Read cisena DANIELE 4 Bible Online

DANIELE 4 - cisena bible

DANIELE 4

¹Mfumu Nebukadinezara adatumiza mphangwa kuna anthu a madzinza onsene, mtundu onsene na chilongero chonsene padziko yonsene yapansi mbati, “Mwenyikiro!

²Ndakomerwa pyakwanga kukupangani pya pidzindikiro na pyakudodomesa pyandionesera Mulungu Wakudzulu-dzulu.

³“Mphikulu pyakwanga pidzindikiro pyache; mphyamphamvu pyakwanga pyakudodomesa pyache! Ufumu wache ngokhonda mala; utongi wache ngwakwenda na kwenda kubulukira mfendu mpakana mfendu unango.

⁴“Ine Nebukadinezara, ndikhakhala pyanga kunyumba yachifumu wakukomerwa, mwenemo pinthu pyanga pikundifambira mwadidi.

⁵Kwache ndidalota ndoto zakuchitisa mantha, pontho ndidaona masomphenya akugoswa pikhagona ine patalimba panga.

⁶Ine ndidachemeresa mapungu onsene a mu Babiloni kudza pamaso panga, towera andipange kuti ndotozo zikulonganji.

⁷Tenepo anyakuombedza, anyamatsenga, mfiti na anyakulotera onsene akhadadzeswa pamaso panga. Ine ndidaapanga ndoto zile, kwache iwo adachimwana kuzithumbusula.

⁸Pakumalisira pache Daniele adadza pamaso panga, tenepo ine ndidampanga ndoto zanga zile. (Iye ambadziwika pontho na dzina yakuti Beleteshazara, dzina ya milungu yanga, pontho ule mzimu wa milungu yakuchena uli muna iye.)

⁹Ine ndidalonga kuna iye kuti: Beleteshazara, mkadamu wa anyakuombedza, ine ndimbapidziwa kuti mzimu wa milungu yakuchena uli muna iwe, pontho kuti iwe umbadziwa pyakubisika pyonsene. Ndoto zanga nsizi, tenepo ngandipange kuti zikulonganji.

¹⁰“Pikhagona ine patalimba panga, ndidaona kumasomphenya muti ukulu pyakwanga pakati na kati pa dziko. Mutiwo ukhali wakulapha pyakwanga.

¹¹Muti ule udakula pyakwanga, pontho ukhali wamphamvu mwakuti nsonga yache idaphata thambo mbukwanisa kuoniwa na munthu onsene padziko yapansi.

¹²Masambache akhali akubalika pyakwanga, pontho ukhali na nsapo zizinji pyakwanga zakukwana kudyesa anthu onsene a padziko yapansi. Nyama zam'tsanga zikhapuma pamthunzi wache, mbalame zidamanga pisa pyawo mwenemo, pontho chinthu chonsene cha moyo chikhadya nsapo zache.

¹³“Kuchitulo konthoko kumasomphenya, ndidayang'ana mbandiona nyamphangwa, nyakuchena, akudza kubulukira kudzulu.

¹⁴Iye adalonga mwakugaluza fala mbati, ‘Gwanda mutiwo mbukadze nthambi zachezo; sadzula masambache mbumwaze-mwaze nsapo zache. Thamangisa nyama zili pansi pachezo, pontho na mbalame zili m'mutiwo.

¹⁵Kwache siya chitsa na mitsisi yache ene, pile pyamangwa na mthimbalimba wa simbi na nkuwa. Chisiye m'mundamo pakati pa maudzu. “‘Muleke anyontholerwe na bume, pontho muleke akhale pyache pakati pa nyama na pyakumera.

¹⁶Manyerezero ache aumunthu mbasanduzwe kukhala aunyama mpakana pyaka pinomwe pimale.

¹⁷Penepi ndiye pinthu pidalonga anyamphangwa akuchena, towera anthu apidziwe kuti Mulungu Wakudzulu-dzulu ndi mtongi wa maufumu a anthu mbapereka ufumu kuna munthu onsene anafuna iye, podi na kuna anthu okhonda funika ene.’

¹⁸“Ndoto zidalota ine, Mfumu Nebukadinezara, nsenezi. Tenepo Beleteshazara ngandipange pinalonga ndoto zenezi. Nee mbodzi wa mapungu anga akwanisa kuzithumbusula tayu, mbwenye iwe unakwanisa kuzithumbusula, thangwi mzimu wa milungu yakuchena uli muna iwe.”

¹⁹Penepa Daniele, ule akhadziwika pontho na dzina yakuti Beleteshazara, adaswipa mtima ndzidzi ene mbaphatwa na mantha. Mfumu adalonga kuna iye mbati, “Beleteshazara ndotozi na pinalonga izo mbapileke kukuchitisa mantha.” Beleteshazara adalonga mbati, “Mfumu ndikhapifuna pyakwanga kuti ndoto zenezi mbamudazilotera anyamalwanu nee imwe tayu.

²⁰Muti udaona imwe ule, udakula mbukhala wamphamvu mwakuti nsonga yache idaphata thambo mbukwanisa kuoniwa na munthu onsene padziko yapansi.

²¹Masambache akhali akubalika pyakwanga, pontho ukhali na nsapo zizinji zakukwanisa kudyesa dziko yonsene yapansi. Nyama zam'tsanga zikhapuma pamthunzi wache, mbalame zikhamanga pisa m'nthambi zache.

²²“Muti wenewu ndimwe ene mfumu. Imwe mwasanduka wamkulu, pontho wamphamvu. Kuveka kwanu kwafika kuthambo, pontho mphamvu zanu zafalikira konsene kwene padziko yapansi.

²³Mfumu, pikhaona imwe nyamphangwa wakuchena akudza kubulukira kudzulu mbalonga kuna imwe mbati, ‘Gwanda mutiwo mbuuvunge, kwache usiye chitsa chache, chile chamangwa na mthimbalimba wa simbi na nkuwa, m'mundamo pakati pa maudzu. Munthuyo mbanyontholerwe na bume, pontho mbakhale pyache ninga nyama zam'tsanga pyaka pinomwe.’

²⁴“Mfumu, ndotozo zikulonga tenepa, pontho matongero apereka Mulungu Wakudzulu-dzulu kupokanyisana na mbuya mfumu ngakuti:

²⁵Imwe munabuluswa pakati pa anthu mbamukhala pakati pa nyama zam'tsanga; munadya maudzu ninga ng'ombe mbamunyontholerwa na bume pyaka pinomwe. Kubuluka penepo imwe munatawira kuti Mulungu Wakudzulu-dzulu ndi mtongi wa maufumu onsene mbaupereka kuna munthu onsene anafuna iyeyo, podi na kuna anthu okhonda funika ene.

²⁶Nyamphangwa wakuchena ule adalonga kuti chitsa na mitsitsi yache pisiyiwe, nkhulonga kuti ufumu wanu unabwezerwa pontho kuna imwe mungatawira kuti Mulungu wa kudzulu ndi mtongi wa dziko yonsene.

²⁷Natenepo mfumu chitani pinafuna ine kukupangani. Lekani pyakudawa pyanu mbamuchite pyakulungama. Lekani kupondereza anyakutcherenga. Penepo pinthu pyanu pinathimiza kukufambirani mwadidi.”

²⁸Pyonsenepi pidachitikadi kuna Mfumu Nebukadinezara.

²⁹Pidagwanda kwene miyezi khumi na miwiri basi, pikhathamula mfumu miyendo pansoyi ya nyumbache mu Babiloni,

³⁰iye adalonga mbati, “Ngayang'anani kukula kwachita Babiloni! Ine ndidaumanga mzinda ukulu ninga wenewu kuonesa mphamvu na mboko zanga, demelero yanga na ufumu wanga.”

³¹Iye mbadzati bulusa fala, padaveka fala yakubulukira kudzulu kulonga kuti, “Mfumu Nebukadinezara vesera pinalonga inepi! Mphamvu zako zachifumu zapokoserwa.

³²Iwe unabuluswa pakati pa anthu mbukakhala pakati pa nyama zam'tsanga; unadya maudzu ninga ng'ombe pyaka pinomwe. Penepo iwe unadzindikira kuti Mulungu Wakudzulu-dzulu ndi mtongi wa maufumu onsene mbaupereka kuna munthu onsene anafuna iyeyo!”

³³Kabodzi na kabodzi pyonsene pidalongwa pya Nebukadinezara pidachitika. Iye adabuluswa pakati pa anthu mbadya maudzu ninga ng'ombe. Manungo ache adanyontholerwa na bume mpakana tsisi yache idasanduka ninga manthenga a mphamba, pontho ngole zache zidasanduka ninga pyala pya mbalame.

³⁴Tenepo mfumu adalonga mbati, “Pidagwanda pyaka pyonsene pinomwe, ine Nebukadinezara ndidakwiza maso anga kudzulu, pontho umunthu wanga udabwereramo. Tenepo ndidakuza Mulungu Wakudzulu-dzulu; ine ndidapereka chilemedzo na demelero kuna nyakukhala na moyo okhonda mala ule. “Utongi wache ngokhonda mala; ufumu wache ngwakwenda na kwenda kubulukira mfendu mpakana mfendu unango.

³⁵Anthu onsene a padziko yapansi kuna iye si pinthu tayu. Iye ambachita pinafuna iye kuna angelo a kudzulu pontho na kuna anthu a padziko yapansi. Nkhabe na mbodzi ene anakwanisa kumkhondesa pinthu, penu kulonga kuna iye kuti, ‘Pyachita imwepi ninji?’

³⁶“Pidabwereramo umunthu wanga, na ndzidzi onthowo chilemedzo changa na demelero ya ufumu wanga pidabwezerwa kuna ine. Mapungu anga na mathubu anga adanditambira mwadidi. Tenepo ndidabwezerwa pampando wanga wachifumu mbandisanduka wamkulu pyakwanga kupiringana pakutoma pale.

³⁷“Natenepo ine, Nebukadinezara, ndikukuza, kulemedza na kupereka demelero kuna Mfumu wa kudzulu, thangwi pyonsene pimbachita iye mphyakulungama, pontho njira zache nsachilungamo, pontho iye anakwanisa kuchepesa anyakutumbama onsene.”