhala yakusowa mphamvu.

⁴³Ninga mudaonera imwe simbi kuvungazikana na dongo, penepa nkhulonga kuti atongi muufumu wenewo anayesera kuphatizana pakusemberana, kwache iwo nkhabe dzakwanisa kuphatizana tayu, ninga montho mumbachitira simbi na dongo kukhonda vungazikana.

⁴⁴Pandzidzi wa mafumu enewo, Mulungu wa kudzulu anakhazikisa ufumu ule nkhabe dzamala tayu. Iwo nkhabe dzakundwa tayu, mbwenye unavunga monsene mwene mafumu anango onsene mbukhalapo kwenda na kwenda.

⁴⁵Imwe mudaona mule mudatchodokera mwala okha ene, nee na manja a munthu tayu, pontho mule mudapwetedzera iwo dzimunthu wakusasanywa na simbi, nkuwa, dongo, siliva na golidi ule. Mulungu wamkulu akukupangani imwe mfumu pinthu pinafuna dzachitika m'tsogolo. Ine ndakupangani mwakuonadi ndoto zanu mbandikuthumbusulirani pyakuona pyokhokha.”

⁴⁶Tenepo Mfumu Nebukadinezara adalamba pamaso pa Daniele pontho mbamulemedza mbatonga kuti nsembe na pyakupereka piperekwe kuna Daniele.

⁴⁷Mfumu adalonga kuna Daniele mbati, “Mulungu wako ngwamkulu kupiringana milungu yonsene, MBUYA wa mafumu pontho nyakudziwa kutchulula pinthu pyakubisika. Ine ndadziwa penepi, thangwi iwe wakwanisa kuthumbusula pyakubisika penepi.”

⁴⁸Tenepo iye adampasa Daniele chidzo chikulu chene mbamuunjikira mitukwa yadidiletu. Padzulu pache adamuikha kukhala mtongi wa dziko yonsene ya Babiloni, pontho kukhala mkadamu wa mapungu onsene a mfumu.

⁴⁹Mfumu adaikha Shadraki, Meshaki na Abedenego kukhala anyakufambisa boma ya Babiloni malingana na kupempha kudachita Daniele kuna mfumu; kwache Daniele adathimiza basi kukhala kunyumba yachifumu.