Read cisena DANIELE 3 Bible Online

DANIELE 3 - cisena bible

DANIELE 3

¹Mfumu Nebukadinezara adasasanya mfanikizo wa golidi kulapha kwache kukhali makhono makumawiri na anomwe, pontho manungo ache ukhali nenene makhono matatu. Iye adautchimika m'phedi ya Dura m'dziko ya Babiloni.

²Tenepo mfumu adapereka matongero kuti mathubu ache onsene adze pabodzi pene, atongi, akulu a boma, mapungu, anyakukoya kobiri, anyakutonga miseru na atsanthemba, na akulu-akulu anango onsene a muufumu wache. Iwo adenda kumwambo wakupambulira mfanikizo udatchimika Mfumu Nebukadinezara ule.

³Pidamala gumanyikana mathubu onsene ale kuchita mwambo wakupambulira mfanikizo ule, pontho kuimira kutsogolo kwa mfanikizo ule,

⁴nyakulalika adagaluza fala kulonga kuna anthu mbati, “Anthu a madzinza onsene, mtundu onsene pontho chilongero chonsene mukutongwa kuti:

⁵Sindzidzi imwe nkhuva kulira kwa ngoma, chitoliro, bangwe, nyakatangale, malimba na ng'oma, pontho na chakuimbira chinango cha mtundu onsene, imwe mwathema kulamba kupembedza mfanikizo wa golidi watchimika Mfumu Nebukadinezara ule.

⁶Munthu onsene anakhonda kulambayo anaponywa kabodzi kene m'dzenje yakuyerima moto.”

⁷Natenepo, sindzidzi iwo nkhuva kulira kwa ngoma, chitoliro, bangwe, nyakatangale, valimba na ng'oma, pontho na chakuimbira chinango cha mtundu onsene, anthu a madzinza onsene, mtundu onsene, pontho chilongero chonsene akhalamba kupembedza mfanikizo wa golidi udatchimika Mfumu Nebukadinezarawu.

⁸Pandzidzi wenewu anthu anango a ku Babiloni adagumana mwayi wakusumira Ayuda.

⁹Iwo adalonga kuna Mfumu Nebukadinezara mbati, “Dondowe Mfumu!

¹⁰Imwe mudapereka matongero akuti sindzidzi munthu nkhuva kulira kwa chakuimbira cha mtundu onsene, iye athema kulamba kupembedza mfanikizo wa golidi,

¹¹pontho kuti munthu onsene anakhonda lamba kupembedzayo anaponywa m'dzenje yakuyerima moto.

¹²Mbwenye pana Ayuda anango adaikha imwe kuyang'anira nthemba zinango m'dziko ya Babiloni muno: Shadraki, Meshaki na Abedenego, ale nkhabe ikha konta matongero adapereka imwe mfumu tayu. Iwo nkhabe pembedza milungu yanu, penu kulambira mfanikizo udatchimika imwe ule tayu.”

¹³Mfumu Nebukadinezara adazhangali pyakwanga mbatonga kuti amuna atatu ale adzeswe pamaso pache.

¹⁴Iye adalonga kuna iwo mbati, “Shadraki, Meshaki na Abedenego, ayi mphyakuona kuti imwe mwakhonda kupembedza milungu yanga, pontho kukhonda lambira mfanikizo udatchimika ine ule?

¹⁵Chinchino sindzidzi imwe nkhuva kulira kwa ngoma, chitoliro, bangwe, malimba, nyakatangale na ng'oma, pontho na chakuimbira chinango cha mtundu onsene, imwe mwathema kulambira na kupembedza mfanikizo. Ngakhala imwe nkhabe chita tenepo tayu, munati muponywe kabodzi na kabodzi m'dzenje yakuyerima moto. Penepo mbani mulungu wacheyo anafuna kukuombolani m'manja mwanga?”

¹⁶Shadraki, Meshaki na Abedenego adamtawira mfumu mbati, “Mfumu, ife nkhabe funa kuyesera kupitchinjiriza tekha ene pamseru wenewu tayu.

¹⁷Mulungu anatumikira ifeyu ndiye anakwanisa kutipulumusa kudzenje ya moto, pontho m'manja mwanu mfumu.

¹⁸Mbwenye ngakhala iye hanapichita tayu, ife tinafuna mupidziwe kuti na kutani kwene ife nkhabe tumikira milungu yanu, penu kupembedza mfanikizo wa golidi udatchimika imwe ule tayu.”

¹⁹Penepo Mfumu Nebukadinezara adazhangalira Shadraki, Meshaki na Abedenego mbaatuzulira maso. Iye adatonga kuti dzenje ya moto iseserwe kanomwe kupiringana nsiku zonsene

²⁰mbatonga anyankhondo ache amphamvuletu kumanga Shadraki, Meshaki na Abedenego mbaaponya m'dzenje yakuyerima moto ile.

²¹Natenepo amuna enewa uku avala mikhanjo, mabuluku na pipewu, pontho na nguwo zinango, adamangwa mbaponywa m'dzenje yakuyerima moto.

²²Na thangwi yakuti mfumu akhali na shungu pyakwanga adachitisa motowo kupisa pyakwanga mwakuti mbebe wa motowo udapisa anyankhondo adaponya Shadraki, Meshaki na Abedenego m'dzenje ya moto ale,

²³tenepo amuna atatu ale uku amangwa mwadidi mwene adagwera m'dzenje yakuyerima moto mule.

²⁴Kabodzi kene Mfumu Nebukadinezara adalamuka mwakudodoma mbavunza mapungu ache mbati, “Ayi ife sidaamange anthu atatu mbatiaponyera m'dzenje ya motomu tayu?” Iwo adatawira mbati, “Ande ndimomwene, mfumu.”

²⁵Iye adavunza mbati, “Apo thangwi yache ninji ndikuona amuna anayi akufamba-famba m'motomo? Iwo hadamangwe tayu, pontho nee na kupya kwene tayu; munthu wachinayi ache akuoneka ninga mwana milungu.”[2]

²⁶Tenepo Mfumu Nebukadinezara adenda kumsuwo wa dzenje yakuyerima moto mbachemera mbati, “Shadraki, Meshaki na Abedenego! Anyabasa a Mulungu Wakudzulu-dzulu, bulukanimo.” Tenepo iwo adabulukamo kabodzi kene.

²⁷Penepo atongi, akulu a boma, mapungu na mathubu anango a mfumu adagumanyikana dzaona amuna atatu, ale hadapye na pang'ono pene na moto ule tayu. Tsisi yawo hidavulike, penu nguwo zawo kupya tayu; iwo nee akhanunkha na utsi ene tayu.

²⁸Penepo Mfumu Nebukadinezara adalonga mbati, “Mbakuzwe Mulungu wa Shadraki, Meshaki na Abedenego, ule atumiza mngelo wache dzapulumusa anyabasache! Iwo adamnyindira mbakhonda vera matongero anga, pontho adatawira kutaya moyo wawo kusiyana na kutumikira, penu kupembedza milungu inango pambali pa Mulungu wawo.

²⁹Natenepo ndikutonga kuti ngakhala munthu onsene wa dzinza yonsene, wa mtundu onsene, penu chilongero cha mtundu onsene anatikana Mulungu wa Shadraki, Meshaki na Abedenego, weneyo athema kugwandwa nthuli-nthuli, pontho musache mbusanduke madembe. Nkhabe mulungu unango anakwanisa kupulumusa ninga tenepa tayu.”

³⁰Tenepo mfumu adapasa chidzo chikulu chene kuna Shadraki, Meshaki na Abedenego m'dziko ya Babiloni.